សាប៊ូដុំកែច្នៃ ផលិតនៅកម្ពុជា ជួយទាំងបរិស្ថាន និងផ្ដល់ជូនដោយឥតគិតថ្លៃ ល្បីដល់អង់គ្លេស

2016-11-23 02:00:09
ចំនួនមតិ 0 | ចំនួនចែករំលែក 0

ចន្លោះមិនឃើញ

សាប៊ូដុំកែច្នៃផលិតនៅខេត្តសៀមរាប ដែលធ្វើឡើងពីវត្ថុធាតុដើមសាប៊ូប្រើរួច ប៉ុន្តែបានក្លាយជាសាប៊ូអនាម័យជួយដល់ មនុស្សគ្រប់វ័យជៀសឆ្ងាយពីជំងឺ និងជួយដល់បរិស្ថានកម្ពុជា។

សាប៊ូដុំកែច្នៃ និងជួយបរិស្ថាន ឈ្មោះថា“eco-soap “ នោះត្រូវបានផលិតឡើងនៅអង្គការ អ្នកត្រួសត្រាយកម្ពុជាស្ថិតនៅបុរី សៀងណាំ ភូមិខ្នារថ្មី សង្កាត់ជ្រាវ ក្រុងសៀមរាប ខេត្តសៀមរាប ដោយសហការជាមួយអង្គការ Eco-Soap Bank ។

លោក អ៊ុង ច័ន្ទរតនា ជានាយកប្រតិបត្តិនៃអង្គការអ្នកត្រួសត្រាយកម្ពុជា បានរៀបរាប់ពីការផលិតសាប៊ូ eco-soap នោះថា ដំបូងឡើងគឺត្រូវប្រមូលវត្ថុធាតុដើមសាប៊ូដុំដែលឈប់ប្រើប្រាស់ នៅតាមសណ្ឋាគារ ឬផ្ទះសំណាក់។

ក្រោយប្រមូលរួច គេសម្អាតសាប៊ូផ្នែកប្រឡាក់ចេញ រួចត្រាំទឹករយៈពេល១នាទី ហើយយកទៅជម្រះដោយទឹកអូសាវែល។ បន្ទាប់មកគេរោយកម្ទេចតែឲ្យជាប់សាប៊ូ ដាក់ចូលក្នុងម៉ាស៊ីនពុម្ព និងកៀបចេញជាសាប៊ូដុំ។

ក្នុងមួយថ្ងៃអង្គការខាងលើអាចផលិតសាប៊ូ eco-soap បាន១៥០ដុំ ដោយបានផ្ដល់ការងារដល់បុគ្គលិកស្ត្រី ចំនួន៨នាក់។ ក្នុងការវេចខ្ចប់ គេប្រើនូវក្រដាសកាសែតចាស់ៗលែងប្រើ ដើម្បីជាការជួយដល់បរិស្ថានបន្ថែមទៀត។

គួររំលឹកផងដែរថា សាប៊ូដុំកែច្នៃជួយបរិស្ថានឈ្មោះ “eco-soap “ នេះក៏ត្រូវបានធ្វើឡើងតាមគំនិត អតីតនិស្សិតផ្នែកបរិស្ថានជនជាតិអាមេរិកម្នាក់គឺលោក Samir Lakhani បន្ទាប់លោកបានឃើញប្រជាពលរដ្ឋនៅខេត្តសៀមរាបប្រើសាប៊ូម្សៅទៅដុសសម្អាតខ្លួន។

លោក Samir Lakhani

សាប៊ូខាងលើ ត្រូវបានបង្កើតឡើង ជូនដល់ក្មេងៗក្នុងសហគមន៍ដើម្បីឲ្យពួកគេប្រើប្រាស់ដោយសុវត្ថិភាព។

សាប៊ូដុំកែច្នៃជួយបរិស្ថាន ផលិតនៅកម្ពុជាខាងលើក៏មានវត្តមានលើទំព័រសារព័ត៌មានបរទេសល្បីមួយចំនួនយកទៅចុះផ្សាយ ជាពិសេសត្រូវបានសារព័ត៌មាន BBC របស់អង់គ្លេសចុះផ្សាយផងដែរ។

សម្រាប់សាប៊ូកែច្នៃជួយដល់បរិស្ថាននេះ គឺបានផ្ដល់ជូនដោយឥតគិតថ្លៃទៅសាលារៀន មន្ទីរពេទ្យ និងសហគមន៍នៅខេត្តសៀមរាប ។ តាមការឲ្យដឹងពី នាយកប្រតិបត្តិនៃអង្គការខាងលើ បានបន្ថែមថា សម្រាប់សហគមន៍ សាលារៀន មន្ទីរពេទ្យដែលត្រូវការ សាប៊ូ eco-soap គឺផ្ដល់ជូនដោយពុំគិតថ្លៃ តាមរយៈការទាក់ទងផ្ទាល់ អង្គការអ្នកត្រួសត្រាយកម្ពុជា ឬតាមលេខទូរស័ព្ទ 012 943 110 ៕