សាន់ដេថា ចំណូលពី "សង្សារខ្មោច" អាចមានផលប៉ះពាល់ខ្លះៗ

2014-10-27 16:14:37
ចំនួនមតិ 0 | ចំនួនចែករំលែក 0

ចន្លោះមិនឃើញ

តំណាងផលិតកម្ម សាន់ដេនិយាយថា ចំណូលពីរឿង "សង្សារខ្មោច" ត្រៀមនឹងដាក់បញ្ចាំងថ្ងៃ ២៩ ខែតុលាអាចនឹងមានផលប៉ះពាល់ខ្លះៗ។

ការព្រួយបារម្ភបន្ទាប់ពីអ្នកចាត់ការទូទៅផលិតកម្មនេះមើលឃើញពីខ្សែភាពយន្តថៃ ទាំងរឿងភាគ និងរឿងដុំហូរចូលប្រទេស កម្ពុជាពេញទំហឹងឡើងវិញ។

សុខ ពិសី និងនីកូ ក្នុងពិធីសម្ពោធរឿង "សង្សារខ្មោច"

អ្នកចាត់ការទូទៅផលិតកម្មសាន់ដេ លោក ឡាយ សុកចំរើន និយាយថា៖ "មិនទាន់ដឹងយ៉ាងណាទេ ព្រោះយើងមិនទាន់ដាក់បញ្ចាំង។ តែខ្ញុំគិតថាអាចប៉ះពាល់ចំណូលតិចតួច ដោយសារការហូរចូលភាពយន្តថៃ"។

លោក ឡាយ សុកចំរើន បន្តថាមិនត្រឹមតែផលិតកម្មលោកទេ ដែលមានការព្រួយបារម្ភចំពោះការហូរចូលពេញទំហឹងឡើងវិញពីភាពយន្តថៃ ផលិតករទាំងអស់ក្នុងប្រទេស គឺមានការព្រួយបារម្ភគ្រប់គ្នា។

បើទោះជាមានការព្រួយបារម្ភតិចតួចក្ដីអ្នកចាត់ការទូទៅខាងលើនៅតែរំពឹងខ្ពស់ដដែលថា "សង្សារខ្មោច" ដែលចូលរួមសម្ដែងពីតារាល្បីៗក្នុងផលិតកម្មសាន់ដេ។ ជាពិសេសកញ្ញា សុខ ពិសី និងលោក នីកូ នឹងអាចប្រមូលចំណូលបានច្រើនដូចរឿងមុនៗផលិតកម្មនេះបានដាក់បញ្ចាំងលើទីផ្សារ។

លោក ឡាយ សុកចំរើន អ្នកចាត់ការទូទៅផលិតកម្ម សាន់ដេ

ទាក់ទងទៅនឹងបញ្ហានេះ ប្រធាននាយកដ្ឋានភាពយន្ត និង ផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ លោក ស៊ិន ចន្ទសាយ៉ា និយាយថា ក្រសួងវប្បធម៌កំពុងយកចិត្តទុកដាក់ដោយធ្វើយ៉ាងណាយ៉ាងយកចិត្តទុកដើម្បីធ្វើយ៉ាងណាឱ្យកុនខ្មែរបោះជំហានទៅមុខ។

លោកបញ្ជាក់ថា៖"យើងដឹងថាផលិតករគ្រប់រូបពួកគាត់ព្រួយបារម្ភចំពោះការហូរចូលភាពយន្តថៃឡើងវិញ។ ក្រសួងមានគោលការណ៍ដោយមិនឱ្យប៉ះពាល់ខ្លាំងដល់ផលិតករយើងដែលខំផលិតខ្សែភាពយន្តខ្មែរឡើយ"។

លោក ឡាយ សុកចំរើន និយាយថា ក្រសួងពាក់ព័ន្ធត្រូវយកចិត្តទុកដាក់ឱ្យបានខ្ពស់ដើម្បីធ្វើយ៉ាងណាឱ្យវិស័យកុនខ្មែរមានលំនឹងទៅថ្ងៃខាងមុខ។ ជាពិសេសផលិតករខ្មែរគ្រប់រូបមានកម្លាំងចិត្តក្នុងការផលិតរឿងតទៅទៀត។

ស្នាដៃទី ៥ របស់ផលិតកម្មសាន់ដេរឿង "សង្សារខ្មោច" នឹងដាក់បញ្ចាំងលើទីផ្សារនារៀងភាពយន្តពីរព្រមគ្នាគឺរោងភាពយន្ត លុច្ស និង ចេនឡា នៅថ្ងៃទី ២៩ ខែតុលានេះតទៅ៕

អានអត្ថបទបន្ត៖ “Fury”បង្ហាញការប្រយុទ្ធរវាងរថក្រោះអាមេរិក និងអាល្លឺម៉ង់ដ៏សាហាវ

អានអត្ថបទបន្ត៖ តួភេទទី ៣ កាន់តែមានទីផ្សារសិល្បៈ?