កម្ពុជាគ្មានករណីជំងឺ ZIKA ប៉ុន្តែអាមេរិកខាងត្បូង កណ្ដាល កំពុងផ្ទុះខ្លាំង
- 2016-02-18 21:10:56
- ចំនួនមតិ 0 | ចំនួនចែករំលែក 0
កម្ពុជាគ្មានករណីជំងឺ ZIKA ប៉ុន្តែអាមេរិកខាងត្បូង កណ្ដាល កំពុងផ្ទុះខ្លាំង
ចន្លោះមិនឃើញ
ចាប់ពីឆ្នាំ ២០១១ មក ប្រទេសកម្ពុជាមិនទាន់មានករណីឆ្លងជំងឺ Zika នៅឡើយទេ ផ្ទុយពីអាមេរិកខាងត្បូង និងអាមេរិកកណ្ដាល ដែលកំពុងផ្ទុះឡើងខ្លាំងក្នុងពេលថ្មីៗនេះ។ នេះបើតាមការថ្លែងប្រាប់អ្នកសារព័ត៌មានជាង ២០ ស្ថាប័ន របស់លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធប្រឆាំងនឹងជំងឺឆ្លង នៅវិទ្យាស្ថានសុខភាពសាធារណៈ រាជធានីភ្នំពេញ។
ប្រធាននាយកដ្ឋានប្រយុទ្ធប្រឆាំងនឹងជំងឺឆ្លង មានប្រសាសន៍នៅក្នុងសិក្ខាសាលា ផ្សព្វផ្សាយស្ដីពីជំងឺហ្ស៊ីកា ជូនប្រព័ន្ធផ្សព្វផ្សាយ នាព្រឹកមិញថា កម្ពុជានៅមានហានិភ័យប្រឈមទាបនៅឡើយ ប៉ុន្តែកម្ពុជាក៏មិនធ្វេសប្រហែស និងមើលស្រាលចំពោះជំងឺ ដែលពិភពលោក កំពុងចាប់អារម្មណ៍នេះដែរ។
“បច្ចុប្បន្ននេះបើនិយាយពីស្ថានភាព ហានិភ័យយើងទាប ប៉ុន្តែយើងមិនចាំថា លុះត្រាតែខ្ពស់បានយើងត្រៀមទេ។ យើងទាំងអស់គ្នា ត្រូវនាំគ្នាយល់ដឹងទាំងអស់គ្នា ដើម្បីឱ្យបងប្អូន និងក្រសួងសុខាភិបាល រកមធ្យោបាយវិធីទប់ស្កាត់ត្រឹមត្រូវ និងប្រសិទ្ធភាព"។
លោកវេជ្ជបណ្ឌិតបញ្ជាក់ថា ការធ្វើដំណើរពីប្រជាជនពីតំបន់ដែលកើតមានជំងឺនេះ មកកម្ពុជាមានចំនួនតិចតួច និងទាក់ទងជាមួយនឹងពូជមូសខ្លាញី ប៉ុន្តែករណីនេះលោកនឹងធ្វើការស្រាវជ្រាវថាតើ មូលខ្លាញីនៅកម្ពុជាមានការចម្លងទាបជាងឬយ៉ាងណា។
Zika ជាវីរុសចម្លងតាមមូសខ្លាញី ដែលរកឃើញដំបូងលើសត្វស្វានៅប្រទេស Uganda នៃទ្វីបអាហ្វ្រិក ក្នុងឆ្នាំ១៩៤៧ និងលើមនុស្សនៅឆ្នាំ ១៩៥២ នៅ Uganda និងសាធារណរដ្ឋ តង់ហ្សានី។
បើប្រភពដដែលបន្តថា Zika ឆ្លងតាមរយៈមូសខ្លាញីមានផ្ទុកវីរុស Zika និងជាជំងឺឆ្លងពីម្ដាយទៅទារកក្នុងផ្ទៃ។ ក្រោយរីករាលដាលខ្លាំងនៃជំងឺនេះ គេសង្កេតឃើញថា ទារកកើតដែលមកមានក្បាលតូច ទន់ដៃជើង កូនស្លាប់ក្នុងផ្ទៃ ក៏ប៉ុន្តែមិនមានភស្តុតាងជាក់លាក់ណាមួយបញ្ជាក់បាននៅឡើយថា វាមានជាប់ពាក់ព័ន្ធឬអត់ ដោយគេកំពុងធ្វើការសិក្សាបន្ថែម។
