ស្ទីលសារភាពស្នេហ៍ចាស់គំរឹលពីសម័យមុន ថាមិនត្រូវអ្នកក៏ធ្លាប់ប្រើដែរ

2014-11-03 23:07:46
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីស្ទីលចែចង់ស្រីកាលពីសម័យមុន ជាមួយសម័យឥលូវវិញ ខុសគ្នាឆ្ងាយខ្លាំងណាស់ ខុសគ្នាទាល់តែហៅលែងចង់ឮ។ ឥលូវស្ទីលញ៉ែស្រីរបស់បុរសៗ ខុសប្លែកពីគ្នា និង មានការវិវឌ្ឍន៍ទៅតាមតិចនិកផ្ទាល់ខ្លួនច្រើនបែប ច្រើនសណ្ឋានណាស់។ ហើយបើប្រៀបធៀបស្ទីលញ៉ែសម័យឥលូវ និងសម័យមុន ស្ដាប់ទៅគួរឲ្យចង់សើចខ្លាំងណាស់។

សម័យបច្ចេកវិទ្យាឥលូវគេធ្វើអីងាយៗ មិនមែនដូចកាលពីមុននោះទេ។ ខាងក្រោមនេះ ជាការរំលឹកពីស្ទីលសារភាពស្នេហ៍ ដែលហួសសម័យ តែធ្លាប់ទទួលជោគជ័យកាលជំនាន់ហ្នឹង៖

សម្រាប់យុវជន រស្មី អាយុ២៩ឆ្នាំជាបុគ្គលិកនៅក្រុមហ៊ុនឯកជនមួយ ប្រាប់ថា៖ "កាលនៅរៀនវិទ្យាល័យ ខ្ញុំលួចស្រលាញ់នារីម្នាក់ដែលរៀនជាមួយគ្នា ជំនាន់នោះខ្ញុំអត់មានទូរសព្ទប្រើទេ មិនដឹងជាប្រាប់នាងតាមណាទេ បើសារភាពតាមត្រង់ដូចជាមិនសម ហើយអៀនៗខ្លួនម៉េចទេ ណាមួយខ្លាចនាងបដិសេធទៀតផង"។

រស្មី បានបន្ថែមទាំងអឹមអៀមទៀតថា ៖ "មានតែស្ទីលបើកសៀវភៅឃើញស្នេហ៍ទេទើបមានប្រសិទ្ធភាព អញ្ចឹងហើយទើបខ្ញុំធ្វើពុតជា ខ្ចីសៀវភៅនាងកត់មេរៀន តែតាមពិតគ្រាន់តែជាលេស ដើម្បីអាចគូររូបបេះដូងក្នុងសៀវភៅគេសោះ"។

រូបតំណាង

យ៉ាងណាមិញ យុវជន ភួង មករា និស្សិតឆ្នាំទី៤ នៃវិទ្យាល័យភូមិន្ទភ្នំពេញ ក៏បានរៀបរាប់ពីស្ទីលសារភាពស្នេហ៍ដុះស្លែររបស់ខ្លួនកាលពីប៉ុន្មានឆ្នាំមុនដែរថា ៖ "និយាយទៅគួរឲ្យចង់សើចណាស់ ខ្ញុំធ្លាប់សរសេរសំបុត្រស្នេហាដ៏ផ្អែមល្ហែមមួយ ទុកជូននារីម្នាក់ដែលខ្ញុំលួចស្រលាញ់ មិនដឹងជាឲ្យនាងដោយរបៀបណា ក៏ទម្លាក់ចូលក្នុងកន្ត្រកកង់នាង តែចង្រៃអី! ថ្ងៃនោះភ្លៀងមួយមេយ៉ាងខ្លាំង ធ្វើឲ្យសំបុត្រសារភាពស្នេហ៍របស់ខ្ញុំ ដាច់រហែកខ្ទេចខ្ទីអស់មើលលែងយល់ន័យ"។

ចំណែកឯ យុវជន សុភ័ក្រ អាយុ ៣១ឆ្នាំ ជាបុគ្គលិកគ្រឹះស្ថានមីក្រូហិរញ្ញវត្ថុមួយនៅភ្នំពេញ បានបង្ហើបឲ្យដឹងផងដែរថា ៖ " ខ្ញុំគ្មានស្ទីលអីច្រើនទេរឿងញ៉ែស្រីនោះ មានតែទ្រឹស្តីមួយទេ គឺ មុខក្រាស់ ដៃរហ័ស ចិត្តហ៊ាន តែមិនមែនចេះតែប្រើខុសកាលទេសទេ ត្រូវមើលទំនងដែរ"។

ចំពោះ យុវជន ឃឹម សំអឿន អាយុ ៣០ឆ្នាំ សព្វថ្ងៃជាគ្រូបង្រៀនវិទ្យាល័យនៅឯខេត្តតាកែវ និយាយថា៖ " អារឿងញ៉ែស្រីខ្ញុំអត់ចូលចិត្តធ្វើអីវែងឆ្ងាយ អូសកាឡាដូចគេទេ បើថាចាប់អារម្មណ៍នារីណាម្នាក់គឺសុំស្គាល់គេ ហើយចូលទៅនិយាយលេងចែចង់ធម្មតាៗទៅ ដើម្បីកុំឲ្យខាតពេលវេលា មុននឹងក្រោយគង់តែបានស្គាល់ទេ ព្រោះសម័យកាលហ្នឹងអត់ទាន់មានហ្វេសប៊ុកអីដូចឥលូវឯណា"។

គិតទៅ ស្ទីលសារភាពស្នេហ៍កាលពីប៉ុន្មានឆ្នាំមុន ស្ដាប់ទៅគួរឲ្យចង់សើចមែន ខុសពីសម័យឥលូវដាច់។ បើនិយាយពីរឿងទាក់ទងគ្នា មែនទែនទៅ បច្ចុប្បន្ននេះ ពេលជួបគ្នា គេយកតែឈ្មោះហ្វេសប៊ុកគ្នាទេ ហើយសូម្បីតែលេខទូរសព្ទក៏គេមិនសូវចង់បានដែរ៕

ចុះប្រិយមិត្តវិញ មានធ្លាប់ដែលឮគេនិយាយពីស្ទីលសារភាពស្នេហ៍ទាំងនេះ ពីមុនមកទេ?

អត្ថបទ៖ យិន សំបូរ