ខ្សែភាពយន្តល្អមើល១៥រឿងដែលមិនគួររំលងក្នុងឆ្នាំ២០១៧

2016-12-26 07:03:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកណាខ្លះជា Fan រឿងកុនហូលីវូដ? ផ្អែកតាមគេហទំព័រ Brightside ខាងក្រោមនេះជាភាពយន្តហូលីវូដទាំង១៥រឿងដែលមិនគួររំលងទស្សនាក្នុងឆ្នាំ២០១៧។

១. Beauty and The Best

ផលិតកម្ម Walt Disney បានធ្វើឲ្យគំនូរជីវចលដ៏ល្បីរបស់ខ្លួនក្លាយទៅជារឿងដែលសម្ដែងដោយមនុស្សពិតៗ ជារឿងបែបវេទមន្តនិងស្នេហារវាងស្រីស្អាតនិងសត្វកំណាច។

ថ្ងៃចាក់បញ្ចាំង៖ ថ្ងៃទី១៦ខែមីនា

២. Thor: Ragnarok

ផលិតកម្ម Marvel Studios ពាំនាំមកនូវរឿងបែបវីរបុរស Thor សាច់រឿងនិយាយពីកូនដ៏ខ្លាំងពូកែរបស់ Odin សហការជាមួយនឹង Hulk ដ៏អស្ចារ្យដើម្បីរារាំង Ragnarok (ទីបញ្ចប់នៃពិភពលោក) ប៉ុន្តែដើម្បីស្រោចស្រង់ពិភពលោក វីរបុរសទាំងអស់នឹងត្រូវច្បាំងជាមួយនឹងបិសាចភ្លើង Surtur ដែលចង់ដុតកម្ទេចអាណាចក្រទាំង៩ (The Nine Realms) និងសម្លាប់អ្នករស់នៅទីនោះ។

ថ្ងៃចាក់បញ្ចាំង៖ ថ្ងៃទី២៥ខែតុលា

៣. Justice League

Batman និង Superman កំពុងត្រៀមបង្កើតក្រុមថ្មីសម្រាប់ប្រឆាំងនឹងការគំរាមពីតួអង្គអាក្រក់ Darkseid ដែលចង់ក្លាយជាម្ចាស់ពិភពលោកទាំងអស់ ហើយថាមពលរបស់ Darkseid គឺខ្លាំងក្លារហូតដល់អាចកម្ទេចកាឡាក់ស៊ីទាំងមូល។ ដូចនេះដើម្បីរកសមាជិកដែលមានអំណាចលើសពីមនុស្សធម្មតាសម្រាប់ឲ្យចូលរួមក្នុងក្រុម Bruce Wayne ត្រូវរុករកគ្រប់ជ្រុងនៃផែនដី។

ថ្ងៃចាក់បញ្ចាំង៖ ថ្ងៃទី១៦ខែវិច្ឆិកា

៤. The Dark Tower

ជារឿងដែលត្រូវតែមើលខានមិនបានសម្រាប់អ្នកដែលគាំទ្រអ្នកនិពន្ធ Stephen King ជាភាពយន្តផ្ដោតលើខ្មាន់កាំភ្លើងម្នាក់និងដំណើរស្វែងរករបស់គាត់លើអគារទិព្វមួយដែលអាចបញ្ឈប់ពិភពលោកពីការបំផ្លាញ។

ថ្ងៃចាក់បញ្ចាំង៖ ថ្ងៃទី២៧ខែកក្កដា

៥. xXx: Return of Xander Cage

Xander Cage ត្រឡប់មកវិញ ហើយកំពុងស្វែងរកជើងខ្លាំងដើម្បីជួយរូបគេក្នុងបេសកកម្មមួយ ដូច្នេះហើយ Xander Cage ត្រូវតែបញ្ចុះបញ្ចូលអ្នកទាំងនោះដើម្បីដើរតាមគេ។ ប្រសិនជាអ្នកជាអ្នកចូលចិត្តមើលឈុតឆាកបែបកាប់ចាក់ រថយន្តដេញចាប់គ្នានិងឈុតឆាកព្រឺព្រួចផ្សេងៗ រឿង " xXx: Return of Xander Cage” ជាជម្រើសដ៏ល្អសម្រាប់ទស្សនាក្នុងឆ្នាំ២០១៧ខាងមុខនេះ។

