ក្រុម​កីឡា​ការិនី​សី​ Chinlone របស់​កម្ពុជា​ដណ្ដើម​បាន​មេដាយ​មាស ១ គ្រឿង​ពី​ព្រឹត្តិការណ៍​កីឡា 1st Asian Chinlone Championship 2014 ដែល​រៀបចំ​នៅ​ទីក្រុង​ Nay Pyi Taw ប្រទេស​មីយ៉ាន់ម៉ា លើ​វិញ្ញសារ​ប្រកួត​នារី ក្រោយ​យក​ឈ្នះ​ក្រុម​ម្ចាស់​ផ្ទះ ក្នុង​លទ្ធផល​ ១០០ទល់ ៦៧ នៅ​វគ្គ​ផ្ដាច់ព័ត្រ កាល​ពី​ល្ងាច​ថ្ងៃ​ទី ៣ វិច្ឆិកា ម្សិលមិញ។

ក្រុម​កីឡា​ការិនី​កម្ពុជា ក្រោយ​ឈ្នះ​មេដាយ (រូបថត៖ FB)

លោក ជាតិ ខេមរា គ្រូ​បង្វឹក​ក្រុម​ជម្រើស​ជាតិ​កម្ពុជា បាន​ប្រាប់​មក​ពី​ប្រទេស​មីយ៉ាន់ម៉ា ក្រោយ​ចប់​ការ​ប្រកួត​ថា ក្រុម​នារី​របស់​កម្ពុជា ពិត​ជា​នឿយ​ហត់​ខ្លាំង​មែន​ទែន ទាំង​ហាត់​ត្រៀម និង ប្រកួត​ប្រជែង​​មុន​​ដណ្ដើម​បាន​មេដាយ​មាស។ ដំណាល​គ្នា​នេះ​ កម្ពុជា​ក៏​ដណ្ដើម​បាន​មេដាយ សំរឹទ្ធ ២ គ្រឿង​ទៀត​ដែរ​នៅ​ល្ងាច​ម្សិលមិញ​នេះ​ដែរ លើ​វិញ្ញាសា បុរស ១ គ្រឿង និង វិញ្ញាសា​នារី ផ្សេង​ទៀត ១ គ្រឿង។

សហព័ន្ធ​កីឡា​សី​ប៉ា​ក់តា​ក្រ​កម្ពុជា​បាន​បញ្ជូន​កីឡា​សី Chinlone (ស៊ីឈិនឡុង) ចំនួន​១២​នាក់​គឺ​កីឡាករ​៦​នាក់ និង​កីឡាការិនី​៦​នាក់​ទៅ​ចូលរួម​ប្រកួត​ជើងឯក​អាស៊ី​នៅ​ប្រទេស​មី​យ៉ាន់ម៉ា ចាប់​ពី​ថ្ងៃ​ទី ២ ដល់ ៥ វិច្ឆិកា ឆ្នាំ ២០១៤ ខាង​មុខ។

គិត​ត្រឹម​ល្ងាច​ម្សិលមិញ នៅ​មិន​ទាន់​មាន​ប្រទេស​ណា​ដណ្ដើម​បាន​មេដាយ​មាស លើ​វិញ្ញាសា​ដទៃ​ទៀត​ក្រៅ​ពី​កម្ពុជា នោះ​ឡើយ ដោយ​គ្រាន់​តែ​ប្រទេស​ថៃ មីយ៉ាន់ម៉ា កូរ៉េខាងត្បូង ជប៉ុន ប៉ុណ្ណោះ​កាន់​មេដាយ​ប្រាក់ និង សំរឹទ្ធ។ កម្ពុជា នៅ​សល់​វិញ្ញាសា ២ ទៀត​ត្រូវ​ប្រកួត​នៅ​​រសៀល​នេះ៕

អត្ថបទ៖ ម៉ឺន រស្មី