សួនសុបិន មិនឆ្ងាយពី ភ្នំពេញ អាចឲ្យអ្នកលម្ហែគ្រប់រូបភាព

2015-01-16 16:24:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្លេចៗស្អែកសៅរ៍ ខានស្អែកអាទិត្យទៀតហើយ! អីចឹងបើប្រិយមិត្តមិនទាន់គិតឃើញថា នឹងត្រូវទៅលម្ហែនៅទីណាទេ សប្តាហ៍នេះ Sabay សូមណែនាំកន្លែងពេញនិយមគ្រាន់បើសម្រាប់មនុស្សគ្រប់វ័យ ពិសេសយុវវ័យតែម្ដង គឺរមណីយដ្ឋាន សួន សុបិន។ សួន សុបិន ជារមណីយដ្ឋានបែបធម្មជាតិមួយ ពិតជាអាចធ្វើឲ្យភ្ញៀវដែលចូលទៅលេងកម្សាន្ត មានអារម្មណ៍ថាប្លែកជាមិនខាន។

សួន សុបិន មានទីតាំងនៅភូមិចុងព្រែក សង្កាត់ព្រែកឯង ខណ្ឌមានជ័យ រាជធានីភ្នំពេញ ដោយធ្វើដំណើរតាមផ្លូវជាតិលេខ១ ចម្ងាយពីភ្នំពេញប្រហែលជា១៤គ.ម ឬចំណាយពេលត្រឹមតែ២៣នាទីតែប៉ុណ្ណោះ។

រមណីយដ្ឋានមួយ នេះមានការពេញនិយមខ្លាំងណាស់ ជាពិសេសគឺថ្ងៃសៅរ៍ អាទិត្យ និងថ្ងៃបុណ្យផ្សេងៗជាដើម មានភ្ញៀវចូលមិនដែលដាច់នោះទេ។ អ្វីដែលជាភាពទាក់ទាញនៃរមណីយដ្ឋានមួយនេះ គឺបរិយាកាសដ៏បរិសុទ្ធ កន្លែងធំទូលាយ លាតសន្ធឹងលើផ្ទៃដីជាងបួនហិចតា មានស្រះទឹកសម្រាប់ជិះទូកលេង ស្ទូចត្រី យកមកធ្វើម្ហូប អាងហែលទឹកសម្រាប់កុមារ និងមនុស្សធំ ព្រមទាំងមានកន្លែងក្មេងលេង សួនផ្កា និងកញ្ចុះនៅអែបមាត់ស្រះដ៏ត្រជាក់ជាច្រើន ទុកឲ្យភ្ញៀវសម្រាកកម្សាន្ត រួមទាំងម្ហូបជាច្រើនមុខទៀត។

ប៉ុណ្ណឹងនៅមិនទាន់អស់ទេ នៅខាងក្នុងក៏មានសួនសត្វ ដែលមានសត្វជាច្រើនដូចជា សត្វអូទ្រីស សត្វក្ងោក សត្វប្រើស និងសត្វជាច្រើនទៀតទុកឲ្យភ្ញៀវទស្សនាកម្សាន្តបំបាត់ភាពអផ្សុក ផងដែរ។ ប្រិយមិត្តអាចស្ទូចត្រីបាន ដោយចំណាយត្រឹមតែ ៣ដុល្លារតែប៉ុណ្ណោះក្នុងមួយម៉ោង ហើយត្រីដែលស្ទូចបាន អាចកុម្ម៉ង់ធ្វើម្ហូបញ៉ាំបានភ្លាមៗទៀតផង៕

La Pergola រ៉ូមេនទិកសម្រាប់មនុស្សជាទីស្រលាញ់នៅ ភ្នំពេញ

ចង់សាក អាចទៅហាងញ៉ាំអាហារលើអាកាសមួួយនេះ