បារាំង ចាញ់អង់គ្លេស ២-០ ឯ Martial រងរបួសដើរឈើច្រត់

2015-11-18 17:18:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិបារាំង បានចាញ់ក្រុមម្ចាស់ផ្ទះតោកំណាចអង់គ្លេស ២-០ ក្នុងការប្រកួតមិត្តភាពអន្តរជាតិនៅកីឡដ្ឋាន Wembley យប់មិញ ប៉ុន្តែខ្សែប្រយុទ្ធបារាំង Anthony Martial របស់ក្រុម Manchester United បានរងរបួស រហូតដល់ដើរឈើច្រត់។

២គ្រាប់របស់ម្ចាស់ផ្ទះអង់គ្លេស គឺរកបានដោយការស៊ុតពីចម្ងាយរបស់ខ្សែបម្រើ Dele Alli របស់ក្រុម Tottenham Hot Spur នាទី៣៩ និងខ្សែប្រយុទ្ធ Wayne Rooney ស៊ុត១គ្រាប់ទៀត នៅតង់ទី២នាទី៤៨។

Martial ត្រូវបានដូរចេញនៅនាទី៦៧ ជំនួសដោយ Antoine Griezmann ដោយសាររបួសជើងឆ្វេង ហើយពេលចប់ការប្រកួតគេឃើញកីឡាកររូបនេះ មានរុំបង់ និងដើរកាន់ឈើច្រត់ថែមទៀត ដែលអាចនឹងអវត្តមានពីក្រុមបិសាចក្រហម ក្នុងការធ្វើដំណើរទៅប៉ះ Watford នៅ Premier League ថ្ងៃសៅរ៍ចុងសប្ដាហ៍នេះ។

គ្រូបង្វឹកបារាំងលោក Didier Deschamps បាននិយាយថា៖ "គាត់ឈឺចាប់ខ្លាំងណាស់ ប៉ុន្តែវាគ្រាន់តែជាការភ្លាត់ជើងរបស់គាត់ប៉ុណ្ណោះ។ ភាពធ្ងន់ធ្ងរបញ្ហារបួសរបស់កីឡាករវ័យ១៩ឆ្នាំរូបនេះ មិនទាន់ដឹងច្បាស់នៅឡើយទេ"។

Martial ស៊ុតឲ្យ Man Utd បាន៥គ្រាប់ហើយរដូវកាលនេះ តាំងពីផ្ទេរពី Monaco ទៅ Old Trafford តម្លៃ៣៦លានផោន កាលដើមរដូវកាល ហើយកីឡាករវ័យក្មេងរូបនេះ មានទម្រង់លេងយ៉ាងល្អ ដែលជួយឲ្យ Man Utd ឈរនៅចំណាត់ថ្នាក់លេខ៤ ក្នុងតារាង Premier League ផងដែរ៕