CBL៖ បីក្រុមឡើងវគ្គ១/២ តែ Sabay មូសខ្លា និង Emperors ត្រូវកាត់ក្ដីប្រកួតទី៣

2014-11-03 16:52:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីកបាល់បោះវគ្គ៨ក្រុមចុងក្រោយជើងទី២កាលពីចុងសប្ដាហ៍កន្លងទៅនេះបីក្រុមរួមមាន Davies Paints, Pate 310 និង Mekong Tigers សុទ្ធតែបានកក់កៅអីសម្រាប់វគ្គ៤ក្រុមចុងក្រោយរួចរាល់អស់ហើយ លើកលែងតែ Sabay Tigers Mosquitoes (Sabay មូសខ្លា) និង Emperors ប៉ុណ្ណោះដែលត្រូវកាត់សេចក្ដីនាប្រកួតទី៣នៅចុងសប្ដាហ៍នេះ។

គូដំបូងគេកាលពីរសៀលថ្ងៃសៅរ៍ក្រុម Davies Paints បានបន្តយកឈ្នះលើក្រុម CCPL Warriors ក្នុងលទ្ធផលលើសលប់ ១១៦ ទល់នឹង ៦៧។ ការប្រកួតនេះកីឡាករ CCPL Warriors ហាក់ដូចជាបាក់ទឹកចិត្តដោយកីឡាករភាគច្រើនបានមកយឺតពិសេសកីឡាករកម្ពុជា ហើយក្រុមមួយនេះត្រូវចាប់ផ្ដើមលេងដោយមានគ្នាត្រឹមតែ៤នាក់ ដែលធ្វើឲ្យ Davies Paints កាន់តែងាយស្រួលរកគ្រាប់បាល់។

ដោយឡែកគូបន្ទាប់ Sabay មូសខ្លា មិនអាចកក់កៅអីសម្រាប់៤ក្រុមចុងក្រោយបាននោះទេ បន្ទាប់ពីត្រូវ Emperors វាយបកយកឈ្នះនៅម៉ោងបន្ថែមក្នុងលទ្ធផល ៦៤-៦១។ ដូច្នេះក្រុមទាំងពីរនឹងត្រូវកាត់សេចក្ដីនៅប្រកួតទី៣របស់ខ្លួន ដើម្បីឲ្យដឹងថាតើក្រុមណាមួយដែលនឹងត្រូវឡើងទៅវគ្គបន្ត។

ផ្សេងពីនេះពីរគូនៅថ្ងៃអាទិត្យ ក្រុម Pate 310 និង Mekong Tigers សុទ្ធតែបានកក់កៅអីរួចរាល់សម្រាប់វគ្គ៤ក្រុមចុងក្រោយ ដោយក្រុមទាំងពីរបានបន្តយកឈ្នះលើដៃគូនាការប្រកួតជើងទី២នេះដូចគ្នា។ Pate 310 បានបន្តយកឈ្នះលើ Smart Dragons ក្នុងលទ្ធផល ៧០-៥៩ រីឯ Mekong Tigers ក៏បានបន្តយកឈ្នះលើ Extra Joss Fighters ក្នុងលទ្ធផល ៧៩-៦៤។

សកម្មភាពប្រកួតកាលពីថ្ងៃសៅរ៍ និងថ្ងៃអាទិត្យ