ទឹកធ្លាក់ក្បាលឆាយ ជម្រើសចុងក្រោយ តែសប្បាយ

2015-09-25 15:40:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ចេញដំណើរពីភ្នំពេញម៉ោងប្រមាណ ១២ ថ្ងៃត្រង់តាមផ្លូវជាតិលេខ ៣ សំដៅទៅកែប អារម្មណ៍ខ្ញុំមិនសូវស្រួលសោះ ព្រោះតែធុំក្លិនឡានហៃឡែនឌ័រ តែអារម្មណ៍ឈឺក្បាល ចង់ក្អួតចង្អោរ បានរសាយបន្តិច ក្រោយបើកកញ្ចក់ ស្រូបខ្យល់អាកាសបរិសុទ្ធ តាមតំបន់ជនបទ។ ខ្ញុំពិតជាប្លែកភ្នែក ដែលយូរៗទៅម្ដងយ៉ាងដូច្នេះ។

ដល់ឆ្នេរកែបភ្លាម ភាពតានតឹងកាន់តែបាត់បង់ភ្លែត ជំនួសមកវិញដោយភាពស្រស់ស្រាយ ក្រោយឃើញពណ៌ទឹកសមុទ្រ លឺសំឡេងរលកបោកច្រាំងក្ដាំងៗ រួមជាមួយខ្យល់អាកាសបរិសុទ្ធ ខុសប្លែកពីទីក្រុងភ្នំពេញ ដែលពោរពេញដោយភាពអាប់អួរ។ កែបជាគម្រោងទីមួយក្នុងដំណើរកម្សាន្តរបស់ខ្ញុំ និងមិត្តភ័ក្តិ។

គេងមួយយប់ ហើយព្រឹកឡើងឡានហៃឡែនឌ័រ មានមនុស្សមួយក្រុមដែលជាមិត្តភ័ក្ដិចាស់ បានវិលកង់ឆ្ពោះទៅកាន់រមណីយដ្ឋានភ្នំបូកគោ។ ជាថ្មីម្ដងទៀតអារម្មណ៍ ខ្ញុំហាក់មិននៅក្នុងខ្លួន ខណៈមិត្តឯទៀតក៏កំពុងតែផ្ចង់អារម្មណ៍ មើលទេសភាពដែលពុំធ្លាប់ឃើញ។ មែនហើយ! យើងមិនដែលបានមកលេងម្ដងណាឡើយ។ ឡានជាលក្ខណៈគ្រួសារ បានផ្លាស់ទីក្នុងល្បឿនល្មម តាមចង្កេះភ្នំកាច់កុង ឆ្ពោះទៅកាន់កំពូលភ្នំ ដោយមិនដឹងថាខ្ពស់។ តាមផ្លូវខ្ញុំសង្កេតឃើញថា មានព្រៃឈើ ផ្ទាំងថ្មស្រស់ស្អាត ស្លាកសញ្ញា P (កន្លែងចត) ធុងសម្រាម និង ស្លាកហាមមិនឱ្យភ្ញៀវចុះញ៉ាំអាហារតាមផ្លូវជាដើម បើមិនដូច្នេះទេអ្នកនោះនឹងត្រូវពិន័យជាទឹកប្រាក់ តាមការកំណត់។ នេះប្រហែលជាគេខ្លាចខូចសណ្ដាប់ធ្នាប់ នៃឋានសួគ៌មួយនេះ បើតាមខ្ញុំគិត។

តាមផ្លូវខ្ញុំបានឆ្លងកាត់កន្លែងលោកយាយម៉ៅ។ មិននឹកស្មានថា រូបសំណាក់លោកយាយម៉ៅ ធំដល់ម្លឹងសោះ! និយាយទៅមនុស្សមិនដែលធ្លាប់ដើរលេង ឃើញអីក៏ប្លែកដែរ។ យើងបានចូលចតឡាន ដើម្បី អុជធូបបួងសួងសុំសេចក្ដីសុខ និងអ្វីដែលអត់ភ្លេចនោះគឺថតរូបអនុស្សាវរីយ៍។

