ស្ងាត់សិល្បៈមួយរយៈធំ ស៊ឹម សុរ៉ាមភូមិ ចេញបើកផលិតកម្ម ផលិតកុនផ្ទាល់ខ្លួន!

2015-01-05 17:21:58
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ស៊ឹម សុរ៉ាមភូមិ ចេញបើកផលិតកម្ម ផលិតកុនដោយខ្លួនឯង ក្រោយពីស្ងប់ស្ងាត់ពីអាជីពជាអ្នកសិល្បៈអស់មួយរយៈធំមក។

ផលិតកម្មថ្មីរបស់លោកមានឈ្មោះថា "MB ភាពយន្ត" ហើយខ្សែភាពយន្តទើបបើកពិធីក្រុងពាលីរសៀលម្សិលមិញគឺរឿង "គ្រូទាយសម័យអ៊ីនធឺណិត"។

តារាសម្ដែង និងចម្រៀងលោក ស៊ឹម សុរ៉ាមភូមិ លើកឡើងថា៖"ថ្ងៃនេះខ្ញុំធ្វើពិធីពីររួមគ្នាតែម្ដង គឺបើកផលិតកម្មថ្មី MB ភាពយន្ត និងរឿងស្នាដៃដំបូងរបស់ខ្ញុំ "គ្រូទាយសម័យអ៊ីនធឺណិត" ហើយក៏ដូចជាការប្រកាសចូលសិល្បៈវិញដែរ"។

លោក ស៊ឹម សុរ៉ាមភូមិ ក្នុងពិធីបើកផលិតកម្មថ្មី និងក្រុងពាលីរឿងម្សិលមិញ

លោកបានបន្តថា កត្តានាំឱ្យលោកមិនមានសកម្មភាពក្នុងវិស័យសិល្បៈមួយរយៈធំកន្លងមក ដោយសារតែខ្លួនរវល់ជាប់រៀនផ្នែកនិពន្ធ និងដឹកនាំរឿង។

និយាយពីការបើកផលិតកម្មថ្មី ក៏ដូចជាការផលិតរឿងដែលជាស្នាដៃនិពន្ធលើកដំបូង តារាសម្ដែងរូបនេះអះអាងថាដំបូងឡើយ MB គឺគ្រាន់តែជាអង្គការតូចមួយបើកក្នុងគោលបំណងដើម្បីស្វែងរកមូលនិធិជួយកុមារក្រីក្រតែប៉ុណ្ណោះ។

ក៏ប៉ុន្តែដោយមានការជួយជ្រោមជ្រែងពីមជ្ឈដ្ឋានខាងក្រៅ ក្នុងការជំរុញឱ្យជួយលើកកម្ពស់វិស័យភាពយន្ត ព្រមទាំងជួយសិល្បករ សិល្បការិនីដទៃទៀត ពុំមានលទ្ធភាព លោកក៏សម្រេចចិត្តបើកជាផលិតកម្ម ផលិតភាពយន្តតែម្ដង។

ទុនក្នុងការចំណាយផលិតរឿង "គ្រូទាយសម័យអ៊ីនធឺណិត" ខាងលើមិនត្រូវបានលោក ស៊ឹម សុរ៉ាភូមិ ប្រាប់ឱ្យដឹងឡើយ។ យ៉ាងណាក៏ដោយលោកលើកឡើងថា តារាសម្ដែងក្នុងខ្សែភាពយន្តនេះគឺសុទ្ធសឹងតែជាសិល្បករ សិល្បការិនីខ្វះខាត ហើយសូម្បីតែតារាធំៗមួយចំនួនចូលរួមសម្ដែង ក៏មិនសូវជាស៊ីថ្លៃនោះទេ ព្រោះជាផលិតកម្មមួយជួយជ្រោមជ្រែងតារាមានភាពខ្វះខាត ជាពិសេសតារាថ្មីៗ។

លោក ស៊ឹម សុរ៉ាមភូមិ រួមនឹងតារាសម្ដែងក្នុងពិធីក្រុងពាលីម្សិលមិញ

ដោយឡែកពាក់ព័ន្ធនឹងការរំពឹងទទួលការចាប់អារម្មណ៍ពីទស្សនិកជនក្នុងការផលិតកម្មខ្សែភាពយន្តបែបកំប្លែងលើកដំបូង តារាសម្ដែង និងជាតារាចម្រៀងខាងលើនិយាយថា មិនទាន់ទាំងផលិតផង រឿងរបស់លោកមានរោងកុននៅភ្នំពេញមួយចង់ទិញរួចទៅហើយ។ ម្យ៉ាងទៀតដោយមានការគាំទ្រពីស្ថានីយទូរទស្សន៍ CTN រួមនឹងមជ្ឈដ្ឋានផ្សេងទៀតលោក ជឿជាក់ថា "គ្រូទាយសម័យអ៊ីនធឺណិត" គឺពិតជាជោគជ័យ។

“ការជួយជ្រោមជ្រែងពី CTN និងរោងកុនមួយត្រៀមទិញ ធ្វើឱ្យតារាសម្ដែងនានារួមទាំងខ្ញុំជាអ្នកនិពន្ធ ដឹកនាំ និងជាចាងហ្វាងផលិតកម្មផង មានកម្លាំងចិត្តតែម្ដង។ ខ្ញុំសន្យាថានឹងមិនធ្វើឱ្យទស្សនិកជនខកចិត្តឡើយ"។ លោក ស៊ឹម សុរ៉ាមភូមិ បន្ថែម។

មុននឹងឈានបើកផលិតកម្មផ្ទាល់ខ្លួនលោក ស៊ឹម សុរ៉ាមភូមិ ធ្លាប់ជាអ្នកគ្រប់គ្រងទូទៅក្នុងផលិតកម្ម មហាហង្ស និងគ្រប់គ្រង Studio ថតខ្លួនឯង។ អ្វីដែលធ្វើឱ្យទស្សនិកជនស្គាល់តារារូបនេះច្រើន ក៏ព្រោះតែលោកធ្លាប់មានព័ត៌មានពីទំនាក់ទំនងស្នេហ៍នឹងតារាចម្រៀងល្បីឈ្មោះរបស់ផលិតកម្មសាន់ដេគឺកញ្ញា សុខ ពិសី៕

អានអត្ថបទបន្ត៖ ឆ្នាំថ្មី ២០១៥ ភ្លាម អេនឌី ត្រូវបារាំងឲ្យភ្លើងខៀវភ្លែត

អានអត្ថបទបន្ត៖ បីសន្លឹកបន្ថែម បង្ហាញពីភាពរីករាយរបស់ Beyonce និង

អានអត្ថបទបន្ត៖ ១០យ៉ាង ដែលអ្នកនឹងភ្ញាក់ផ្អើលចំពោះមង្គលការ ម៉ារីម៉ា