ច្បាប់ថ្មី តម្រូវឲ្យម្ចាស់ហាងចុះបញ្ជីរថយន្ត និង ធ្វើផ្លាកលេខមុនប្រគល់ឲ្យអ្នកទិញ
- 2015-01-13 17:22:34
- ចំនួនមតិ 0 | ចំនួនចែករំលែក 0
ច្បាប់ថ្មី តម្រូវឲ្យម្ចាស់ហាងចុះបញ្ជីរថយន្ត និង ធ្វើផ្លាកលេខមុនប្រគល់ឲ្យអ្នកទិញ
ចន្លោះមិនឃើញ
“ប្រសិនបើម្ចាស់ហាងនៅតែមិនអនុវត្តន៍ការចុះបញ្ជី និង សុំផ្លាកលេខមុនប្រគល់ឲ្យអ្នកទិញនឹងប្រឈមមុខចំពោះច្បាប់"។ នេះជាការលើកឡើងរបស់ លោក ពៅ ម៉ាលី អគ្គលេខាធិការរង គណៈកម្មាធិការជាតិសុវត្ថិភាពចរាចរណ៍ផ្លូវគោក។
ថ្វីបើច្បាប់ចរាចរណ៍ជើងគោកថ្មីនៅមិនទាន់ចូលជាធរមានក៏ដោយ ក៏លោក ពៅ ម៉ាលី បានបង្ហើបប្រាប់ខ្លះៗថា ច្បាប់នេះចង់ឲ្យមនុស្សគ្រប់គ្នាមានការទទួលខុសត្រូវ និង យានយន្តគ្រប់ប្រភេទមានការចុះបញ្ជីត្រឹមត្រូវដើម្បីនៅក្នុងការគ្រប់គ្រង។ ដូច្នេះហើយច្បាប់ចរាចរណ៍ថ្មី បានតម្រូវឲ្យម្ចាស់ហាងលក់រថយន្តគ្រប់ប្រភេទត្រូវចុះបញ្ជីរថយន្ត និង ធ្វើផ្លាកលេខមុនប្រគល់ជូនអ្នកទិញ។ ប៉ុន្តែ ចំពោះម៉ូតូ គឺមានការយោគយល់ខ្លះ។
“យើងចង់អនុវត្តខ្លាំងចំពោះឡាន ប៉ុន្ដែ ម៉ូតូយើងអាចអនុគ្រោះខ្លះ"។ លោក ពៅ ម៉ាលី និយាយ។ មានការកត់សម្គាល់ឃើញថា កន្លងមក មានរថយន្តមួយចំនួនបានបើកបរនៅលើដងផ្លូវមិនបានបំពាក់ផ្លាកលេខ ហើយខ្លះទៀតអត់ទាន់ទាំងចុះបញ្ជីផង។
លោក ពៅ ម៉ាលី បានប្រាប់ Sabay ថា ដើម្បីរក្សាសណ្ដាប់ធ្នាប់ និង ការទទួលខុសត្រូវច្បាស់លាស់ ច្បាប់ចរាចរណ៍ជើងគោកដែលនឹងចេញក្នុងពេលឆាប់ៗនេះ គឺតម្រូវឲ្យម្ចាស់ហាងបំពេញឯកសារឲ្យបានគ្រប់គ្រាន់មុននឹងប្រគល់ជូនទៅអ្នកទិញ។ ប្រសិនបើម្ចាស់ហាងមិនគោរពតាមច្បាប់នេះទេ គឺ ប្រឈមនឹងរដ្ឋប្បវេណី នៅពេលអ្នកទិញបើកបរនៅលើដងផ្លូវហើយត្រូវនគរបាលចរាចរណ៍ឃាត់ ឬ ត្រួតពិនិត្យរកឃើញថា ពុំមានការចុះបញ្ជី ឬ ពុំមានផ្លាកលេខ។ ដូច្នេះ អ្នកទិញអាចប្ដឹងមកកាន់ម្ចាស់ហាងវិញ ព្រោះម្ចាស់ហាងជាអ្នកទទួលខុសត្រូវលើរឿងនេះ។
"ខ្ញុំចង់បញ្ជាក់ដែរថា អ្នកទិញ និង អ្នកលក់ គឺចចារគ្នាទៅ ហើយបំពេញឯកសារឲ្យរួចរាល់ ហើយអាចចេញផ្លាកលេខបណ្ដោះអាសន្នជូនអ្នកទិញ ដើម្បីជួយសម្រួលពេលវេលាដល់អ្នកទិញផង ព្រោះគ្នាត្រូវរត់ឯកសារខ្លួនឯងពេលខ្លះខ្វះនេះ ខ្វះនោះ អញ្ចឹងបើហាងធ្វើគឺងាយស្រួលណាស់ចំណេញពេលផងដែរ"។ លោក ពៅ ម៉ាលី បន្ថែម។
ច្បាប់ចរាចរណ៍ថ្មី ដែលរង់ចាំតែការឡាយព្រះហស្តលេខាពីព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាហើយនឹងចូលជាធរមាន គឺ នៅត្រង់ មាត្រា ៤៨ បានចែងថា គ្រប់ម្ចាស់ហាងលក់យានគ្រប់ប្រភេទ មានកាតព្វកិច្ចបំពេញបែបបទចុះបញ្ជីយានយន្តសុំប័ណ្ណសម្គាល់យានយន្ត និង សុំផ្លាកលេខសម្គាល់យានយន្តឲ្យបានចប់សព្វគ្រប់មុននឹងប្រគល់ឲ្យអ្នកទិញ។ ការលក់ទិញ ការធ្វើអំណោយ និង រាល់ទម្រង់ផ្សេងទៀតដែលនាំឲ្យមានការផ្លាស់ប្ដូរកម្មសិទ្ធិករនៃយានយន្តត្រូវបំពេញសំណុំបែបបទដើម្បីផ្ទេរកម្មសិទ្ធិយានយន្ត។
