ភ្ជាប់ពាក្យ អ្នកបាល់ទាត់ និង អ្នកសីប៉ាតាក្រ បណ្ដាការ ៨៨០០ ដុល្លារ

2015-01-08 21:56:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំណងស្នេហ៍កីឡាករបាល់ទាត់ សាយ ពិសិដ្ឋ ជាខ្សែការពារក្នុងឈុតជម្រើសជាតិ និង ក្លិបអគ្គស្នងការដ្ឋាននគរបាលជាតិ ជាមួយកីឡាការិនី ងួន ច័ន្ទបូរ៉ាមី សមាជិកក្រុមជម្រើសជាតិសីប៉ាតាក្រ បានឈានដល់ថ្ងៃភ្ជាប់ពាក្យភ្ជាប់សម្ដីហើយ។

គូស្នេហ៍ទាំង ២ ក្នុងពិធីភ្ជាប់ពាក្យព្រឹកមិញ

ពិធីភ្ជាប់ពាក្យតាមប្រពៃណីនេះរៀបចំនៅឡើងនៅគេហដ្ឋានខាងស្រីនៅម្ដុំច្បារអំពៅ នៅព្រឹកថ្ងៃទី ៨ មករា ឆ្នាំ ២០១៤ នេះ ក្រោយអ្នកទាំង ២បង្ហាញឱ្យមហាជនដឹងពីទំនាក់ទំនងរបស់ខ្លួនមុនស៊ីហ្គេមឆ្នាំ ២០១៣ កន្លងទៅ។ កូនកំឡោះ សាយ ពិសិដ្ឋ បានជូនថ្លៃបណ្ដាការចំនួន ៨៨០០ ដុល្លារសហរដ្ឋអាមេរិក ដល់លោកស្រី ប្រាក់ សម្ភស្ស ជាអនាគតម្ដាយក្មេក ខណៈគូស្នេហ៍ជាអ្នកកីឡានេះគ្រោងចូលរោងជ័យនៅចុងខែធ្នូ ឆ្នាំ ២០១៥។

យប់មិញនេះភាគីខាងស្រីបានបង្ហោះរូបថតផ្ទាំងពិធីភ្ជាប់ពាក្យអមដោយពាក្យ៖ «ជំហាននៃសុភមង្គល។ មិនមែនជាមនុស្សស្រីដែលមានសុភមង្គលជាងគេនោះទេប៉ុន្តែជាមនុស្សស្រីម្នាក់ក្នុងចំណោមមនុស្សស្រីទាំងអស់ដែលមានសុភមង្គល»។

Sabay សូមជូនពរឱ្យពួកគេជួបតែសេចក្ដីសុខ សុភមង្គល ជានិច្ចនិរន្ត។ អត្ថបទ៖ ម៉ឺន រស្មី