អ៊ុន ម៉ាលីស ស្កាត់ពីស្វាយរៀងមកសិក្សាចម្រៀងមហោរី ព្រោះខ្លាចបាត់បង់

2015-09-22 17:32:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អ៊ុន ម៉ាលីស បានស្កាត់មកភ្នំពេញ ដើម្បីសិក្សាឯកទេសចម្រៀងមហោរីនៅសាកលភូមិន្ទវិចិត្រសិល្បៈ ព្រោះតែខ្លាចបាត់បង់មរតកដូនតាមួយនេះ។

ដាលីស បាននិយាយថា៖ "ឥឡូវគេទៅសម័យអស់ហើយ ខាងបុរាណយើងអត់សូវមានអ្នកចាប់អារម្មណ៍ទេ។ ខ្ញុំរៀនចម្រៀងបុរាណដោយសារចង់រក្សាមរតកដូនតាខ្មែរយើង"។ នាងបន្តថា ការពិតទៅ ចម្រៀងមហោរីជាមូលដ្ឋានគ្រឹះសំខាន់ ប្រសិនបើយល់ដឹងច្បាស់លាស់ នោះការច្រៀងបទសម័យកាន់តែងាយស្រួលមិនខាន។

នាងបញ្ជាក់ម្យ៉ាងទៀតថា គួរតែចូលរួមលើកស្ទួយនូវកេរ្តិ៍មរតកដូនតាបុព្វបុរសបានបន្សល់ទុកឱ្យ ក្នុងការបន្តការអភិរក្ស និងអភិវឌ្ឍន៍សម្រាប់អ្នកជំនាន់ក្រោយបន្តទៀត។ នាងបន្តថា៖ "មិនមែនថា យើងមិនគាំទ្របរទេសទេ ប៉ុន្តែបើគាំទ្រជ្រុលហួសហេតុពេកនាំឱ្យបាត់បង់អ្វីជារបស់ខ្មែរមិនខាន"។ យុវតីរូបនេះសង្ឃឹមថា ពេលណាមួយយុវវ័យជំនាន់ក្រោយនឹងទទួលស្គាល់ ហើយចូលរួមគាំទ្រឡើងវិញមិនខាន។

កូនស្រីកសិករមកពីខេត្តស្វាយរៀងខាងលើ មានបំណងក្លាយជាគ្រូបង្រៀនជំនាញចម្រៀងមហោរីនេះតែម្ដង ដើម្បីមានពេលវេលាយូរអង្វែងក្នុងការបណ្ដុះបណ្ដាលសិស្សបន្តទៀត ដែលជាផ្នែកមួយនៃការចូលរួមថែរក្សាកុំឱ្យបាត់បង់។ ទោះបីជាយ៉ាងណា បច្ចុប្បន្ននាងក៏កំពុងសិក្សាជំនាញស្មូតផងដែរ ព្រោះអាចជាផ្នែកមួយក្នុងការរកចំណូលទៅអនាគត។

បច្ចុប្បន្ន អ៊ុន ម៉ាលីស ក៏ជាសមាជិកម្នាក់ក្នុងក្រុមគោព្រៃផងដែរ នាងត្រូវបានសមាជិកផ្សេងទៀតនាំគ្នាហៅថា ជាគ្រាប់ពេជ្រនៅក្នុងក្រុមចម្រៀង ដែលមាននិន្នាការមិនចម្លងមួយនេះ។ នាងកំពុងទទួលបានការចាប់អារម្មណ៍ពីអ្នកប្រើប្រាស់បណ្ដាញសង្គម Facebook ភាគច្រើនតាមរយៈបទចម្រៀង "បុប្ផាក្រវាន់អង្គរ" និង បទ "ប្រាសាទបុរាណឋានទេសចរណ៍" ជាដើម។

ជាមួយគ្នានោះ ឌីជេ អាចារ្យធំ ជាសមាជិកម្នាក់ផងនោះ បានបញ្ជាក់ថា សំឡេងរបស់យុវតីខាងលើពីរោះ ហើយកម្ររកបានសំឡេងដូចនាង។ ម្យ៉ាងទៀត ម៉ាលីស មានទេពកោសល្យក្នុងការប្រើប្រាស់សំឡេងទៀតផង។ លោកបន្តថា Original Song របស់នាងធ្វើឱ្យអ្នកស្ដាប់មិនសរសើរមិនបានអមដោយសំឡេងពីរោះរណ្ដំ៕

អានអត្ថបទ៖ អ៊ុន សិទ្ធា តារាសម្តែងសោះ ប្រលងគំនូរជាប់លេខ១ប្រចាំប្រទេស និងលេខ៦លើឆាកអន្តរជាតិ

អានអត្ថបទ៖ បេក្ខភាព Cambodian Idol ម៉ៅ ហាជី៖ “ខ្ញុំមិនមែនជាមនុស្សវាយឫកទេ”