Chelsea ដក Falcao ចេញពីបញ្ជីឈ្មោះលេង UCL ដាក់ Pato ជំនួសវិញ

2016-02-04 21:57:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមតោខៀវ Chelsea បានដកឈ្មោះខ្សែប្រយុទ្ធ Radamel Falcao ចេញពីបញ្ជីកីឡាករ២២នាក់ ដែលមានសិទ្ធលេងនៅ UEFA Champions League រដូវកាលនេះ ដោយដាក់ជំនួសវិញដោយខ្សែប្រយុទ្ធប្រេស៊ីលចំណូលថ្មី Alexandre Pato។

កីឡាករជម្រើសជាតិកូឡុំប៊ី Falcao ស៊ុតបានតែ១គ្រាប់ប៉ុណ្ណោះ ក្នុងការបង្ហាញខ្លួន១១ប្រកួតគ្រប់ការប្រកួតទាំងអស់ឲ្យតោខៀវរដូវកាលនេះ ហើយបច្ចុប្បន្នកីឡាករវ័យ២៩ឆ្នាំរូបនេះ កំពុងមានបញ្ហាញាំញីរបួសកំភួនជើងថែមទៀត។

ចំណែកឯកីឡាករវ័យ២៦ឆ្នាំ Pato ដែល Chelsea ខ្ចីជើងពីក្លឹបប្រេស៊ីល Corinthians រហូតដល់ចប់រដូវកាលនេះ គឺបានធ្វើឲ្យអ្នកចាត់ការ Guus Hiddink មានទំនុកចិត្តជាង ហើយតោខៀវក៏មានបំណងចង់ទិញដាច់តម្លៃប្រហែល៧លានផោន នៅរដូវកាលក្រោយផងដែរ។

ងាកទៅការប្រកួត UEFA Champions League វិញ Chelsea នឹងត្រូវប៉ះ PSG របស់បារាំង នៅវគ្គ១៦ក្រុមចុងក្រោយ ខណៈដែលការប្រកួតជើងទី១ នឹងត្រូវធ្វើឡើងនៅទឹកដីបារាំងមុន នាថ្ងៃទី១៦ ខែកុម្ភៈខាងមុខនេះ៕