វ៉ាង ស្រីណូ មិនទាន់កក់ក្ដៅនឹងបុរសជំនួញអាណិកជនខ្មែរអាមេរិក

2015-02-05 14:38:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីផ្ដើមអាជីពជាអ្នកសិល្បៈវិញ វ៉ាង ស្រីណូ ក៏ប្រកាសរកបានគូស្នេហ៍ថ្មីភ្លែតជាបុរសជំនួញអាណិកជនខ្មែរ អាមេរិក ក៏ប៉ុន្តែនាងអះអាងថាស្នេហាថ្មីនៅមិនទាន់មានភាពកក់ក្ដៅ ១០០ភាគរយនៅឡើយទេ ដោយសារនៅឆ្ងាយពីគ្នាពេក។

ស្រីណូ ប្រាប់Sabay ក្នុងពិធីថត MV របស់ផលិតកម្មរ៉ៃមាសតោមាសកាលពីដើមសប្ដាហ៍នេះថា៖"ឱ្យច្បាស់មួយរយភាគរយជាមួយគាត់ មិនទាន់កក់ក្ដៅនៅឡើយទេបង ព្រោះអីយើងទាំងពីរនៅឆ្ងាយពីពីគ្នាពេក ចាំមើលពេលទៅមុខបន្តិចទៀតសិន"។

វ៉ាង ស្រីណូ ក្នុងពិធីថត MV របស់ផលិតកម្ម រ៉ៃមាសតោមាស កាលពីដើមសប្ដាហ៍នេះ

តារា sexy រូបនេះបន្តថា នាងស្គាល់បុរសជំនួញអាណិកជនខ្មែរអាមេរិកពីរទៅបីឆ្នាំមកហើយ អំឡុងពេលខ្លួនចេញទៅសម្ដែងនៅអាមេរិកជាមួយសិល្បករ សិល្បការិនីដទៃទៀត។ បុរសជំនួញនោះមានវ័យទើបតែ ៣០ឆ្នាំស្ដើងប៉ុណ្ណោះ ដែលជាអ្នករកបើក Restaurant នៅលើទឹកដីប្រទេសមហាអំណាចមួយនេះ។

បើទោះជាអះអាងថាមិនទាន់ប្រាកដ ១០០ភាគរយពីដំណើរឆ្ពោះទៅកាន់ផ្លូវអាពាហ៍ពិពាហ៍តាមប្រពៃណីក្ដី វ៉ាង ស្រីណូ និយាយថានាង និងគូស្នេហ៍របស់ខ្លួនតែងជួបគ្នាជាញឹកញាប់ ដោយពេលខ្លះនាងទៅលេងដល់អាមេរិក ហើយពេលខ្លះទៀតសង្សាររបស់ខ្លួនមកលេងដល់កម្ពុជា។ ម្យ៉ាងទៀតនៅពេលបច្ចុប្បន្នស្នេហាទាំងពីរគឺមានភាពផ្អែមល្ហែម មិនដែលមានរឿងរកាំរកូសកើតឡើងម្ដងណាឡើយ។

តារាសម្ដែង sexyវ័យ ២៧ឆ្នាំបន្ថែមទៀតថា ប្រសិនបើអ្វីៗមិនមានភាពប្រែប្រួលទេអាពាហ៍ពិពាហ៍របស់នាង និងគូស្នេហ៍ជាបុរសជំនួញអាមេរិកខាងលើ អាចនឹងកើតឡើងក្នុងពេលមួយទៅពីរឆ្នាំខាងមុខទៀត។ ទន្ទឹមនឹងនោះនាងអាចនឹងឈប់ពីសិល្បៈដើម្បីទៅរស់នៅក្រៅប្រទេសជាមួយស្វាមី។

យ៉ាងណាក៏ដោយតារាសម្ដែងទើបឈានជើងប្រឡូកក្នុងវិថីសិល្បៈវិញលើកឡើងទេ ពេលនេះនាងមិនសូវខ្វល់ខ្វាយនឹងរឿងស្នេហ៍ខ្លាំងឡើយ ដោយធ្វើយ៉ាងណាគិតរឿងផ្ដើមអាជីពសិល្បៈជាថ្មីឱ្យបានខ្លាំងជាងមុនដើម្បីបម្រើអារម្មណ៍ទស្សនិកជន។

វ៉ាង ស្រីណូ បានផ្អាកពីសិល្បៈមួយរយៈកាលពីពេលកន្លងទៅ ដោយសាររវល់រកស៊ីខាងក្រៅមិនមានពេលដើម្បីបម្រើសិល្បៈ។ ពេលនេះនាងបានហក់ចូលអាជីពចាស់ឡើងវិញ។ ទន្ទឹមនឹងផ្ដើមអាជីពសិល្បៈជាថ្មីនាងបង្ហើបឱ្យដឹងពីគូស្នេហ៍ថ្មីជាបុរសជំនួញអាណិកជនខ្មែរអាមេរិកតែម្ដង ក្រោយពីចែកផ្លូវគ្នាដើរនឹងគូស្នេហ៍ចាស់ជាអាណិកជនអាមេរិកដូចគ្នា៕

អានអត្ថបទបន្ត៖ កំពូលសិស្ស…ប៉ែន ចំរុង រំលឹកប្រវត្តិធ្លាប់ប្រឡងចម្រៀងយកពិន្ទុពីគ្រូ Lolz

អានអត្ថបទបន្ត៖ ភាពយន្តកំប្លុកកំប្លែងសើចសប្បាយបានមកដល់ទៀតហើយ!

អានអត្ថបទបន្ត៖ សិល្បករជាង ២០០ នាក់ត្រៀមសម្ដែងក្នុងសន្និសីទពិភពលោកស្ដីពីទេសចរណ៍ និង វប្បធម៌ យប់នេះ