ទាក់ទងនឹងបញ្ហានេះ លោក សុក សំអឿន ប្រធានក្រុមអ្នកច្បាប់ការពារសិទ្ធិកម្ពុជា បានបញ្ចេញជាយោបល់ថា ច្បាប់ថ្មីនេះ គឺមានភាពប្រសើរជាងច្បាប់ចាស់ កាលពីឆ្នាំ ២០០៧។ ប៉ុន្ដែ លោកបានសម្ដែងការព្រួយបារម្ភអំពីការអនុវត្តន៍ទៅវិញ។
លោកបាននិយាយថា ច្បាប់ចាស់នៅមាត្រាមួយចំនួននៅមិនទាន់អនុវត្តន៍បាននៅឡើយ ហើយច្បាប់ថ្មីនេះ ក៏នឹងប្រហាក់ប្រហែលគ្នា។ ការណ៍ដែលមិនអាចអនុវត្តន៍ព្រោះតែសព្វថ្ងៃនេះ កង្វះប្រព័ន្ធគ្រប់គ្រងទិន្នន័យរបស់នគរបាលចរាចរណ៍ ហើយកង្វះឆន្ទៈក៏ជាឧបសគ្គផងដែរ។
ទោះបីជាយ៉ាងណា លោក សុក សំអឿន បានលើកឡើងថា ប្រសិនបើអាជ្ញាធរមានសមត្ថកិច្ចអាចអនុវត្តន៍ច្បាប់ចរាចរណ៍ ដែលនឹងចេញក្នុងពេលឆាប់ៗនេះបាន ក៏ជាផ្នែកមួយបង្កើនចំណូលរដ្ឋ ហើយនឹងការទទួលខុសត្រូវខ្ពស់នៅពេលយានយន្តមានគ្រោះថ្នាក់ចរាចរណ៍។
“ខ្ញុំលើកឧទាហរណ៍ថា មាត្រាមួយនៃច្បាប់បាននិយាយថា អ្នកបើកបរមានទោសព្រហ្មទណ្ឌ ឯម្ចាស់យានយន្តមានទោសផ្នែករដ្ឋប្បវេណី ដូច្នេះ កន្លងមកមានអ្នកលក់រថយន្តមួយចំនួនមិនបានផ្ទេរឈ្មោះនោះទេ ចុះពេលមានគ្រោះថ្នាក់ពិបាករកអ្នកទទួលខុសត្រូវព្រោះឈ្មោះចុះបញ្ជីផ្សេង ឯអ្នកលក់ដូររថយន្តបានលក់ជាច្រើនតំណ។ ម្យ៉ាងបើគ្រប់គ្នាលក់បន្តហើយផ្លាស់ប្ដូរឈ្មោះកម្មសិទ្ធិ គឺរដ្ឋចំណេញច្រើនងាយគ្រប់គ្រងផង និង បានចំណូលផង"។
ច្បាប់ថ្មីមាន ១២ ជំពូក និង ៩២ មាត្រា ដែលត្រូវបានរដ្ឋសភាអនុម័ត កាលពីថ្ងៃទី ៥ ធ្នូ ឆ្នាំ ២០១៤ ដោយមានសំឡេងគាំទ្រ ១០៣ លើ ១០៦ សំឡេង និង បានឆ្លងផុតព្រឹទ្ធសភាហើយ ដោយរង់ចាំតែការឡាយព្រះហស្តលេខាពីព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប៉ុណ្ណោះ។
នៅក្នុងច្បាប់ថ្មីដែលត្រៀមនឹងចេញក្នុងពេលឆាប់ៗនេះ គឺ មាត្រា ៤៧ ក៏បានចែងដែរថា គ្រប់យានយន្តនៅពេលដាក់ឲ្យធ្វើចរាចរណ៍នៅលើផ្លូវថ្នល់ត្រូវមានប័ណ្ណសម្គាល់យានយន្ត និង មានពាក់ផ្លាកលេខសម្គាល់យានយន្ត។ គ្រប់យានយន្តត្រូវចុះបញ្ជីផ្ដល់បណ្ណសម្គាល់យានយន្ត និង បំពាក់ផ្លាកលេខសម្គាល់យានយន្តដោយក្រសួងសាធារណៈការ និង ដឹកជញ្ជូន លើកលែងតែយានយន្តដែលជាទ្រព្យសម្បត្តិរបស់រដ្ឋសម្រាប់បម្រើការសន្តិសុខជាតិ សណ្ដាប់ធ្នាប់សង្គម និង ការពារជាតិ គ្រប់គ្រងដោយក្រសួងមហាផ្ទៃ ឬ ក្រសួងការពារជាតិ ត្រូវចុះបញ្ជីយានយន្តផ្ដល់បណ្ណសម្គាល់យានយន្ត និង បំពាក់ផ្លាកលេខដោយក្រសួងមហាផ្ទៃឬក្រសួងពារជាតិ។ យានយន្តដែលពុំទាន់ចុះបញ្ជីយានយន្តសុំបណ្ណសម្គាល់ និង គ្មានផ្លាកលេខ ត្រូវផ្ទុកលើយានដែលមានផ្លាកលេខនៅពេលធ្វើចរាចរណ៍។ ចំពោះរ៉ឺម៉ក ឬ សឺមីរ៉ឺម៉ក និង សុំផ្លាកលេខដូចយានយន្តដែរ៕
អត្ថបទ៖ ប៊ិន ប៊ុណ្ណា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
