៧យ៉ាងមិនគួរធ្វើលើ Facebook ក្រោយបែកបាក់ស្នេហា

2016-08-16 21:50:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បែកបាក់ស្នេហាគឺជារឿងឈឺចាប់មួយទៅហើយ ប៉ុន្តែបើសិនជាអ្នកត្រូវឃើញមុខ ឬមានទំនាក់ទំនងជាមួយសង្សារចាស់អ្នក ឬមិត្តស្រីថ្មីរបស់គេរាល់ថ្ងៃតាមបណ្ដាញសង្គម Facebook ទៀតនោះ វានឹងធ្វើឲ្យបញ្ហាកាន់តែស្មុគស្មាញ។ សម្រាប់នារីដែលខូចចិត្តដោយសារបាត់បង់ស្នេហា និងចង់កាត់ចិត្តពីគេឲ្យបានឆាប់ ខាងក្រោមនេះគឺជារឿង៧យ៉ាងដែលអ្នកមិនគួរធ្វើលើបណ្ដាញសង្គម៖

១. កុំតាមដាន ឬចូលមើល Profile គេ

ខណៈដែលអ្នកកំពុងកើតទុក្ខ ក៏ដូចជាចង់បំភ្លេចគេឲ្យបានឆាប់ យកល្អមិនគួរចង់ដឹងចង់ឮអ្វីថ្មីៗកើតឡើងពាក់ព័ន្ធនឹងគេឡើយ។ គួរប្លុកគេចោល ហើយឈប់លួចតាមដាន សកម្មភាពរបស់គេដោយប្រើ គណនីរបស់អ្នកដទៃ។

២. កុំបង្ហោះអ្វីពាក់ព័ន្ធនឹងគេ

ប្រសិនបើអ្នកជាមនុស្សដែលចូលចិត្តសរសេរសារអាថ៌កំបាំង ឬ Drama លើ Facebook គួរតែសម្រាកសិននៅពេលបែកបាក់ស្នេហា។ ត្រូវចាំថា សង្សារចាស់ឬមិត្តរួមគ្នារបស់អ្នកអាចដឹងថាអ្នកទើបតែបែកគ្នា ហើយសារនោះសំដៅលើអ្វី។ ប្រសិនបើអ្នកទ្រាំមិនសរសេរអ្វីពីគេមិនបាន គួរតែបិទ Account ចោលសិន ខណៈដែលអ្នកកំពុងខូចចិត្ត ដើម្បីចៀសវាងបង្ហោះអ្វីដែលធ្វើឲ្យអ្នកស្ដាយក្រោយនៅពេលក្រោយ។

៣. កុំបង្ហោះអ្វីដើម្បីឲ្យគេអាណិត

បង្ហោះពីអារម្មណ៍អ្នកដែលត្រូវគេបោះបង់ចោល គេឈប់ Care គេក្បត់ ...ល ដើម្បីទាក់ទាញការអាណិតពីមិត្តភ័ក្ដិនិង Follower ទាំងឡាយ គឺមិនមែនជារឿងល្អឡើយ តែវាហាក់ដូចជាអ្នកកំពុងបង្ហាញពីភាពទន់ខ្សោយរបស់អ្នក ហើយបើទោះជា Status អ្នកជោគជ័យមានអ្នក comment បង្ហាញការអាណិតច្រើន ក៏មិនប្រាកដថាអ្នកទាំងអស់នោះមិននិយាយដើមអ្នកពីក្រោយខ្នងដែរ។

