រយៈពេលផ្លាស់ប្ដូរច្រាស និងវិធីដុសធ្មេញត្រឹមត្រូវ

2015-09-21 16:46:44
ចំនួនមតិ 0 | ចំនួនចែករំលែក 0

ចន្លោះមិនឃើញ

សុខភាពមាត់ធ្មេញល្អ គឺរឿងសំខាន់មួយដែលអ្នកត្រូវយកចិត្តទុកដាក់ បើមិនដូច្នេះទេ អ្នកអាចប្រឈមមុខនឹងអាការៈឈឺធ្មេញ និងជំងឺមាត់ធ្មេញមួយចំនួន។ ការប្រើប្រាស់ច្រាសដុសធ្មេញល្អ និងវិធីដុសធ្មេញត្រឹមត្រូវ ចូលរួមចំណែកជួយសុខភាពមាត់ធ្មេញល្អប្រសើរចៀសផុតជំងឺផ្សេងៗ។ សមាគមទន្តពេទ្យសហរដ្ឋអាមេរិក បានណែនាំនូវទម្លាប់ប្រើប្រាស់ច្រាសដុសធ្មេញ និងវិធីដុសធ្មេញដូចខាងក្រោម៖

- ផ្លាស់ប្ដូរក្រោយរយៈពេលបីទៅបួនខែម្ដង

ក្រុមគ្រូពេទ្យធ្មេញបានណែនាំថា រយៈពេលប្រើប្រាស់ច្រាសដុសធ្មេញយ៉ាងយូរចាប់ពីបីទៅបួនខែ គួរប្ដូរវាចេញ ទោះបីវានៅមានសភាពល្អក៏ដោយ ព្រោះថាច្រាសដុសធ្មេញប្រើកាន់តែយូរថ្ងៃ នោះប្រសិទ្ធភាពរបស់វាកាន់តែថយទៅៗ។ ដូចនេះយ៉ាងច្រើនបីទៅបួនខែគួរប្ដូរច្រាសដុសធ្មេញថ្មីជំនួស ដើម្បីសុខភាពមាត់ធ្មេញបានប្រសើរ។

-ច្រាសដុសធ្មេញសឹករិចរិល

ពេលខ្លះ ច្រាសដុសធ្មេញរបស់អ្នកអាចសឹករិចរិលមុនរយៈពេលនៃការណែនាំរបស់ទន្តពេទ្យ ពោលគឺមុនរយៈពេលបីខែ។ ដូចនេះអ្នកក៏គប្បីត្រូវប្ដូរចេញដែរ ព្រោះថាកន្លែងសឹករិចរិលនោះគឺមិនអាចសម្អាតដល់ធ្មេញឲ្យបានស្អាតល្អឡើយ ហើយក៏ពុំសូវមានប្រសិទ្ធភាពកម្ចាត់បាក់តេរីបានល្អនោះដែរ។

*មុនពេលដុសសម្អាតធ្មេញ ដើម្បីប្រាកដថាច្រាសដុសធ្មេញពុំមានបាក់តេរី គួរលាងសម្អាតវាឲ្យបានស្អាតមុនប្រើ។ ក្រោយប្រើរួចក៏គប្បីលាងសម្អាតច្រាសដុសធ្មេញអ្នកជានិច្ច និងទុកដាក់កន្លែងដែលមានខ្យល់ចេញចូល (ជៀសវាងទុកនៅក្នុងប្រអប់ឬបំពង់បិទជិត) ធ្វើដូចនេះវាជួយសុខភាពមាត់ធ្មេញចៀសពីបញ្ហាមួយចំនួនដែលបង្កដោយមេរោគ។

*ដុសធ្មេញជាប្រចាំពីរដងក្នុងមួយថ្ងៃជាមួយសរសៃច្រាសទន់។ ទំហំនឹងរូបរាងច្រាសគួរសមល្មមនឹងមាត់ដែលសម្អាតសព្វទីកន្លែងក្នុងមាត់បាន។