ជីវិតតស៊ូមួយចំណុចស្រដៀងគ្នា ដេវីត និង និរត្តន៍ មុនចូលសិល្បៈ

2016-07-05 13:11:04
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ងួន ចាន់ដេវីត តារាចម្រៀងប្រចាំផលិតកម្ម ហង្សមាស និង កញ្ញា និរត្តន៍ ដែលជាតារាចម្រៀងប្រចាំផលិតកម្ម ថោន មុននឹងក្លាយជាចំណែកមួយរបស់ផលិតកម្ម អ្នកទាំងពីរ មានប្រវត្តិតស៊ូលំបាករៀងៗខ្លួន។ តែការតស៊ូរបស់អ្នកទាំងពីរមានចំណុចដែលស្រដៀងគ្នាមួយ គឺធ្វើការនៅហាងទូរស័ព្ទ។

១. ងួន ចាន់ដេវីត មុននឹងក្លាយជាតារាចម្រៀងប្រចាំផលិតកម្ម ហង្សមាស ដំបូងឡើយលោកបានបង្កើតក្រុមរាំមួយនៅខេត្ត បាត់ដំបង អស់រយៈពេលប្រមាណជា៣ឆ្នាំដោយពុំបានទទួលកម្រៃអ្វីនោះទេ រហូតដល់ពេលមួយ លោកបានសម្រេចចិត្តបោះបង់ការសិក្សាក្នុងថ្នាក់ទី១២ ដោយមូលហេតុគ្រួសារជួបការលំបាក ដេវីត ក៏បានមកធ្វើការនៅភ្នំពេញ។ ការងារដំបូងលើដីរាជធានី ដេវីត បានចាប់អាជីពជាអ្នកបញ្ចូលបទភ្លេងទូរស័ព្ទនៅផ្សារ ឃ្លាំងរំសេវ អស់រយៈពេលប្រមាណជា២ឆ្នាំ រហូតបានជួបអ្នកនាង ពេជ្រ សោភា ទើបលោកក្លាយជាតារាចម្រៀងដូចសព្វថ្ងៃ។ នេះបើតាមលោក រៀបរាប់នៅក្នុងកម្មវិធីកម្សាន្តរបស់ទូរទស្សន៍ PNN៕

២. និរត្តន៍ ៖ ម្ចាស់បទ "ស៊ីចេកផឹកទឹក" ក៏មិនខុសពី ដេវីត ប៉ុន្មានដែរ ដោយដំបូងឡើយ ទម្រាំបានក្លាយជាចំណែកមួយរបស់ផលិតកម្ម ថោន សព្វថ្ងៃ និរត្តន៍ ប្រាប់ថា កាលពីអាយុប្រមាណជា ១៦ ឆ្នាំនាងបានចាកចេញពីខេត្ត កំពង់ចាម មកទីក្រុងភ្នំពេញ គោលបំណងដើម្បីទៅរកការងារធ្វើនៅតាមបណ្ដារោងចក្រ ដើម្បីរកកម្រៃជួយផ្គត់ផ្គង់គ្រួសារ តែជាក់ស្ដែង នាងមិនបានធ្វើនោះឡើយ ដោយសារមិនទាន់គ្រប់អាយុ។

មិនបញ្ចប់ប៉ុណ្ណេះទេ និរត្តន៍ បានរកការងារបន្ត ដោយធ្វើជាអ្នកលក់គ្រឿងបន្លាស់ទូរស័ព្ទក្នុងហាងមួយ រហូតដល់ក្នុងឆ្នាំ ២០១៤ នាងបានដាក់ពាក្យប្រឡងក្នុងកម្មវិធីមួយដែលរៀបចំដោយក្រុមហ៊ុន ថោន ទីបំផុតនាងបានក្លាយពិធីការីនីប្រចាំវិទ្យុ ថោន ហើយបន្តមកទៀត ក៏បានវិវត្តន៍ខ្លួន មកជាតារាចម្រៀងដូចបច្ចុប្បន្នតាមរយៈកម្មវិធីប្រឡងមួយរបស់វិទ្យុថោន៕