មហោស្រព​ភាពយន្ត​អន្តរជាតិ ទីក្រុង​ហុងកុង​លើក​ទី​២០ ហៅ​ថា Hong Kong International Filmart  ២០១៦ ចាប់​ពី​ថ្ងៃ១៤-១៧ មីនា   បាន​បញ្ចប់​ហើយ។ អ្នក​ស្រី ថុង សៀវទៀង​​​​ម្ចាស់​ផលិតកម្ម​ចក្រវាឡ ពេជ្រ​ភាពយន្ត​ ដែល​បាន​អញ្ជើញ​ទៅ​ចូលរួម​ក្នុង​ចំណោម​​ផលិតករ និង​អ្នក​ដឹក​នាំ​រឿង​ខ្មែរ​យើង​ប្រមាណ ២០នាក់​ផ្សេង​ទៀត បាន​ចាត់ទុក​​​ថា មហោស្រព​​ខាង​​លើ​បាន​ធ្វើ​ឲ្យ​អ្នក​ស្រី​ ក៏​ដូច​ជា​ផលិតករ​ខ្មែរ​ផ្សេង​ទៀត កាន់តែ​មាន​​កម្លាំង​ចិត្ត ក្នុង​ការ​ផលិត​ខ្សែភាពយន្ត​ខ្មែរ​បន្ថែម​ទៀត ដើម្បី​ដើរ​ឲ្យ​ទាន់​​​ឆាក​​អន្តរជាតិ។

ថ្លែង​នៅ​អាកាសយានដ្ឋាន​អន្តរជាតិ​ភ្នំពេញ​​ល្ងាច​ម្សិល​មិញ​គ្រា​ដែល​​ត្រឡប់​មក​​ប្រទេស​កំណើត​វិញ  អ្នក​ស្រី ថុង សៀវទៀង បាន​ឲ្យ​ដឹង​ថា ក្នុង​រយៈពេល​៤ថ្ងៃ ដែល​អ្នក​ស្រី​​ ក៏​ដូច​ជា​ក្រុម​ផលិតករ​ខ្មែរ បាន​ទៅ​ចូល​រួម Hong Kong International Filmart ២០១៦ ក្រុម​របស់​អ្នក​ស្រី​បាន​សិក្សា​ស្វែង​យល់ ពី​ទីផ្សារ​ភាពយន្ត​បរទេស​ជា​ច្រើន​​ណាស់ ។ អ្នក​ស្រី​បាន​ឲ្យ​ដឹង​​ថា មាន​ក្រុមហ៊ុន​ច្រើន​ណាស់​បាន​ចូល​មក​ទស្សនា បញ្ជរ (Booth) របស់​កម្ពុជា ហើយ​ពួក​គេ​បាន​សប្បាយ​ចិត្ត​ជា​ខ្លាំង​ដែល​កម្ពុជា​​មាន​វត្តមាន​ក្នុង​មហោស្រព​ខាង​លើ។  ជា​មួយ​គ្នា​នោះ អ្នក​ស្រី ថុង សៀវទៀង ​ក៏​បាន​ស្វែង​រក​ដៃគូ​​អន្តរជាតិ មក​​សហការ​​ជួយ​ផលិត​ខ្សែភាពយន្ត​ខ្មែរ​ផង​ដែរ។ ទោះ​នៅ​មិន​ទាន់​មាន​ចម្លើយ​វិជ្ជមាន​ណា​មួយ ពី​ភាគី​អន្តរជាតិ​ក្ដី​​ចាងហ្វាង​​ផលិតកម្ម​រូប​នេះ​ចាត់​ទុក​ថា មហោស្រព​ខាង​លើ​ ​ជា​ជំហាន​មួយ​ជួយ​ឲ្យ​ផលិតករ​ខ្មែរ​ស្គាល់​ដៃគូ​អន្តរជាតិ កាន់​តែ​ច្រើន។ Hong Kong International Filmart ២០១៦ មាន​ការ​​ក្រុមហ៊ុន​ផលិត​ខ្សែភាពយន្ត​​​ក៏​ដូច​ជា​ផលិតករ​ជា​ច្រើន​លើ​ពិភពលោក​ចូល​រួម ដោយ​នៅ​ក្នុង​នោះ មាន​បញ្ជរ (Booth)ប្រមាណ​ជា៦០០ ​ឯណោះ។ សម្រាប់​ប្រទេស​កម្ពុជា មាន​ផលិតករ អ្នក​ដឹក​នាំ​រឿង​​ ក្រុមហ៊ុន​ ក៏​ដូច​ជា​​​ថ្នាក់​ដឹក​នាំ​ក្រសួង​វប្បធម៌​និង​វិចិត្រសិល្ប សរុប​​ប្រមាណ ២០នាក់​​ក៏​បាន​ចូល​រួម​ផង​ដែរ។ ក្រុមហ៊ុន PUPRUM Entertainment ដែល​​ជា​ក្រុមហ៊ុន​មួយ​ទើប​តែ​បង្កើត ដើម្បី​ធ្វើ​ការ​លើ​ការ​រក​ទីផ្សារ​នាំ​ភាពយន្ត​ខ្មែរ​ទៅ​ក្រៅ​ស្រុក និង CFC(Cambodia Film Commissioner) ក៏​​មាន​វត្តមាន​​ផង​ដែរ។ ដោយ​ឡែក​ភាពយន្ត​ខ្មែរ​ដែល​មាន​វត្ត​មាន​តាំង​បង្ហាញ ​មាន​រឿង “ប៉ុបពី​ទៅ​ហូលីវូដ” រឿង “សិស្ស​ប្អូន​សំណព្វ​ចិត្ត” “មុន​ការ​ដួល​រលំ” “នារី​វេទមន្ត” រឿង “ដុំ​ហ្វីល​ចុង​ក្រោយ” រឿង “Jail Break” រឿង “Final Semester” រឿង" វិស្សមកាល​មរណៈ" និង រឿង"ចាប៉ី​នាគ​ត្រាច់ចរ"ជា​ដើម។

តាម​ការ​លើក​ឡើង លោក ជី សិលា  នាយក​ប្រតិបត្តិ​ក្រុមហ៊ុន Sabay ដែល​បាន​ទៅ​ចូល​រួម​កម្ម​វិធី​នោះ​បាន​ឲ្យ​ដឹង​ថា មិន​មែន​ជា​លើក​ទី១​ទេ​ដែល​ប្រទេស​កម្ពុជា ទៅ​ចូល​​រួមមហោស្រព​ខាង​លើ ពោល​គឺ កម្ពុជា​បាន​ចូល​រួម​មហោស្រព​នេះ តាំង​តែ​ពី​ឆ្នាំ២០១១​មក​​ម្ល៉េះ ប៉ុន្តែ​គ្រាន់​​តែ​ការ​ចូល​រួម​កន្លង​មក កម្ពុជា​ចូល​រួម​ក្នុង​នាម​ជា​អ្នក​ទិញ​កុន​បរទេស​​ដើម្បី យក​មក​ចាក់​​ក្នុង​ប្រទេស​ប៉ុណ្ណោះ។ ​តំណាង​ឲ្យ​ក្រុមហ៊ុន PUPRUM Entertainment លោក ជី សិលា បាន​ចាត់​ទុក​ថា  Hong Kong International Film មាន​ប្រយោជន៍​ច្រើន​ណាស់​ សម្រាប់​ផលិតករ​កម្ពុជា​ក៏​ដូច​ជា​ក្រុមហ៊ុន​ដែល​វិនិយោគ​លើ​វិស័យ​​នេះ ព្រោះ​គ្រប់​គ្នា​ដែល​បាន​ទៅ​ចូល​រួម ​បាន​ឃើញ​ពី​​ឧស្សាហកម្ម​ភាពយន្ត​​អន្តរជាតិ​មាន​ទីផ្សារ​ទូលាយ​បែប​ណា ហើយ​គួរ​​វិនិយោគ​បែប​ណា​ជា​មួយ​គ្នា។ លោក ជី សិលា  ក៏​ដូច​ជា អ្នក​ស្រី ថុង សៀវទៀង សុទ្ធតែ​មាន​បំណង​​ចង់​ឲ្យ​​ផលិតករ​ខ្មែរ​ផ្សេងៗ​ទៀត​​ មាន​ឳកាស​បាន​ទៅ​ចូល​រួម​កម្មវិធី​​បែប​នេះ​ ឲ្យ​បាន​​ញឹកញាប់​​ថែម​ទៀត ដើម្បី​ជា​ចំណេះ​ដឹង​បន្ថែម មក​វិនិយោគ​លើ​វិស័យ​ភាពយន្ត​កម្ពុជា​ឲ្យ​ទាន់​ឆាក​អន្តរជាតិ៕ អត្ថបទ៖ ខុត សីហា