ឆ្នាំមុន NeverCare លេចឈ្មោះនៅខេត្តបាត់ដំបង ចុះឆ្នាំនេះនៅខេត្តណាវិញ?

2014-10-03 23:07:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំមុន ប្រិយមិត្តអ្នកកម្សាន្ត AK ពេញផ្ទៃប្រទេសកម្ពុជាទទួលបានភាពភ្ញាក់ផ្អើលយ៉ាងខ្លាំង នៅពេលដែល Sabay បានបង្ហាញតារាងឈ្មោះក្រុមដែលមានសិទ្ធប្រកួតជម្រុះក្នុងព្រឹត្តិការណ៍ CCC បាត់ដំបង ២០១៣ ដែលក្នុងនោះជើងខ្លាំង AK តំណាងប្រទេសកម្ពុជាគឺក្រុម NeverCare ក៏បានបង្ហាញវត្តមាននៅក្នុងតារាងប្រកួតនោះដែរ។

អាន៖ មូលហេតុសំខាន់ទាំង ៥ ដែលអ្នកមិនគួររំលង CCC 2014

ដំណឹងនេះបានធ្វើឲ្យជើងខ្លាំងជាច្រើនដែលមិនបានចុះឈ្មោះប្រកួតនៅខេត្តបាត់ដំបងមានភាពធូរស្រាលក្នុងចិត្តយ៉ាងខ្លាំង ខណៈជើងខ្លាំងដទៃទៀតដែលបានផុងខ្លួនចុះឈ្មោះប្រកួតនៅខេត្តបាត់ដំបងរួចហើយនោះអស់សង្ឃឹមបាត់បង់ក្ដីសង្ឃឹមក្នុងការគ្រងតំណែងអស់ប្រមាណ ៣០ ភាគរយមុនទៅហើយ។

យ៉ាងណាមិញ មិនមែនអ្នកកម្សាន្តទាំងអស់សុទ្ធតែអស់សង្ឃឹមបាក់ទឹកចិត្តនោះទេ នៅពេលដែលដឹងថាក្រុម NeverCare នឹងបង្ហាញវត្តមានប្រកួតនៅខេត្តបាត់ដំបងនោះ។ ជាក់ស្ដែង តាមរយៈ Comment នៅក្នុងអត្ថបទស្ដីពីការបង្ហាញខ្លួននៅខេត្តបាត់ដំបងរបស់ NeverCare មានអ្នកកម្សាន្តជាច្រើន ជាពិសេសគឺសមាជិក Clan TheJa ផ្ទាល់តែម្ដង មិនទទួលបានភាពតក់ស្លុត ខ្លាចរអា បាក់ទឹកចិត្តប្រកួតឡើយ ដោយបាន Comment ថា "នៅភ្នំពេញមាន NeverCare ប៉ុន្តែនៅបាត់ដំបងឯណេះវិញមាន TheJa"។

TheJa គឺជា Clan ដែលមានឈ្មោះបោះសម្លេងមួយក្នុងចំណោម Clan ធំៗនៅក្នុងពិភពកម្សាន្ត AK ទាំងមូល ហើយត្រូវបានអ្នកកម្សាន្ត AK ស្ទើរតែទាំងអស់ទទួលស្គាល់ថា TheJa គឺជា Clan ដែលមានសមត្ថភាពប្រយុទ្ធខ្លាំងបំផុតប្រចាំខេត្តបាត់ដំបងផងដែរ។

ចាំអ៊ុតទាំងអស់គ្នាមើល៎! តើឆ្នាំនេះ NeverCare នឹងលេចឈ្មោះនៅខេត្តណា? ហើយប្រិយមិត្តទាំងអស់គ្នា ចង់ឲ្យ NeverCare លេចមុខនៅខេត្តណាដែរ?

អត្ថបទ៖ ភីឆាយ