គង់ វិច្ឆិកា ស្ទាក់ស្ទើរពីចំណងស្នេហ៍បុរសនាយសមុទ្រ

2015-03-20 17:14:58
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងវ័យក្មេង គង់ វិច្ឆិកា ស្ទាក់ស្ទើរចិត្តនៅឡើយពីចំណងស្នេហ៍ជាមួយបុរសជំនួញម្នាក់នៅសហរដ្ឋអាមេរិក។ ការរារែកចិត្តដោយសារតែនាងអះអាងថា នៅមើលចិត្តគ្នាឱ្យបានច្បាស់សិនមុននឹងឈានទៅដល់ការរៀបអាពាហ៍ពិពាហ៍។

គង់ វិច្ឆិកា បញ្ជាក់ដូច្នេះថា៖ "ខ្ញុំទើបតែស្គាល់គាត់បានជាងមួយឆ្នាំហ្នឹងបង មិនទាន់ដឹងយ៉ាងម៉េចទេរឿងរៀបការ ចាំមើលចិត្តថ្លើមគ្នាឱ្យបានច្រើនសិនទើបសម្រេចចិត្តជាក្រោយ"។

គង់ វិច្ឆិកា ក្នុងពិធីថតចម្រៀងត្រៀមចូលឆ្នាំនៅស្ថានីយទូរទស្សន៍ប៉ុស្ថិ៍លេខ៩ ម្សិលមិញ

តារាសម្ដែងរូបនេះបន្តថា ជំហានធ្វើឱ្យនាងស្គាល់បុរសអាណិកជនអាមេរិក ដោយសារតែការណែនាំពីមិត្តភ័ក្ដិកាលពីជាងមួយឆ្នាំមុន។ ទោះជាយ៉ាងណាតារាវ័យ ២០ ឆ្នាំ ខាងលើ មិនបង្ហើបបុរសនាយសមុទ្រនោះមានមុខរបរជាអ្វីទេ គ្រាន់តែប្រាប់ថា ជាអ្នករកស៊ី និង មានវ័យជាង ៣០ឆ្នាំប្លាយ។

ត្បិតតែស្គាល់គ្នាជិតមួយឆ្នាំមានភាពល្អូកល្អិនមែន ក៏ប៉ុន្តែ គង់ វិច្ឆិកា ប្រាប់ថា នាងមិនទាន់ជឿជាក់ ១០០ ភាគរយទេ ពីជំហានឆ្ពោះទៅកាន់ផ្លូវអាពាហ៍ពិពាហ៍។ មិនប្រាកដទាំងស្រុងដោយនាងសម្អាងទៅលើការរស់នៅឆ្ងាយពីគ្នាពេកអាចនឹងបែកបាក់គ្រប់ពេល។

ប្រការដូច្នេះហើយទើបតារាសម្ដែងកំពុងថតរឿងភាគឱ្យស្ថានីយទូរទស្សន៍ CTN រូបនេះ ខិតខំរកទីផ្សារការងារក្នុងស្រុកឱ្យបានច្រើនតាមរយៈការថតខ្សែភាពយន្ត ក៏ដូចជាដើរម៉ូដ ចៀសវាងការពឹងពាក់លើគូស្នេហ៍នៅឯនាយសមុទ្រ។

“ផ្លូវទៅមុខយើងមើលមិនឃើញអាចរៀបការភ្លាម ហើយក៏អាចដាច់គ្នាភ្លាមដែរ។ ដូច្នេះហើយមានតែយើងខិតខំប្រឹងប្រែងដោយខ្លួនឯងចំពោះការងារនៅក្នុងស្រុក ដោយមិនផ្ដោតតែលើគេម្នាក់ទេ"។ គង់ វិច្ឆិកា បន្ថែមដូច្នេះ។

គង់ វិច្ឆិកា ទើបបោះជំហានចូលសិល្បៈជាង ៣ឆ្នាំប៉ុណ្ណោះ ដោយធ្លាប់ថតខ្សែភាពយន្តបានជិត ៥រឿង តែត្រឹមតួអង្គបន្ទាប់បន្សំទេ។ ឆ្នាំ ២០១៤ កន្លងទៅនាងធ្លាប់ធ្វើខួបកំណើតទ្រង់ទ្រាយធំមួយ ដោយមិត្តសិល្បៈខ្លះអះអាងថា គឺជា ការជួយឧបត្ថម្ភពីគូស្នេហ៍នៅក្រៅប្រទេស ប៉ុន្តែ តារារូបនេះបដិសេធន៍។

នាងទើបតែបង្ហើបពីចំណងស្នេហ៍ជាមួយបុរសនៅអាមេរិកកាលពីម្សិលមិញក្នុងពិធីថតចម្រៀងត្រៀមចូលឆ្នាំនៅ ស្ថានីយទូរទស្សន៍ ប៉ុស្ថិ៍លេខ ៩ ក្រោយចំណងស្នេហ៍ចាប់ផ្ដើមមានពន្លឺខ្លាំង៕

អានអត្ថបទបន្ត៖ TV9 ថត MV ត្រៀមទុក ចូលឆ្នាំខ្មែរ 

អានអត្ថបទបន្ត៖ មាស សុខ សោភា ជួបទុក្ខធំ

អានអត្ថបទបន្ត៖ ថ្ងៃទីពីីរនៃមង្គលការអ្នកឧកញ៉ាគិត ម៉េងចាប់ផ្តើមនៅពេលបន្តិចទៀតនេះ