គិរីរម្យនឹងប្រែក្លាយជាទីក្រុងទំនើបបែបធម្មជាតិ ក្នុងពេលអនាគត

2015-06-29 18:22:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីក្រុងធម្មជាតិដ៏ទំនើបមួយ នឹងលេចរូបរាងឡើង ក្នុងរយៈពេល ១០ ទៅ ២០ ឆ្នាំ ខាងមុខ ក្នុងបរិវេណឧទ្យានជាតិព្រះសុរាម្រិត កុសមៈ គិរីរម្យ ខេត្តកំពង់ស្ពឺ។

គម្រោងទីក្រុងទំនើបនេះ នឹងធ្វើលើដីសម្បទាន ៧០ ឆ្នាំ ទំហំ ២០០០ ហិតា ក្នុងឧទ្យានជាតិព្រះសុរាម្រិត កុសមៈ គិរីរម្យ ដោយក្រុមហ៊ុនអភិវឌ្ឍន៍ A2A Town (Cambodia) co.,Ltd. របស់ជប៉ុន។

ក្នុងគោលបំណងទាក់ទាញទេសចរ ទីក្រុងទំនើបនេះដែរ នឹងមានសំណង់អគារជាច្រើន ដូចជាផ្ទះវិឡា សាលារៀន សាកលវិទ្យាល័យ មន្ទីរពេទ្យ កន្លែងលេងកីឡា ផ្សារទំនើប សណ្ឋាគារលំដាប់ផ្កាយប្រាំ ផ្ទះសហគមន៍ ផ្ទះមនុស្សចាស់ជរាជាដើម ដោយប្រកាន់គោលការណ៍រក្សាសម្បត្តិធម្មជាតិ។ នេះបើតាមការឱ្យដឹងពីប្រធានផ្នែកលក់ នៃក្រុមហ៊ុនជប៉ុន ថន មល្លិកា។

ឆ្លើយតបនឹងសំណួរថា តើនឹងរក្សាព្រៃបានកម្រិតណាក្នុងការអភិវឌ្ឍន៍នេះ? មល្លិកា បញ្ជាក់ថា អ្វីដែលក្រុមហ៊ុនអភិវឌ្ឍខ្លាំងលើផ្លូវ និង សាលារៀនទៀតសោត ដោយរក្សាឱ្យនៅជាលក្ខណៈធម្មជាតិ "ថៅកែខ្ញុំគាត់ស្រលាញ់ធម្មជាតិ អ៊ីចឹងយើងនឹងធ្វើនៅជាលក្ខណៈធម្មជាតិ"។

ក្នុងពិធីសម្ពោធបើកការដ្ឋានសាងសង់ជាផ្លូវការ ក្នុងតំបន់អភិវឌ្ឍន៍ទេសចរណ៍ធម្មជាតិ របស់ក្រុមហ៊ុនខាងលើ ដែលចូលរួមពី រដ្ឋមន្ត្រីក្រសួងបរិស្ថាន អនុរដ្ឋលេខាធិការក្រសួងទេសចរណ៍ នឹងភាគីពាក់ព័ន្ធផ្សេងទៀត កាលពីថ្ងៃទី២៧ ខែមិថុនា ឆ្នាំ២០១៥ ឯកឧត្ដម វ៉ី សំណាង អភិបាលរងខេត្តកំពង់ស្ពឺ មានប្រសាសន៍ថា លោកលើកទឹកចិត្តឱ្យមានការអភិវឌ្ឍន៍នេះ។

លោកថ្លែងថា "ការអភិវឌ្ឍន៍វិស័យទេសចរណ៍ធម្មជាតិ គឺបានចូលរួមចំណែកក្នុងការថែរក្សា ការពារធនធានធម្មជាតិឱ្យមានក្នុងតំបន់ ព្រមទាំងជួយផ្ដល់ការងារដល់ពលរដ្ឋ កាត់បន្ថតការដកហូតផល អនុផលព្រៃឈើ និង ជួយបង្កើនជីវភាពរស់នៅដល់សហគមន៍ផងដែរ"៕