ម៉ូតូចាស់ៗស្ទក់ៗគេធ្វើអីចឹងទេ

2015-08-20 17:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ូតូដែលមានអាយុកាលយូរឆ្នាំ ដែលអ្នកប្រើប្រាស់មួយចំនួនមិនបានថែទាំបានដិតដល់អាចជួបហានិភ័យខ្ពស់ជាពិសេសទៅលើម៉ាស៊ីនដែលបណ្ដាលឲ្យម៉ាស៊ីនមានសភាពស្ទក់ៗ ចុងក្រោយអាចក្លាយជាអេតចាយបើមិនប្រញាប់យកទៅជាងជួសជុលទាន់ពេលវេលា។

លោក វិសាល ជាងជួសជុលម៉ូតូម្តុំទួលសង្កែ បានឲ្យដឹងថា ការពិតទៅស្ទើរតែម៉ូតូចាស់ៗមានបញ្ហាស្ទក់ៗ ឬ ហុយផ្សែងមិនឈប់ទោះដូរប្រេងម៉ាស៊ីនល្អតម្លៃថ្លៃយ៉ាងណាក្តី។ ជាងជួសជុលរូបនេះបន្តថា ចង់ឲ្យម៉ូតូលែងមានបញ្ហាបែបនេះត្រូវពុះម៉ាស៊ីន ដោយការពុះនេះគឺដោះម៉ាស៊ីនមកកោសស្នឹមដែលជាប់យូរឆ្នាំ ឬត្រូវដូរម៉ាញុងចាស់ៗចេញ និងពិនិត្រមើលរ៉ងដែលដាច់។

ការដោះដូរនេះត្រូវប្រើរយៈពេលប្រហែល ១ ព្រឹកទៅ ១ ថ្ងៃ បើមិនរវល់ព្រោះត្រូវចំណាយពេលលើការកោសស្នឹម លាងសំអាតឲ្យបានដិតដល់សម្រាប់ភ្ញៀវ។ សម្រាប់តម្លៃនៃការពុះម៉ាស៊ីនចាប់ពី ៥ ម៉ឺនរៀលឡើងទៅតាមម៉ាស៊ីនដែលមានស្នឹមច្រើន។

វិសាលថា ការធ្វើបែបនេះគឺអាចជួយសម្រួលដល់ម៉ូតូដែលចាប់ផ្ដើមខ្សោយ ឬ មានបញ្ហាបានមួយផ្នែកធំដែរ តែសម្រាប់ការម្ចាស់ម៉ូតូទាំងនេះត្រូវមានការថែទាំជិតដល់ដូចជាការដូរប្រេងម៉ាស៊ីនញឹកញាប់តាមការជិះឆ្ងាយជិត។ មួយវិញទៀតត្រូវប្រើសាំងល្អសម្រាប់ការជួយសម្រួលដល់ម៉ាស៊ីន ព្រោះបើម៉ូតូយើងថ្មីប្រើសាំងអ្វីក៏បានដែរ។