ក្រុមម៉ូតូធំមួយទៀតហើយចូលចិត្តធ្វើកម្មវិធីសប្បុរសធម៌ជួយជនក្រីក្រ និង កុមារកំព្រា

2015-08-04 16:33:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួនតែងតែគិតថា អ្នកជិះម៉ូតូធំសុទ្ធតែក្មេងទំនើងអត់ការងារធ្វើ តែផ្ទុយស្រលះពីផ្នត់គំនិតនេះ គឺក្រុមម៉ូតូធំ M-Sport តែងតែចុះធ្វើកម្មវិធីសប្បុរសផ្សេងៗជួយដល់ទុរគតជន ឬ កុមារកំព្រាតាមបណ្ដាខេត្តឆ្ងាយៗ។

ខៀវ បញ្ញារិទ្ធ ប្រធានក្រុមម៉ូតូធំ M-Sport បានឲ្យដឹងថា ថ្មីៗនេះក្រុមលោកបានយកអំណោយទៅជួយដល់ក្មេងៗកំពុងសិក្សាក្នុងសាលាបឋមសិក្សា កកោះ ក៏ដូចជា លោកគ្រូ-អ្នកគ្រូ ឋិតក្នុងស្រុករលាប្អៀរ ខេត្តកំពង់ឆ្នាំង ដោយមានទាំងសម្ភារៈសិក្សា , សម្ភារៈកីឡា និង ថវិកាមួយចំនួនផងដែរ។ ដោយឡែកក្នុងថ្ងៃតែមួយក្រុមម៉ូតូធំ M-Sport បានបន្តដំណើរទៅជួយដល់ក្រុមគ្រួសារកុមារី ចាន់ ម៉ី ដែលកំព្រាឪពុក និង ម្ដាយមានជំងឺរង់ចាំតែថ្ងៃស្លាប់ ហើយក្រុមលោកបានផ្ដល់គ្រឿងបរិភោគផ្សេងៗ អង្ករ និង ថវិកាប្រហែល ២៧០ ដុល្លារ និង ៩៨០០០០ រៀលថែមទៀតផង។

ប្រធានក្រុមរូបនេះបញ្ជាក់ថា ការធ្វើដំណើរទៅគឺមានគ្នាប្រហែល ៥០ នាក់រួមនឹងម៉ូតូធំ ៤០ គ្រឿង ចំណែកថវិកា ឬ អំណោយផ្សេងៗគឺមានការបរិច្ចាគពីសមាជិកក្រុមម្នាក់តាមតិច ឬ ច្រើន និង មួយចំនួនទៀតបានពីការបរិច្ចាគរបស់សប្បុរសជនផ្សេងៗ និង ក្រុមហ៊ុនក្នុងស្រុកមួយចំនួនផងដែរ។

លោក ខៀវ បញ្ញារិទ្ធ បានបន្ថែមថា គោលបំណងដែលលោកបង្កើតក្រុមឡើង គឺចង់បង្ហាញដល់មហាជនទាំងឡាយថា អ្នកជិះម៉ូតូធំដែលមានក្រុមត្រឹមត្រូវ គឺមិនមែនសុទ្ធតែទំនើង តែងតែបង្កបញ្ហាសង្គមឡើយ។ ម្យ៉ាងវិញទៀតក្រុមលោកសុទ្ធតែមានច្បាប់ទម្លាប់ត្រឹមត្រូវ និងតែងតែធ្វើកម្មវិធីសប្បុរសជារើយៗដើម្បីជួយដល់កុមារកំព្រា ឬ កន្លែងណាខ្វះខាតតាមលិទ្ធភាពដែលក្រុមលោកធ្វើបាន។ លើសពីនេះលោកសំណូមពរដល់សប្បុរសជនទាំងអស់បន្តជួយដល់ប្រជាជនខ្មែរយើង ដែលមានការខ្វះខាតតាមតិច ឬ ច្រើន ព្រោះដើម្បីប្រជាជនខ្មែរតែមួយ។

ចុចអាន៖ ក្រុមម៉ូតូធំ MSB មិនព្រងើយកន្តើយលើកម្មវិធីសប្បុរសធម៌

អត្ថបទ៖ ដារ៉ាឆានី