ជំងឺ Zika ជាធម្មតាបង្កឱ្យមានជំងឺស្រាលមិនធ្ងន់ធ្ងរ ដែលចេញរោគសញ្ញានៅរយៈពេលពីរឬបីថ្ងៃ ក្រោយមូសខ្លាផ្ទុកវីរុសខាំ។ អ្នកឆ្លងជំងឺនេះ មានរោគសញ្ញាគ្រុនក្ដៅតិចៗ ឈឺក្បាល កន្ទួលក្រហមលើស្បែក។ អ្នកខ្លះក្រហមភ្នែក ឈឺសាច់ដុំ ឈឺសន្លាក់ និងអស់កម្លាំង ហើយវានឹងបាត់ទៅវិញក្នុងរយៈពេល ២ ទៅ ៧ ថ្ងៃ ដោយប្រើថ្នាំបញ្ចុះកម្ដៅ ថ្នាំបំបាត់ការឈឺចាប់ និងផឹកទឹក សម្រាកឱ្យបានច្រើន។ ប៉ុន្តែបើរោគសញ្ញាវិវត្តកាន់តែអាក្រក់ អ្នកជំងឺត្រូវស្វែងរកការផ្ដល់ប្រឹក្សាវេជ្ជសាស្ត្រ ប៉ុន្តែបច្ចុប្បន្ន គ្មានការព្យាបាលជាក់លាក់ ឬវ៉ាក់សាំងការពារជំងឺនេះឡើយ។
ចំពោះវិធីការពារប្រជាពលរដ្ឋ ត្រូវប្រើថ្នាំការពារកុំឱ្យមូសខាំ ស្លៀកពាក់ខោអាវវែងៗ ប្រើសំណាញ់ការពារ បិទទ្វារបង្អួច និងដេកក្នុងមុង។ កុំឱ្យមានទឹកដក់លើគម្របសម្ភារៈ ដែលជាប្រភពជម្រកពងដ៏សំខាន់របស់សត្វមូស។
"សូមប្រជាពលរដ្ឋ និងអ្នកសារព័ត៌មាន តាមដានជាប់ជានិច្ចពីការវិវត្តនៃជំងឺនេះ និងយកតាមប្រភពព័ត៌មានណាច្បាស់លាស់ កុំឱ្យមានការយល់ច្រឡំផ្សេងៗ។ ដូចខ្ញុំបានជម្រាបខាងដើម ជំងឺZika កើតឡើងដោយមូសខ្លាញី ដូច្នេះបើបងប្អូនត្រៀមលក្ខណៈបំបាត់កុំឱ្យមានមូសក្នុងឬជុំវិញផ្ទះ ប្រៀបជាការចូលរួមដ៏ខ្លាំងក្លា។ មិនមែនការពារតែ Zika ទេ តែអាចការពារជំងឺគ្រុនឈាម ដែលជាជំងឺធ្ងន់ធ្ងរជាងជំងឺ Zika ទៅទៀត"។ លោកបញ្ជាក់។
លោកមានប្រសាសន៍បន្តថា មិនមានរបាយការណ៍ដែលថា មនុស្សធំៗស្លាប់ដោយសារជំងឺនេះនៅឡើយទេ ហើយព័ត៌មានដែរថា មានអ្នកស្លាប់ដោយជំងឺនេះតាមការរួមភេទនោះ គេកំពុងធ្វើការតាមដានបន្ថែម។
"ក្នុងនាមខ្ញុំជាជនបង្គោលរបស់ប្រទេសរបស់អង្គការសុខភាពពិភលោក យើងមិនទាន់មានព័ត៌មានថា មនុស្សធំស្លាប់ដោយសារ Zika នៅឡើយទេ ប៉ុន្តែមានការផ្សព្វផ្សាយពីសារព័ត៌មានថា នៅអាមេរិកកណ្ដាល មានអ្នកស្លាប់ដោយជំងឺ Zika តែអង្គការសុខភាពភិភពលោក នៅតែបដិសេធថា មិនមានភស្ដុតាងថា គាត់ស្លាប់ដោយ Zika ទេ"។
សិក្ខាសាលាផ្សព្វផ្សាយស្ដីពីជំងឺ ហ្ស៊ីកា ជូនប្រព័ន្ធផ្សព្វផ្សាយព្រឹកមិញនេះ គឺធ្វើឡើងដើម្បីឱ្យអ្នកសារព័ត៌មាន យល់ដឹងច្បាស់ពីជំងឺ Zika និងផ្សព្វផ្សាយឱ្យបានត្រឹមត្រូវ ដល់ប្រជាពលរដ្ឋបានដឹង។ ម្យ៉ាងដើម្បីត្រៀមលក្ខណៈ ថាតើក្រសួងសុខាភិបាលគួរត្រូវធ្វើយ៉ាងណាពីបញ្ហានេះ។ គួរបញ្ជាក់ថា កម្ពុជាក៏ធ្លាប់មានឆ្លងជំងឺ Zika មួយករណីផងដែរ កាលពីឆ្នាំ ២០១០៕
អត្ថបទ៖ អ៊ុំ សុភក្តិ
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