យើងក៏បានបន្តដំណើរទៅកាន់គោលដៅ។ ដល់ហើយ! ដល់ហើយ! នោះកាស៊ីណូ ស្អាតម៉េស! អូ...មើលអ័ព្ទ! មើលគ្នាអត់ឃើញទេ។ បើអ្នកធ្លាប់ទៅ ច្បាស់ជាមិនគិតដូចខ្ញុំទេ តែសម្រាប់ខ្ញុំ វាពិតជាប្លែក ហើយខ្ញុំសរសើរចំពោះអច្ឆរិយធម្មជាតិដ៏ស្រស់បំព្រងនេះ។ ថតរូបអនុស្សាវរីយ៍រួចហើយ យើងក៏បន្តដំណើរឆ្ពោះទៅកាន់កាស៊ីណួចាស់។ ស្អាតណាស់! តែឡានស្ទើរទៅមុខមិនរួច ព្រោះតែផ្សែងអ័ព្ទក្រាស់ឃ្មឹក រួមទាំងមានភ្លៀងស្រិចៗ ហើយយើងក៏ឈប់ឡានរង់ចាំដល់ភ្លៀងរាំង ទើបនាំគ្នាមួយក្រុមដើរសំដៅទៅអគារបុរាណ ស្ថិតលើកំពូលភ្នំដ៏ខ្ពស់។ អាចនិយាយបានថា រាងកម្សត់បន្តិចព្រោះតែអគារនេះ ស្ទើរតែគ្មានមនុស្សទៅទស្សនាទៅហើយ (ថ្ងៃដែលខ្ញុំទៅ) ក្រៅពីអ័ព្ទក្រាស់ឃ្មឹក ដែលខ្ញុំមិនដែលជួប ខ្ញុំថែមទាំងបានឃើញជ្រោះដ៏ជ្រៅ បើមើលនៅក្រោយអគារ។ សុំបើកវង់ក្រចកបន្តិច បើចង់ទៅលេងលើភ្នំបូកគោ សូមទិញអាហារពីក្រៅឱ្យហើយ ព្រោះទីនោះគ្មានអ្វីលក់ឡើយ ក្រៅពីអាហារនៅក្នុងកាស៊ីណូ។ នេះខ្ញុំសូមរៀបរាប់ត្រួសៗពីសម្រស់របស់បូកគោ…។

មនុស្សអ៊ូអរ សើចសប្បាយ រួមសំឡេងរៃយំអមដោយសំឡេងទឹកជ្រោះឈូឆរ នេះហើយរមណីយដ្ឋាន «ទឹកធ្លាក់ក្បាលឆាយ» ជាជម្រើសចុងក្រោយ បន្ទាប់ពីយើងត្រឡប់មកពីកំពង់សោម តាមបណ្ដោយផ្លូវជាតិលេខបួន។

ទឹកធ្លាក់ក្បាលឆាយ ស្ថិតនៅស្រុកព្រៃនប់ចម្ងាយប្រហែល ៧ គីឡូម៉ែត្រពីក្រុងព្រះសីហនុ ទឹកដីផែដ៏សំខាន់របស់កម្ពុជា ហើយបត់ឆ្វេងប្រមាណជា៦គីឡូម៉ែត្រទើបដល់។

ពិតជាសំបូរមនុស្សមែន! ថ្ងៃនោះខ្ញុំទៅក្រោយថ្ងៃប្រកាសលទ្ធផលបាក់ឌុបមួយថ្ងៃ។ ទាំងប្រុសទាំងស្រីម្នាក់ៗនាំគ្នាសើចសប្បាយ ហាក់ដូចជាពេញចិត្តខ្លាំងនឹងតំបន់ធម្មជាតិមួយនេះណាស់។ អ្នកអង្គុយញ៉ាំអាហារ នាំគ្នាញ៉ាំអាហារ អ្នកព្រោកប្រាជ្ញនាំគ្នាព្រោកប្រាជ្ញ អ្នកលេងបៀជក់ដៃកាប់ការ៉េហាយ រីឯអ្នកជល់កែវជល់មានទំនួលខុសត្រូវ។ អ្នកថតរូបនាំគ្នាថតរូប អ្នកលេងទឹកនាំគ្នាលេងទឹក អស់ហើយអារម្មណ៍តានតឹង តែតឹងអីតែខ្ញុំការ៉េពីរជាន់ហើយ សល់ហាយទៀតឱ្យលុយគេឡើងល្ងឹតមុខ ហឺ...រវល់តែមើលស្រីស្អាត អត់បានស៊ីបៀគេ គេឌុបសង់គេវិលក្បុងទៀត ហាសហា សុំបើកវង់ក្រចកបន្តិចហើយកុំប្រកែប្រកាន់អី!។

