ម៉ៅ សុចាន់ធី ៖ តុលាការសម្រេចឃុំខ្លួនជនជាប់ចោទក្រោយព្រមចូលខ្លួន
- 2016-06-17 18:23:07
- ចំនួនមតិ 0 | ចំនួនចែករំលែក 0
ម៉ៅ សុចាន់ធី ៖ តុលាការសម្រេចឃុំខ្លួនជនជាប់ចោទក្រោយព្រមចូលខ្លួន
ចន្លោះមិនឃើញ
រឿងក្ដីប្ដឹងផ្ដល់របស់អតីតតារាសម្ដែង ម៉ៅ សុចាន់ធី ប្ដឹងទៅលោក រតនៈ វិបុល ឈ្មោះហៅក្រៅ យង់ យ៉េ ដែលជាតារាសម្ដែងដូចគ្នាពីបទ "ជេរប្រមាថ និងគំរាមបាញ់សម្លាប់” នោះ ឥឡូវនេះ តុលាការបានចេញដីកាឃុំខ្លួនបណ្ដោះអាសន្នហើយ បន្ទាប់ពីជនជាប់ចោទរូបនេះបានចូលខ្លួន ហើយសារភាពពីទង្វើរបស់ខ្លួន។ នេះបើតាមអ្នកនាង ម៉ៅ សុចាន់ធី ប្រាប់ Sabay នៅព្រឹកនេះ។
អ្នកនាង ម៉ៅ សុចាន់ធី បានឲ្យដឹងថា ប៉ូលិសព្រហ្មទណ្ឌនៃស្នងការខេត្តបាត់ដំបង បានកោះហៅ លោក រតនៈ វិបុល ឈ្មោះហៅក្រៅ យង់ យ៉េ កាលពីម្សិលមិញ ដើម្បីឆ្លើយបំភ្លឺពីបណ្ដឹងខាងលើ។ ក្នុងចម្លើយ លោក រតនៈ វិបុល បានសារភាពថា លោកពិតជាបានជេរប្រមាថ និងគំរាមបាញ់សម្លាប់ ម៉ៅ សុចាន់ធី ពិតប្រាកដមែន ។
ដោយមានភស្តុតាងគ្រប់គ្រាន់ ហើយជនជាប់ចោទបានសារភាពផងនោះ ប៉ូលិសព្រហ្មទណ្ឌនៃស្នងការខេត្តបាត់ដំបងបាន ស្នើសុំដីកាពីព្រះរាជអាជ្ញា ដើម្បីឃុំខ្លួនបណ្ដោះអាសន្ន។ "មេធាវីខលមកខ្ញុំថា គេបញ្ជូនគាត់ទៅព្រះរាជអាជ្ញា ហើយគេឃុំគាត់ខ្លួនបណ្ដោះអាសន្នហើយ"។
យ៉ាងនេះក្ដី លោក ធ្ធាំ ប៉ុណ្ណា ចៅក្រម សាលាដំបូង ខេត្តបាត់ដំបង ដែលទទួលចាត់ការបណ្ដឹងខាងលើបញ្ជាក់ថា ករណីនេះ ព្រះរាជអាជ្ញាមិនទាន់បានចេញដីកាឃុំខ្លួន លោក រតនៈ វិបុល ហៅក្រៅ យង់ យ៉េ នៅឡើយទេ គ្រាន់តែកោះហៅមកចូលបំភ្លឺប៉ុណ្ណោះ។
លោក ចៅក្រមបញ្ជាក់ថា បទ "ជេរប្រមាថ និងគំរាមបាញ់សម្លាប់” ដែលជនល្មើសបានប្រព្រឹត្តិដូចពាក្យបណ្ដឹងខាងលើ មិនអាចឃុំខ្លួនបានទេ ហើយម្យ៉ាងទៀតមិនមែនជាបទល្មើសជាក់ស្ដែង។ លោក ធ្ធាំ ប៉ុណ្ណា សុំមិនអធិប្បាយបន្ថែម មុនពេលតុលាការបន្តនីតិវិធី។
លោក រតនៈ វិបុល ឈ្មោះហៅក្រៅយង់ យ៉េ ត្រូវបានអតីតតារាសម្ដែងខាងលើ ប្ដឹងកាលពីថ្ងៃ១៣ ខែ មិថុនា ឆ្នាំ ២០១៦ ពីបទ “ជេរប្រមាថ និងគំរាមបាញ់សម្លាប់” ក្នុងជម្លោះលើបណ្ដាញ Facebook ដែលអង្គហេតុកើតតាំងពីដើមឆ្នាំ ២០១៥ មកម្ល៉េះ។
តាមបណ្ដឹង ក្រៅពីចង់ឲ្យច្បាប់ផ្ដន្ទាទោស អ្នកនាង ម៉ៅ សុចាន់ទី នៅប្ដឹងទាមទារសំណងជំងឺចិត្ត ៥០០០០ដុល្លារអាមេរិកទៀត។ ប៉ុន្តែ បន្ទាប់ពីជនជាប់ចោទ ព្រមសារភាពទទួលកំហុសរបស់ខ្លួន ព្រមទាំងស្នើសុំឱកាស សំពះសុំអភ័យទោស ជាថ្នូរនឹងការដកពាក្យបណ្ដឹងនោះ ម៉ៅ សុចាន់ធី ប្រាប់ថា អ្នកនាង អាចនឹងទទួលយក ព្រោះក៏មិនចង់វែងឆ្ងាយដែរ។
ដូច្នេះហើយ ថ្ងៃនេះ ឬស្អែក អតីតតារាសម្ដែងរូបនេះ ប្រាប់ថា នឹងចុះទៅខេត្តបាត់ដំបង ដើម្បីបញ្ចប់រឿង ត្បិតអីការដែលអ្នកស្រីខំស្កាត់ពីសហរដ្ឋអាមេរិកមក ក៏ដើម្បីដោះស្រាយរកយុត្តិធម៌ឲ្យខ្លួនឯងដែរ៕
អត្ថបទ៖ ខុត សីហា
រូបថត ៖ ផ្ដល់ដោយ ម៉ៅ សុចាន់ធី