វិទ្យាល័យ ហ៊ុន សែន ស្មាច់ដែង ជាជើងឯកបាល់ទះឆ្នេរខ្សាច់នៅមណ្ឌលខេត្តព្រះសីហនុ

2016-04-15 04:11:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម វិទ្យាល័យ ហ៊ុន សែន ស្មាច់ដែង បានក្លាយជាជើងឯកបាល់ទះឆ្នេរខ្សាច់មណ្ឌលខេត្តព្រះសីហនុ នាល្ងាចថ្ងៃទី ១៤ មេសា នេះក្រោយឈ្នះ ក្រុម Aqua Family Resort ពីរសិតជាប់គ្នាក្នុងលទ្ធផលពិន្ទុ ២១-១២ និង ២១-១៥។ ដូច្នេះរុញឲ្យ Aqua Family Resort ជាប់ចំណាត់ថ្នាក់លេខ២ ខណៈដែល ចំណាត់ថ្នាក់លេខ៣ បានលើ តារាបាល់ទះឆ្លងដែន និង លេខ៣ ស្ទួនបានលើក្រុម បាល់ទះតារាទេសចរណ៍។ ក្រុមចំណាត់ថ្នាក់លេខ ៣ និង លេខ៣ស្ទួន គឺជាក្រុមដែលចាញ់នៅវគ្គពាក់កណ្ដាលផ្ដាច់ព្រ័ត្រ។

ក្រោយរកឃើញ ៤ ក្រុមខ្លាំងនៅមណ្ឌលខេត្តព្រះសីហនុ ថ្ងៃស្អែកទី ១៥ មេសា គឺចាប់ផ្ដើមការប្រកួតបាល់ទះឆ្នេរខ្សាច់ទូទាំងប្រទេសដែលត្រូវបានចម្រាញ់ចេញពី ៤មណ្ឌល ពោល បាត់ដំបង កំពង់ចាម សៀមរាប និង ខេត្តព្រះសីហនុ។ ក្រុមសរុបទាំងអស់ គឺ ១៦ ដែលនឹងបើកការប្រកួតជម្រុះចាប់ពីម៉ោង ៦ ព្រឹកថ្ងៃទី ១៥ មេសា តទៅ ក្នុងដំណើរឆ្ពោះទៅរកទឹកប្រាក់ ៥០០០ ដុល្លារ។ ទីកន្លែងប្រកួតនៅឆ្នេរអូឈើទាល អារីស្តុន ដដែល។

ទន្ទឹមនឹងនេះ កំពូលកីឡាការិនីបាល់ទះសញ្ជាតិហ្វីលីពីន Cha Cruz ក៏នឹងមកចែករំលែកបទពិសោធន៍ដល់កីឡាករខ្មែរផងដែរ។ ប្រិយមិត្តដែលអញ្ជើញមកលេងខេត្តព្រះសីហនុ សូមចូលរួមទស្សនាដោយសេរី។ ក្រោយចប់ការប្រកួតប្រិយមិត្តនឹងបានទស្សនាការប្រគំតន្ត្រីដែលមានវត្តមាន តារាចម្រៀងល្បីកូនកាត់អង់គ្លេស-ថៃ Katreeya English។ ក្នុងនោះអមដោយតារាចម្រៀងខ្មែរជាច្រើនទៀតដូចជា ខេមរៈ សិរីមន្ត ខេម សុខ ស្រីនាង សុខ ពិសី និង ណាំ ប៊ុណ្ណារ័ត្ន។

អត្ថបទទាក់ទងតន្ត្រីបាល់ទះលើឆ្នេរខ្សាច់ឆ្នាំ ២០១៦ សូមចុចត្រង់នេះ... ចុចអាន កំពូលកីឡាការិនីបាល់ទះរបស់ហ្វីលីពីន Cha Cruz នឹងមកបង្ហាញបច្ចេកទេសនៅឆ្នេរអូរឈើទាលអារីស្តុន ថ្ងៃទី ១៥ មេសា ខាងមុខ ចុច អាន តារាចម្រៀងល្បីរបស់ថៃ Katreeya English នឹងចូលរួមសម្ដែងក្នុងកម្មវិធីតន្ត្រីបាល់ទះឆ្នេរខ្សាច់អាន់ឆ័រថ្ងៃទី ១៥ មេសា ខាងមុខ