ថ្ងៃចាក់បញ្ចាំង៖ ថ្ងៃទី១៧ខែមករា

៦. Pirates of the Caribbean: Dead Men Tell No Tales

កាពីទែន Jack Sparrow ជួបសំណាងអាក្រក់ទៀតហើយដោយសារតែកាពីទែនដ៏គួរឲ្យខ្លាច Salazar មេក្រុមរបស់ចោរសមុទ្រខ្មោចដែលគ្រោះថ្នាក់បំផុតនិងជាសត្រូវចាស់របស់កាពីទែន Jack ផងដែរបានរួចគេចពីតំបន់ត្រីកោណរបស់អារក្សហើយប្ដេជ្ញាថានឹងសម្លាប់ចោរសមុទ្រទាំងអស់រួមទាំង Jack មិនឲ្យសល់ម្នាក់ឡើយ។ ក្ដីសង្ឃឹមរស់ចុងក្រោយគឺមានតែយកវត្ថុអស្ចារ្យម្យ៉ាងដែលមានតំណាលតគ្នាថាអាចគ្រប់គ្រងមហាសាគរទាំងអស់មកគ្រប់គ្រង។

ថ្ងៃចាក់បញ្ចាំង៖ ថ្ងៃទី២៤ខែឧសភា

៧. Wonder Woman

Diana ជាព្រះនាងក្នុងព្រៃអាម៉ាហ្សូនដែលរស់នៅជាមួយអ្នកចម្បាំងតាំងពីតូចលើទឹកដីនៃកោះមួយ ប៉ុន្តែនាងបានសម្រេចចិត្តចាកចេញពីកន្លែងដែលនាងរស់នៅដើម្បីជួយពិភពលោក បន្ទាប់ពីបានជួបអាកាសយានិកប្រុសវ័យក្មេងមួយរូបដែលយន្តហោះរបស់គេធ្លាក់នៅក្បែរឆ្នេរនិងបានប្រាប់ពីរឿងដ៏ធ្ងន់ធ្ងរដែលផែនដីទាំងមូលនឹងត្រូវកម្ទេចដល់នាង។ Diana និងវីរបុរសដទៃទៀតនឹងតស៊ូក្នុងចម្បាំងនេះជាក្រុមតែមួយហើយពួកគេនឹងរកឃើញថាមពលពិតប្រាកដដែលពួកគេមាននិងស្វែងយល់ពីអ្វីដែលពួកគេនឹងតតាំង។

ថ្ងៃចាក់បញ្ចាំង៖ ថ្ងៃទី១ខែមិថុនា

៨. Tulip Fever

នារីវ័យក្មេងម្នាក់បានរៀបការទាំងមិនសប្បាយចិត្តជាមួយនឹងបុរសចំណាស់ជាអ្នកមានទ្រព្យម្នាក់ ប៉ុន្តែជីវិតរបស់នាងបានស្រស់ថ្លាឡើងវិញ ក្រោយពីស្វាមីជាអ្នកមានរបស់នាងបានជួលជាងគំនូរវ័យក្មេងម្នាក់មកគូររូបរបស់ប្ដីប្រពន្ធមួយគូនេះ។ ការកើតកួចចិត្តស្នេហាក៏កើតមានឡើងរវាងនាងនិងអ្នកគំនូរវ័យក្មេងនោះ តើអ្នកទាំង២នឹងជួបរឿងអ្វីខ្លះហើយមានអ្វីកើតឡើង?

ថ្ងៃចាក់បញ្ចាំង៖ ថ្ងៃទី២៣ខែកុម្ភៈ

៩. Star Wars: Episode VIII

Rey បានដើរចូលពិភពដ៏ធំក្នុង Star Wars: The Force Awakens ហើយនាងនឹងបន្តដំណើរផ្សងព្រេងរបស់នាងជាមួយនឹង Finn, Poe និង Luke Skywalker នៅក្នុងភាគបន្ទាប់នៃរឿងភាគ Star Wars ។ តើ Rey ជានរណាហើយមានប្រភពមកពីណា? រឿងរ៉ាវពាក់ព័ន្ធនឹងសំនួរនេះប្រាកដជាធ្វើឲ្យលោកអ្នកភ្ញាក់ផ្អើលមិនខាន។

ថ្ងៃចាក់បញ្ចាំង៖ ថ្ងៃទី១៥ខែធ្នូ

១០. Submergence

James ត្រូវបានក្រុមជីហាដចាប់បង្ខាំងខ្លួននៅក្នុងប្រទេសសូម៉ាលី ចំណែកឯគូស្នេហ៍របស់លោកឈ្មោះ Danielle កំពុងតែត្រៀមចុះមហាសមុទ្រដ៏សែនជ្រៅដើម្បីជួយ James ។ ទោះបីពួកគេនៅឆ្ងាយពីគ្នារាប់រយគីឡូម៉ែត្រយ៉ាងណា ស្នេហារបស់ពួកគេនឹងនៅជាមួយគ្នានិងផ្ដល់កម្លាំងចិត្តដើម្បីតស៊ូនិងរស់នៅ។

