អ្នកបើកយន្តហោះវៀតណាម ចុចប៊ូតុងច្រឡំ ភ័យស្លន់ពេញព្រលាន

2014-12-19 17:50:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអាកាសចរ Vietnam Airlines បានពិន័យអ្នកបើកបរយន្តហោះ និងក្រុមការងារ ក្រោយពេលអាកាសយានិករូបនោះ ចុចប៊ូតុងច្រឡំពេលកំពុងស្នើសុំចុះចតបន្ទាន់ ពោលគឺចុចចំប៊ូតុងដែលប្រកាសថាមានអ្នកប្លន់យន្តហោះ។

កំហុសឆ្គងដោយចៃដន្យនេះ បានបង្កភាពភ័យស្លន់ស្លោនៅព្រលានយន្តហោះ ខណៈក្រុមអ្នកត្រួតពិនិត្យជើងហោះហើរជឿថាមានពួកភេរវជនកំពុងចាប់អ្នកដំណើរលើយន្តហោះដែលត្រៀមចុះចត។

រឿងហេតុនេះបានកើតឡើងកាលពីយប់ថ្ងៃអង្គារ ពេលដែលអ្នកបើកយន្តហោះព្យាយាមចុចកូដ 7700 ដែលជាកូដស្នើសុំចុះចតបន្ទាន់ ដោយសារតែយន្តហោះជួបបញ្ហាបច្ចេកទេសពេលហោះចេញពីទីក្រុងហូជីមិញ ទៅកាន់តំបន់ Vinh។ ប៉ុន្តែអ្នកបើកយន្តហោះរូបនោះ បែរជាច្រឡំចុចកូដ 7500 ដែលជាកូដបញ្ជាក់ថាមានការប្លន់យន្តហោះទៅវិញ។

ក្រុមអ្នកដំណើរទាំងអស់លើយន្តហោះមិនបានដឹងថាមានការបញ្ជូនកូដនេះនោះទេ ប៉ុន្តែមានការទម្លាក់ម៉ាស់អុកស៊ីសែនពីលើពិដាន នៅក្រោយការចុចកូដច្រឡំនោះ។

ម៉ាស់ពាក់អុកស៊ីសែន ធ្លាក់ចុះបង្កភាពភ័យខ្លាចដល់អ្នកដំណើរ

ទីបំផុតជើងហោះហើរ A321 នោះ ត្រូវបង្ខំចិត្តចុះចតជាបន្ទាន់មួយនៅព្រលានយន្តហោះអន្តរជាតិ Noi Bai នាទីក្រុងហាណូយ។ យន្តហោះបានចុះចតដោយសុវត្ថិភាព ហើយមិនមានរបួសអ្នកដំណើរទាំង១៣៥នាក់នោះទេ។

អ្នកនាំពាក្យក្រុមហ៊ុនអាកាសចរ Le Troung Giang បានប្រាប់សារព័ត៌មានថាអ្នកបើកយន្តហោះជនជាតិឆេក Pechanec Marek និងដៃគូ Do Hoang Nam រួមទាំងក្រុមការងារ៥នាក់ទៀត ត្រូវបានដាក់បម្រាមមិនឲ្យបើកបរនោះទេ ដរាបណាការស៊ើបអង្កេតមិនទាន់ចប់សព្វគ្រប់ទេនោះ៕