រឿងពិត! តារាសម្ដែងម្នាក់ ប្រលូកសិល្បៈជិត ១០ ឆ្នាំ មិនដែលបានប្រាក់១រៀល

2014-10-10 15:42:02
ចំនួនមតិ 0 | ចំនួនចែករំលែក 0

ចន្លោះមិនឃើញ

"ខ្ញុំថតអត់ដែលយកលុយគេទេ សំខាន់ឲ្យតែគេហៅ តិចតួច ចាក់សាំងឡាន មិនគ្រប់ផងដឹងយកធ្វើអ្វី ទុកឲ្យអ្នកហៅគ្នាចាយទៅ"។ នេះជាការលើកឡើង របស់តារាសម្ដែង លោក គន់ រៀមរតនៈ ហៅ សាន់ វីហ្សា ដែលលោកបានប្រលូកសិល្បៈជិត ១០ មកហើយ។

ដោយសារតែស្រលាញ់សិល្បៈ និង ចង់ស្គាល់អ្នកសិល្បៈផង វីហ្សា បានចាប់ប្រលូកសិល្បៈនៅឆ្នាំ ២០០៦ តាមរយៈមិត្តភ័ក្ដិ ដោយកាលណោះ តារារូបនេះ បានចូលរួមថត MV ឲ្យផលិតកម្មបុប្ផា។ ក្រោយមកតារារូបនេះ ក៏មានឱកាសថត MV ឲ្យផលិតកម្មផ្សេងៗទៀតជាបន្តបន្ទាប់ ដូចជា ផលិតកម្ម រ៉ូយ៉ា , សួស្ដី , និង ផលិតកម្មរ ម៉ៃសារម៉េត (SM) ជាដើម ប៉ុន្តែការថតនោះ ស្ទើរតែទាំងអស់ គ្រាន់តែជា តារារាំអមឆាកប៉ុណ្ណោះ។

ទោះបីជាត្រឹមតែជា តារារាំអមឆាក យ៉ាងណាក្ដី ប៉ុន្តែ វីហ្សា សប្បាយចិត្តក្នុងការធ្វើ ហើយព្យាយាមជាខ្លាំង ដោយជារឿយៗការថតឲ្យផលិតកម្មខ្មែរក្រៅប្រទេសទាំងនេះ លោកក៏ដូចជា តារាផ្សេងទៀត ត្រូវថត រហូតដល់មួយយប់ទល់ភ្លឺ។ ជានេះទៅទៀតនោះ លោកបានប្រាប់ថា រាល់ការចេញថតម្ដង លោកមិនដែល យកប្រាក់ថ្លៃខ្លួនឡើយ គឺ លោកបានឲ្យអ្នកដែលហៅលោកបន្ត ជាអ្នកទទួលជំនួសទៅវិញ។ "មិនដឹងយកទៅធ្វើមានបានអី បើម្ដងបាន ១៥ ទៅ ២០ ដុល្លារហ្នឹង ទុកឲ្យគ្នាអ្នកហៅ គេបើកយកទៅ និយាយអញ្ចឹងមិនមែនខ្ញុំជា អ្នកមានអីទេ"។

វីហ្សា បញ្ជាក់បន្ថែមថា ដោយសារតែលោក ថតមិនដែលយកប្រាក់ពីអ្នកដឹកនាំបែបនេះ ជាហេតុធ្វើឲ្យលោក មានឱកាសបានថតជាបន្តបន្ទាប់ ប៉ុន្តែ មិនបានតួសម្ដែងសំខាន់ៗឡើយ។

លោកបានឲ្យដឹងទៀតថា ក្រៅពីថតឲ្យផលិតកម្មខ្មែរក្រៅស្រុក លោកក៏ធ្លាប់ថត MV ឲ្យផលិតកម្មក្នុងស្រុកជាច្រើនផងដែរ ជាពិសេសកម្មវិធីចូលឆ្នាំរបស់ស្ថានីយទូរទស្សន៍មួយចំនួន។

វីហ្សាថា អត់សង្ឃឹមទៅថ្ងៃមុខល្បីនោះឡើយ ព្រោះលោកបានដឹងពីសមត្ថភាពខ្លួនឯងច្បាស់ណាស់ ប៉ុន្តែទោះបីជាយ៉ាងណាលោកសប្បាយចិត្ត ក្នុងការធ្វើ ព្រោះអាជីពជាអ្នកសិល្បៈនេះ គឺជា ចំណង់ចំណូលចិត្តរបស់លោក៕

អានអត្ថបទ៖ តារា រាងស្អាត មិនាថ ជា អ្នកធ្វើការលើយន្តហោះតើ! អានអត្ថបទ៖ ណាំ ប៊ុណ្ណារ័ត្ន ចេញពី Town ស្ពាយបង្វេចរកឆ្នាំងចាស់វិញ!

អត្ថបទ៖ ខុត សីហា