ថ្ងៃចាក់បញ្ចាំង៖ មិនទាន់បញ្ជាក់ជាផ្លូវការនៅឡើយទេ។

១១. Ghost in the Shell

ទោះបីជាបច្ចេកវិទ្យាតាមប្រព័ន្ធអ៊ីនធឺណិតមានគុណប្រយោជន៍ជាច្រើនបែបក្ដី វាក៏នៅមានផលប៉ះពាល់ពិបាកដែរ។ ជនដ៏អាក្រក់ដែលមានឈ្មោះហៅក្រៅថា Puppeteer ចេះប្រើប្រាស់វិធី "Ghost Hacking” និងអាចបញ្ជារាងកាយមនុស្សតាមប្រព័ន្ធនោះដោយមិនដឹងខ្លួន។ ដោយសមត្ថភាពមួយនេះ រូបគេចាប់ផ្ដើមលូកដៃចូលក្នុងនយោបាយ ហើយមានតែប៉ូលិសស្រីតែម្នាក់តែប៉ុណ្ណោះដែលអាចកម្ចាត់បុរសដ៏អាក្រក់ម្នាក់នេះ។

ថ្ងៃចាក់បញ្ចាំង៖ ថ្ងៃទី២៩ខែមីនា

១២. Kong: Skull Island

ដំណើររុករកធម្មតាលើកោះដែលគ្មានឈ្មោះមួយត្រូវបានក្លាយជាមហន្តរាយ។ តាំងពីដំបូង ក្រុមអ្នករុករកទាំងនោះយល់ថាកោះនោះហាក់បីដូចជាមិនស្វាគមន៍ពួកគេឡើយ ហើយពួកគេរឹតតែមិនដឹងថាអ្វីដែលគួរឲ្យខ្លាចបំផុតគឺម្ចាស់កោះព្រោះក្រុមអ្នករុករកទាំងនោះបានឈានចូលដែនរបស់ Kong ។ ថ្ងៃចាក់បញ្ចាំង៖ ថ្ងៃទី៨ខែមីនា

១៣. The Boss Baby

Tim ជាក្មេងអាយុ៧ឆ្នាំរស់នៅក្នុងជីវិតធម្មតាគឺមានឪពុកម្ដាយថ្នាក់ថ្នមស្រលាញ់ ជាក្មេងដែលមានការស្រមើស្រមៃហើយជីវិតមើលទៅគ្មានបញ្ហាអ្វីនោះទេ ប៉ុន្តែគ្រប់យ៉ាងត្រូវបានផ្លាស់ប្ដូរពេលដែលក្មេងប្រុសអាយុប្អូន Tim ចូលមករស់នៅក្នុងគ្រួសាររបស់គេ។ ក្មេងម្នាក់នោះចេះពាក់អាវធំ ចេះដោះស្រាយបញ្ហាជំនួញនិងចេះបញ្ជាឪពុកម្ដាយរបស់គេរហូតដល់ថ្នាក់ Tim ពិបាកនឹងយល់ថានរណាជាមិត្តរបស់គេហើយនរណាមិនមែនមិត្ត។

ថ្ងៃចាក់បញ្ចាំង៖ ថ្ងៃទី១៣ខែមករា

១៤. Guardians of the Galaxy Vol.2

Peter Quill ឬ Starlord បង្កើតក្រុមខ្លួនឯង រកមិត្តពិតប្រាកដ ហើយចុងក្រោយទទួលបានការគោរពពីអ្នកគ្រប់គ្នា។ អ្វីដែល Peter Quill ពិបាកចិត្តនោះគឺរឿងគ្រួសារ គេដឹងថាឪពុករបស់គេបាត់ខ្លួននៅ កន្លែងណាមួយក្នុងលំហអាកាស ប៉ុន្តែឪពុករបស់ Peter Quill ជានរណា?

ថ្ងៃចាក់បញ្ចាំង៖ ថ្ងៃទី២៥ខែកុម្ភៈ

១៥. Power Rangers

ក្រុមសិស្សសាលាមួយក្រុមដែលមានប្រឈមនឹងបញ្ហានិងភាពភ័យខ្លាចរៀងខ្លួនស្រាប់តែមានថាមពលដ៏ចម្លែកអស្ចារ្យមួយបានផ្ដល់ឲ្យពួកគេ។ ផែនដីកំពុងជួបនឹងគ្រោះថ្នាក់ មានតែក្មេង១ក្រុមនេះទេដែលអាចជួយសង្គ្រោះផែនដីពីគ្រោះថ្នាក់នេះបាន។

ថ្ងៃចាក់បញ្ចាំង៖ ថ្ងៃទី១៣ខែមីនា