ររសៀលយើងអត់ទាន់បានញ៉ាំបាយទេក៏កុម្ម៉ង់អីញ៉ាំ មើលមីនុយ មែនណ៎ថ្ងៃណាមានមនុស្សច្រើនអ្វីៗក៏ថ្លៃដែរ មាន់មួយ ៦ ម៉ឺនរៀល ត្រីរ៉ស់មួយ ៤ ម៉ឺនរៀល កន្លែងអង្គុយ២ម៉ឺន អ្ហើយ! លុយស្ដើងផង ព្រោះអីដើរច្រើនកន្លែង មាន់មួយហូបគ្នា ៦ នាក់ ហាសហាសម្នាក់ៗមើលមុខគ្នាសើច។ បើប្រិយមិត្តចង់ទៅកន្លែងនេះឱ្យអស់លុយតិចទិញអាហារពីក្រៅទៅផង ហើយជួលតែកន្លែងបានហើយ។

ល្ងាចបន្តិចយើងក៏នាំគ្នា ឡើងឡានមកផ្ទះវិញ បើគិតទៅ ដើរលេងគ្នា ៦ នាក់ ឡានខ្លួនឯង បានបួនកន្លែង (ដេកពីរយប់ កែប និងកំពង់សោម) ហើយអស់តិចទៀត ដោយម្នាក់អស់តែ ៥០ ទៅ ៦០ ដុល្លារប៉ុណ្ណោះ ហើយអ្វីដែលយើងទទួលបានគឺបានឃើញតំបន់ទេសចរណ៍ស្អាតៗជាពិសេស «បូកគោ» និង «ទឹកធ្លាក់ក្បាលឆាយ»៕

ចុចអាន៖ រកឃើញ “កន្ធាយក្បាលកង្កែប” ដែលជិតដាច់ពូជ នៅវត្តសសរ ១០០ ខេត្តក្រចេះ

អត្ថបទ៖ អ៊ុំ សុភក្តិ រូបថតទូរសព្ទដៃ

ពាក្យទាក់ទង

តំបន់ទេសចរណ៍ក្នុងស្រុក

អត្ថបទពេញនិយម

ដំណើរជីវិត អ៊ុងអ៊ីង នាយករដ្ឋមន្រ្តីវ័យក្មេងបំផុត ក្នុងប្រវត្តិសាស្រ្ត របស់ប្រទេសថៃ

ពីអាគារចាស់ សល់ពី សម័យប៉ុល ពត ក្លាយទៅជាភូមិគ្រិះ ព័ទ្ធដោយសួនធម្មជាតិ យ៉ាងមនោរម្យ!

កាន់តែទាក់ទាញ ទេសចរណ៍នៅសៀមរាប ម៉តូធំអូសរម៉កបំពាក់បាសធំៗត្រៀមជូនភ្ញៀវដើរលេងកម្សាន្ត

កម្ពុជា ជាទីផ្សារនាំចេញប្រេងឥន្ធនៈធំបំផុតទី២ របស់ប្រទសថៃ

ក្រសួងប្រៃសនីយ៍ និងទូរគមនាគមន៍ ជូនដំណឹងស្ដីពីកំណើនឡើង ការវាយប្រហារសាយប័រ

រូបចម្លាក់ “ព្រះមហាក្សត្រ ព្រះបាទជ័យវរ្ម័នទី៧ ប្រយុទ្ធជាមួយតោ” ដាក់តាំង នៅ Garden by the Bay ដ៏ល្បីល្បាញ នៅសិង្ហបុរី

អត្ថបទថ្មី

ខ្លោងទ្វារខាងត្បូង នៃប្រាសាទតាព្រហ្ម នឹងសម្រេចការជួសជុលទាំងស្រុងនៅឆ្នាំ២០២៦

អន់ចិត្ដ ទប់មាត់លែងបាន ថ្ងៃនេះ ហង្ស ម៉ារីនី បង្ហាញឲ្យអ្នករិះគន់ឃើញ ដោយរំលឹកសកម្មភាពតាំងពី ៩ឆ្នាំមុន

ព្រះពុទ្ធបដិមាដ៏ធំស្កឹមស្កៃ គង់លើផ្កាឈូកនៅកណ្ដាលស្ថានីយ៍អ្នកដំណើរ អាកាសយានដ្ឋានតេជោ

តារាសម្ដែងចិន Huang Xiaoming និងតារាស្រី Ye Ke បានបែកបាក់គ្នាក្រោយបង្កើតទំនាក់ទំនងជាសាធារណៈជិតមួយឆ្នាំ

ហេតុអ្វីរថយន្ដមួយទឹកពីអាមេរិក មិនទទួលបានការអនុវត្តពន្ធគយ ០%?

សម្តេចធិបតី ហ៊ុន ម៉ាណែត ចេញសារគាំទ្រ ដូណាល់ ត្រាំ ជាបេក្ខភាពពានរង្វាន់ណូបែលសន្ដិភាព