រឿងក្ដី ម៉ៅ សុចាន់ធី ប្ដឹងតារាសម្ដែងម្នាក់ ប៉ូលិសចាត់ការស្អែកនេះ

2016-06-15 13:11:48
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងក្ដីប្ដឹងផ្ដល់ របស់អតីតតារាសម្ដែង ម៉ៅ សុចាន់ធី ប្ដឹងទៅលោក រតនៈ វិបុល ឈ្មោះហៅក្រៅ យង់ យ៉េ ដែលជាតារាសម្ដែងដូចគ្នាពីបទ"ជេរប្រមាថ និងគំរាមបាញ់សម្លាប់" នោះ ប៉ូលិសព្រហ្មទណ្ឌនៃស្នងការខេត្តបាត់ដំបង នឹងចាត់ការនៅថ្ងៃ ១៦ ខែ មិថុនា ស្អែកនេះហើយ។

ម៉ៅ សុចាន់ធី និង រតនៈ វិបុល (រូបភាព៖ ផ្ដល់ដោយ ម៉ៅ សុចាន់ធី)

តាមលិខិតកោះហៅដែលចេញដោយស្នងការនគរបាលខេត្តបាត់ដំបង ឧត្ដមសេនីយ៍ត្រី ដេត វណ្ណនី ដែលផ្ដល់ឲ្យដោយអ្នកនាង ម៉ៅ សុចាន់ធី ជាដើមបណ្ដឹង បានឲ្យដឹងថា សមត្ថកិច្ចបានកោះហៅលោក រតនៈ វិបុល ឈ្មោះហៅក្រៅ យង់ យ៉េ ឲ្យមកចូលបំភ្លឺនៅការិយាល័យនគរបាលកម្រិតធ្ងន់ខេត្តបាត់ដំបងនៅថ្ងៃ ១៦ ខែ មិថុនា ឆ្នាំ ២០១៦ខាងមុខនេះ។ យ៉ាងណា មិនដឹងថា ភាគីចុងបណ្ដឹងនឹងចូលខ្លួនតាមការកោះហៅ ឬយ៉ាងណានៅឡើយ។

លោក រតនៈ វិបុល ឈ្មោះហៅក្រៅយង់ យ៉េ ត្រូវបានអតីតអតីតតារាសម្ដែងខាងលើ ប្ដឹងកាលពីថ្ងៃ១៣ ខែ មិថុនា ឆ្នាំ ២០១៦ពីបទ "ជេរប្រមាថ និងគំរាមបាញ់សម្លាប់" ដែលអង្គហេតុកើតតាំងពីដើមឆ្នាំ២០១៥មកម្ល៉េះ។ ខ្លឹមសារនៃពាក្យបណ្ដឹងមានដូចក្នុងខាងក្រោមស្រាប់។

អ្នកនាង ម៉ៅ សុចាន់ធី ដែលទើបមកពីសហរដ្ឋអាមេរិកកាលពីដើមខែនេះ ព្រោះតែរឿងក្ដីក្ដាំខាងលើ បានលើកឡើងថា លោក រតនៈ វិបុល មិនត្រឹមតែជេរប្រមាថអ្នកនាងម្នាក់ទេ គឺជេរអ្នកសិល្បៈជាច្រើនទៀត ជាពិសេសសិល្ប ការិនីជំនាន់អ្នកនាងតែម្ដង។ មូលហេតុដែលនាំឲ្យមានការជេរប្រមាថ និងគំរាមបាញ់សម្លាប់ ក៏ព្រោះតែលោក វិបុល បានចូលមកលូកដៃ ក្នុងជម្លោះមួយរវាង អ្នកនាងជាមួយ មិត្តភ័ក្ដិម្នាក់ទៀតក្នុង Facebook។

អតីតតួសម្ដែងក្នុងរឿង "ទឹករាំផ្ការាំ" ដដែល ជឿជាក់ថា ច្បាប់នឹងផ្ដល់យុត្តិធម៌ដល់រូបនាង ត្បិតភស្តុតាង មានគ្រប់គ្រាន់ល្មមដាក់បន្ទុកភាគីចុងបណ្ដឹងរបស់អ្នកនាងបានហើយ។ ពាក់ព័ន្ធនឹងបញ្ហានេះ លោក រតនៈ វិបុល ភាគីចុងបណ្ដឹង មិនទាន់អាចសុំការអធិប្បាយបានទេគិតត្រឹមរសៀលម្សិលមិញ៕

អត្ថបទ៖ ខុត សីហា

រូបថត និងឯកសារទាំងអស់៖ ផ្ដល់ដោយ ម៉ៅ សុចាន់ធី