៤. កុំព្យាយាមប្រាប់មិត្តភ័ក្ដិក្នុង Facebook របស់អ្នកថាគេនោះអាក្រក់យ៉ាងណា

និយាយអាក្រក់ពីគេនឹងមិនអាចជួយអ្វីអ្នកបានឡើយ ហើយក៏មិនអាចឲ្យអ្នកមានអារម្មណ៍ធូរស្បើយនៅពេលក្រោយដែរ។ ជំនួសមកវិញអ្នកគួរបង្ហោះគម្រោងថ្មីៗរបស់អ្នកដើម្បីស្វាគមន៍ជីវិតនៅលីវ ព្រោះវានឹងអាចឲ្យអ្នកមានអារម្មណ៍ថាកាន់តែរឹងមាំ និងជំរុញខ្លួនឯងឲ្យក្លាយជាមនុស្សដែលខ្លួនឯងចង់បាន បើទោះជាមានឬគ្មានគេក្នុងជីវិតក៏ដោយ។

៥. កុំផ្ញើ Friend Request ទៅសង្សារថ្មីរបស់ Ex

ការបែកបាក់របស់អ្នកអាចបណ្ដាលមកពីជនទីបី។ អ្នកប្រហែលជាគិតថាបើក្លាយជា Friend ជាមួយសង្សារថ្មីរបស់គេលើ Facebook ហើយបញ្ចេញកំហឹងទាំងអស់ដាក់នាង ប្រហែលជាល្អ ប៉ុន្តែការពិតវាមិនល្អឡើយ។ ប្រសិនបើអ្នកមិនចង់មានឈ្មោះជាអតីតមិត្តស្រីដ៏អន់ម្នាក់ គួរកុំផ្ញើ Friend Request ទៅស្រីថ្មីរបស់គេ ទោះជាអ្នកខឹង ឬចង់ដឹងពីគេយ៉ាងណាក៏ដោយ។

៦. កុំផ្ញើសារគំរាមគេ

ការបែកបាក់ស្នេហាមិនត្រឹមតែធ្វើឲ្យអ្នកកើតទុក្ខ តែវាក៏មានឥទ្ធិពលធ្វើឲ្យអ្នកមានអារម្មណ៍ពុះកញ្ជ្រោលខ្លាំងរហូតគិតថាចង់វាយមនុស្សគ្រប់គ្នាដែលនៅនឹងមុខ។ ទោះយ៉ាងណា អ្នកត្រូវទប់អារម្មណ៍ មិនត្រូវបញ្ចេញសាគំរាមធ្វើបាបសង្សារចាស់ ឬក៏មិត្តស្រីថ្មីរបស់គេឡើយ ព្រោះវានឹងធ្វើឲ្យអ្នកក្លាយជាមនុស្សអាក្រក់មួយរំពេច។

៧. កុំប្ដូរ Relationship Status ទៅជា "It's Complicated”

ការទទួលស្គាល់ថាខ្លួនឯងក្លាយជាមនុស្សគ្មានគូ (Single) អាចពិបាកបន្តិចនៅពេលដំបូង ប៉ុន្តែមិនមែនមានន័យថាអ្នកត្រូវកុហកខ្លួនឯងដើម្បីលួងអារម្មណ៍បែបនេះទេ។ ប្រសិនបើអ្នកអាចទទួលស្គាល់ការពិតបានកាន់តែឆាប់ អ្នកនឹងអាចបន្តដំណើរទៅមុខកាន់តែឆាប់ដូចគ្នា។

បណ្ដាញសង្គមអាចធ្វើឲ្យការបែកបាក់ស្នេហាកាន់តែស្មុគស្មាញ ប៉ុន្តែប្រសិនបើអ្នកដឹងច្បាស់ថាខ្លួនឯងជានរណា អ្នកនឹងអាចក្លាយជាមនុស្សកាន់តែជោគជ័យ និងដោះស្រាយជាមួយភាពឈឺចាប់ដោយវិធីសាស្ត្រចាស់ទុំ ៕

ចុចអាន៖វិធី១០យ៉ាង ធ្វើឲ្យមិត្តប្រុសកាន់តែសប្បាយចិត្ត

ចុចអាន៖៩ចំណុចបើបុរសគ្មាន បញ្ជាក់ថាគេមិនបានស្រលាញ់អ្នកពិតប្រាកដ

ប្រែសម្រួល៖ វ៉ាន់ថន ប្រភព៖youqueen