ឡានទាំង៥ប្រភេទដែលមិនគួរទិញជិះ

2015-02-03 18:06:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡានជាយានជំនិះដែលកំពុងពេញនិយមបំផុតនៅលើលោកនេះ។ ទន្ទឹមនឹងនេះដែរ ទោះជាវាល្អយ៉ាងនេះក្ដី ក៏មានប្រភេទឡានខ្លះដែលអ្នកគ្រប់គ្នាមិនគួរទិញជិះដែរ ព្រោះវាអាចបង្កឱ្យមានហានិភ័យខ្ពស់។ ខាងក្រោមនេះ Sabay នឹងបង្ហាញឡាន៥ប្រភេទដែលគេហទំព័រ carophile បានចាត់ទុកថាជាឡានមិនគួរឱ្យទិញជិះនោះទេ ទោះជាវាមានតម្លៃទាបយ៉ាងណាក៏ដោយ៖

១. ឡានម៉ាក Scion IQ

Scion IQ ជាប្រភេទឡានដែលមានតម្លៃថោកបំផុត ហើយវាមានភាពងាយស្រួលខ្លាំងណាស់ក្នុងការបើកបរក៏ដូចជាមិនពិបាករកកន្លែងចតនោះទេ ប៉ុន្តែបើនិយាយពីសុវត្ថិភាពវិញគឺមិនល្អទាល់តែសោះ។ ឡាននេះ ទោះជាមានពោងសុវត្ថិតភាព ដូចឡានដទៃក៏ដោយ ប៉ុន្តែវាមិនគ្រប់គ្រាន់សម្រាប់រក្សាជីវិតរបស់អ្នកទេ ប្រសិនបើមានគ្រោះថ្នាក់អ្វីនោះ។ ហេតុតែនិយាយដូច្នេះព្រោះថាប្រព័ន្ធប្រេងហ្វ្រាំង លំនឹងនៅពេលបើកបរ និងទម្ងន់របស់ឡានគឺមិនឆ្លើយតបនឹងការបើកបរផ្លូវឆ្ងាយ ឬលើផ្លូវប្រភេទhighwayឡើយ។ ប្រសិនបើហ៊ានតែបើកលឿនបន្តិចដឹងតែយ៉ាប់ហើយ។

២. ឡានម៉ាក Smart fortwo

ឡានប្រភេទនេះគឺកាន់តែមិនបាច់និយាយទៀតហើយ ព្រោះ Smart fortwo មានលំនឹងមិនល្អពេលបើកបរ ហើយកម្លាំងខ្សោយណាស់ បើធៀបនឹងរថយន្តនានា។ ដូច្នេះ បើបើកបរនៅលើផ្លូវ highway ជាជម្រើសមិនល្អទាល់តែសោះ ព្រោះលំនឹង និងកម្លាំងម៉ាស៊ីនខ្សោយក្នុងការជែងរថយន្តដទៃសុទ្ធតែជាបញ្ហាប្រឈមរបស់រថយន្តធុនតូច Smart Fortwo។

៣. ឡានម៉ាក Vauxall (Opel) Adam

ឡានម៉ាកនេះមើលទៅស្អាតណាស់ ប៉ុន្តែបើនិយាយពីគុណភាពវិញគឺចប់តែម្ដង ព្រោះមិនអាចបើកលឿនបាននោះទេ។ មួយវិញទៀត ប្រសិនបើអ្នកត្រូវបើកបរនៅពេលយប់វិញ បើជិះឡាននេះគឺមិនអាចទៅណាបាននោះទេ ព្រោះចង្កៀងឡាននេះមិនអាចចាំងពន្លឺបានគ្រប់គ្រាន់ឡើយ។ Vauxall (Opel) Adam ជាឡានជិះបានតែ២នាក់ប៉ុណ្ណោះ។

៤. ឡានម៉ាក Chevrolet Spark

Chevrolet Spark ត្បិតជាឡានរបស់ក្រុមហ៊ុនអាមេរិកក៏ដោយ ប៉ុន្តែវាមិនសក្ដ័សមសម្រាប់ក្រុមគ្រួសារដែលមានសមាជិកច្រើនឬត្រូវធ្វើដំណើរឆ្ងាយៗទេ។ វាមានប្រព័ន្ធការពារសុវត្ថិភាពមែន ប៉ុន្តែប្រព័ន្ធនេះគឺមិនអាចរក្សាផាសុកភាពឱ្យអ្នកបានគ្រប់គ្រាន់នោះឡើយ ប្រសិនបើមានហេតុអាក្រក់កើតឡើងដោយចៃដន្យ។ សំឡេងម៉ាស៊ីនឭខ្លាំង គុណភាពសម្ភារៈតម្លើងនៅមានកម្រិត។ ដូច្នេះប្រសិនបើសម្រេចចិត្តបើកបររថយន្តប្រភេទនេះផ្លូវឆ្ងាយ មិនមែនជាជម្រើសល្អទេ។

៥. ឡានម៉ាក Dacia Duster

Duster ជាប្រភេទរថយន្តSUV ដែលអ្នកមើលឃើញភ្លាមស្រលាញ់ភ្លែតតែម្ដង។ តែបើយើងពិនិត្យវាឱ្យបានម៉ត់ចត់ទៅនោះ អ្នកប្រហែលជាឃើញចំណុចមិនល្អច្រើនហើយ តួយ៉ាងដូចជា មិនមានប្រព័ន្ធគ្រប់គ្រងអាកាសធាតុ ម៉ាស៊ីនត្រជាក់មិនល្អ ហើយ ខាងក្នុងនិងខាងក្រៅឡានគឺហ៊ុមព័ទ្ធដោយប្លាស្ទិកច្រើនពេកដែលបង្កហានិភ័យខ្ពស់ពេលមានគ្រោះថ្នាក់។ មួយវិញទៀតនោះ អាំប៊្រីយ៉ាតឹង ដែលជាហេតុបង្កការលំបាកក្នុងការបើកបរ។

យ៉ាងណាក៏ដោយ នេះគ្រាន់តែជាការកត់សម្គាល់ និងវាយតម្លៃពីសំណាក់បទពិសោធន៍មួយចំណែករបស់គេហទំព័រ Carophile ប៉ុណ្ណោះ។ ដូច្នេះមិនមែន ១០០ភាគរយ រថយន្តណាមួយ ឬទាំងអស់ក្នុងចំណោម ៥ខាងលើ សុទ្ធតែអវិជ្ជមានទាំងអស់ទេ។ មុននឹងអ្នកសម្រេចចិត្តចំណាយលុយទិញ រថយន្តថ្មី ឬមួយទឹកម៉ូដែលណាមួយក្នុងចំណោមខាងលើ គួរគិតពីកញ្ចប់លុយដែលមាន។ បើថវិកាមានកំណត់ ហើយមួយទឹកទៀត ឲ្យទៅរកគុណភាពល្អឥតខ្ចោះ ឬគុណភាពលំដាប់ផ្កាយម៉េចហ្នឹងបាន។

ចុចអាន៖ម៉ូតូម៉ូដែលថ្មីៗឆ្នាំ២០១៥ ឃើញហើយចង់បានអត់?

ប្រែសម្រួល៖ មុន្នី រម្យ ប្រភព៖ carophile