សហព័ន្ធ​កីឡា​សី​ប៉ា​ក់តា​ក្រ​កម្ពុជា​បាន​បញ្ជូន​កីឡា​សី CHINLONE (ស៊ីឈិនឡូន) ចំនួន​១២​នាក់ ក្នុង​នោះ​​កីឡាករ​៦​នាក់ និង​កីឡាការិនី​៦​នាក់​ទៅ​ចូលរួម​ប្រកួត​ជើងឯក​អាស៊ី​ (1st Asian Chinlone Championship 2014) នៅ​ប្រទេស​មី​យ៉ាន់ម៉ា ដែល​នឹង​ចាប់​ពី​ថ្ងៃ​ទី ៣ ដល់ ៥ វិច្ឆិកា ឆ្នាំ ២០១៤ ខាង​មុខ ក្នុង​ទីក្រុង Nay Pyi Taw។

ប្រធានប្រតិភូ​ប្រជុំ​មុន​​បើក​ការ​ប្រកួត

យោង​តាម​លោក ជាតិ ខេមរា គ្រូ​បង្វឹក​ក្រុម​កម្ពុជា បាន​ឱ្យ​ដឹង​ថា ការ​ប្រកួត​នេះ​មាន​ មាន​ប្រទេស​ចូលរួម​ចំនួន ១២ ដូចជា ប៉ាគីស្ថាន, ជប៉ុន, ឥណ្ឌូណេស៊ី, ឥណ្ឌា, ថៃ, មីយ៉ាន់ម៉ា, កូរ៉េខាងត្បូង, សិង្ហបុរី, កម្ពុជា, ម៉ាឡេស៊ី, ឡាវ និង ក្រុម​ភ្ញៀវ ប្រេស៊ីល។ តាម​គម្រោង​ការ​រៀបចំ​ការ​ប្រកួត​​នេះ​​ដើម្បី​ពិចារណា​​ដាក់​​បញ្ចូល​ប្រភេទ​កីឡា Chinlone ទៅ​ព្រឹត្តិការណ៍​​កីឡា​អាស៊ី ​(Asian Games)។

កម្ពុជា​​នឹង​ចូលរួម​​ប្រកួត​លើ​៤​វិញ្ញាសា​គឺ​វិញ្ញាសា Non-Repetition (Primary Level ) បុរស និង នារី ។​ វិញ្ញាសា The Same Stroke វិញ្ញាសា The Linking និង វិញ្ញាសា Non-Repetition (Secondary)​បុរស​-​នារី

​លោក​ ឈួន ឡេង អគ្គលេខាធិការ​សហព័ន្ធ​កីឡា​​សី​ប៉ា​ក់តា​ក្រ​កម្ពុជា បាន​លើក​ឡើង​មុន​​ចេញ​ដំណើរ​ថា​សហព័ន្ធ​កីឡា Chinlone អន្តរជាតិ​​ជា​អ្នក​ជួយ​ផ្គត់ផ្គង់​សំបុត្រ​យន្តហោះ ការ​ស្នាក់ និង ហូប​ចុក។

សី Chinlone បាន​ដាក់​បញ្ចូល​ក្នុង​វិញ្ញាសា​ប្រកួត​កីឡា​ស៊ីហ្គេម​ឆ្នាំ ២០១៣ កន្លង​ទៅ​ដោយ​​មាន ៦ ប្រទេស​ចូលរួម​ប្រកួត​ប្រជែង លើ ៨ វិញ្ញាសា ស្រប​ពេល​​ក្រុម​កម្ពុជា ដណ្ដើម​បាន​មេដាយ ប្រាក់ ២ គ្រឿង និង សំរឹទ្ធ ៤ គ្រឿង៕

អត្ថបទ៖ ម៉ឺន រស្មី រូបថត៖ FB