ឯកឧត្ដម ខៀវ កាញារីទ្ធ បង្ហាញអនុសាសន៍ ៦ ចំណុចសំខាន់ៗ ដើម្បីកាត់បន្ថយគ្រោះថ្នាក់ចរាចរណ៍

2015-07-20 17:46:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបង្ហាញអនុសាសន៍ចំនួន៦សំខាន់ៗ ចូលរួមកាត់បន្ថយគ្រោះថ្នាក់ចរាចរណ៍ និង ឯកឧត្តម បានសំណូមពរ ទៅកាន់បណ្ដាញសារព័ត៌មានឱ្យជួយផ្សព្វផ្សាយ ដើម្បីរំលឹកដល់ពលរដ្ឋ នៅទូទាំងប្រទេសកម្ពុជា។

១. ត្រូវគោរពច្បាប់ស្ដីពីចរាចរណ៍ផ្លូវគោក

-ការគោរពច្បាប់ចរាចរណ៍ត្រូវផ្ដើមចេញពីយើងម្នាក់ៗ។ -ត្រូវចេះអប់រំខ្លួនឯងផ្ទាល់ គ្រួសារ មិត្តភ័ក្ដិ សហការី និងសង្គម។ -ត្រូវចងចាំជានិច្ចថា ត្រូវពាក់មួកសុវត្ថិភាពឱ្យបានត្រឹមត្រូវ រាល់ការធ្វើដំណើរតាមទោចក្រយានយន្ត។ -អ្នកសារព័ត៌មាន ត្រូវធ្វើជាគំរូល្អដល់អ្នកប្រើប្រាស់ផ្លូវនានា។

២. សូមបន្តខិតខំបង្កើនការរាយការណ៍ ការផ្សព្វផ្សាយលើបញ្ហាសុវត្ថិភាពចរាចរណ៍ និងការពាក់មួកសុវត្ថិភាព ជាពិសេសលើការគោរពច្បាប់ ដោយមន្ត្រីចរាចរណ៍។ លោកអ្នកនឹងពិតជាអាចចូលរួមជួយសង្គ្រោះជីវិតមនុស្សបានជាច្រើន តាមរយៈសកម្មភាពដ៏សាមញ្ញនេះ។

៣. ត្រូវបង្កើតការផលិតរឿងខ្លីៗ ឬដាក់បញ្ចូលខ្លឹមសារអប់រំ អំពីបញ្ហាសុវត្ថិភាពចរាចរណ៍ ដើម្បីជាការក្រើនរំលឹកដល់អ្នកទស្សនា ឱ្យកាន់តែមានការយកចិត្តទុកដាក់ លើបញ្ហាសុវត្ថិភាពចរាចរណ៍របស់ខ្លួន សមាជិកគ្រួសារ និងអ្នកដទៃ។

៤. សូមពិនិត្យលទ្ធភាព ដល់ម៉ោងផ្សាយ ឬការចាក់ផ្សាយរឿងអប់រំខ្លីៗ ក្នុងតម្លៃសមស្រប ដើម្បីជំរុញការផ្សព្វផ្សាយអំពីបញ្ហាសុវត្ថិភាពចរាចរណ៍ ឱ្យបានជ្រួតជ្រាបដល់ប្រជាពលរដ្ឋនៅទូទាំងប្រទេស។

៥. ត្រូវណែនាំដល់ពិធីករ ឬពិធីការិនី ប្រចាំស្ថានីយទូរទស្សន៍របស់ខ្លួន ឱ្យចូលរួមធ្វើការផ្សព្វផ្សាយនូវសារអប់រំខ្លីៗ អំពីសុវត្ថិភាពចរាចរណ៍ ជាពិសេសពាក់ព័ន្ធការពាក់មួកសុវត្ថិភាព នៅចុងម៉ោងនៃកម្មវិធីរបស់ពួកគេ។

៦. ត្រូវបង្កើនការផលិតកម្មវិធីជាការពិភាក្សា ដែលមានការចូលរួមពីវាគ្មិនជាអ្នកជំនាញ មកពីស្ថាប័នរដ្ឋាភិបាល និងសង្គមស៊ីវិល ទៅលើប្រធានបទពាក់ព័ន្ធសុវត្ថិភាពចរាចរណ៍ ។

អនុសាសន៍របស់រដ្ឋមន្ត្រីក្រសួងព័ត៌មានរូបនេះ បានធ្វើឡើងក្នុងវេទិកាថ្នាក់និពន្ធនាយកសារព័ត៌មានស្ដីអំពី “រួមគ្នាជំរុញការពាក់មួកសុវត្ថិភាពនៅកម្ពុជា” កាលពីព្រឹកថ្ងៃទី ១៥ ខែ កក្ដដា ឆ្នាំ២០១៥ កន្លងទៅ។ សូមបញ្ជាក់ថា ឆ្នាំ២០១៤ ករណីគ្រោះថ្នាក់ចរាចរណ៍កើតមានចំនួន ៤ ៦៤៥ ករណី ដោយមានជនរងគ្រោះចំនួន ១៥ ៣១៥ នាក់។ ក្នុងចំណោមជនរងគ្រោះសរុប មានអ្នកស្លាប់ចំនួន ២ ២២៦ នាក់ និងរបួសធ្ងន់ ៦ ០០៥ នាក់ (គិតជាមធ្យមភាគមានអ្នកស្លាប់ច្រើនជាង ៦នាក់ និងរបួសធ្ងន់ជិត ១៧នាក់ក្នុងមួយថ្ងៃ)។ ចំនួនអ្នកស្លាប់បានកើនឡើង ១៤% និងអ្នករបួសធ្ងន់ បានកើនឡើង ៦% បើធៀបនឹងឆ្នាំ ២០១៣៕

ចុចអាន៖ មួកសុវត្ថិភាពចំនួន១ម៉ឺនចែកជូនដោយហុងដា

ចុចអាន៖ ប៉ូលិសផាក មានអារម្មណ៍ខ្មាសគេ ច្រើនជាងអស់លុយ?

អត្ថបទ៖ អ៊ុំ សុភក្តិ