គួរដឹង! ៧ ចំណុចនេះ ជួយអ្នករួចជីវិត ឬរួចពីគ្រោះថ្នាក់ចៃដន្យ

2017-02-12 09:30:37
ចំនួនមតិ 0 | ចំនួនចែករំលែក 0

ចន្លោះមិនឃើញ

គន្លឹះ៧ចំណុចខ្លីៗ ក្នុងជីវិតរស់នៅប្រចាំថ្ងៃ ត្រូវបានបង្ហាញណែនាំដោយ វិបសាយចំណេះដឹងទូទៅ Bright Side ដើម្បីជាការចែករំលែក សម្រាប់អ្នកដែល ធ្លាប់ និងមិនធ្លាប់ជួបបញ្ហាទាំងនោះ។ ខាងក្រោមនេះជាតិចនិកខ្លះៗដើម្បីសុវត្ថិភាព និងការជួយសង្គ្រោះដោយខ្លួនឯង៖

១. ចៀសឲ្យផុត កុំចុចទូរសព្ទពេលដើរតាមទីសាធារណៈ

ទស្សនាវដ្ដីសុខភាព ព្រមទាំងការណែនាំពីអ្នកជំនាញសុវត្ថិភាពជាច្រើនបានបង្ហាញថា នៅពេលអ្នកដើរបណ្ដើរ និងចុចទូរសព្ទបណ្ដើរ ខួរក្បាលនឹងផ្ដោតយកចិត្តទុកដាក់តែលើអេក្រង់ទូរសព្ទប៉ុណ្ណោះ ដោយពុំចាប់អារម្មណ៍នូវអ្វីជុំវិញខ្លួនឡើយ។ ដូចនេះ គួរប្រយ័ត្ន ជាពិសេសដើរតាម ទីសាធារណៈ មានឡាន-ម៉ូតូ និងករណី ចោរឆក់ជាដើម។

២. សារ៉េកញ្ចក់ឡាន ឲ្យត្រឹមត្រូវ អាចជួយជីវិតអ្នកបាន

តើអ្នកដឹងទេ? គ្រាន់តែបង្វិលកញ្ចក់ឡានអ្នកឲ្យត្រូវតាមការណែនាំ អាចនាំអ្នកបញ្ចៀសពីគ្រោះថ្នាក់ផ្សេងៗបាន។ ទាំងកញ្ចក់ក្រោយ និងកញ្ចក់ចំហៀងគឺសំខាន់ទាំងអស់ សារ៉េឲ្យត្រូវ ឲ្យល្មមអ្នកអាចឃើញ ឡាន-ម៉ូតូ ដែលជិះមកក្បែរ ឬមកខាងក្រោយឡានអ្នក វាអាចជួយអ្នកបានច្រើន។

៣. ជួយសង្គ្រោះបឋម ពេលមានអ្នកស្លាក់ចំណីអាហារ ឬវត្ថុអ្វីក្នុងមាត់

ដាក់ដៃអោបពីលើផ្ចិតអ្នករងគ្រោះ ដាក់មេដៃចូលក្នុង (ដូចរូប) ក្តាប់ដៃផ្គុំគ្នា រួចអោបរឹតចន្លោះផ្ចិត និងឆ្អឹងជំនីរអ្នករងគ្រោះ ឲ្យខ្លាំង ធ្វើដូចខាងលើនេះ រហូតដល់អ្នកស្លាក់ ខ្ជាក់ធ្លាក់ចំណី ឬវត្ថុចេញពីបំពង់ខ្យល់ក្នុងមាត់ ចេញមកក្រៅ បើសិនធ្វើតាមវិធីខាងលើពុំមានប្រសិទ្ធភាព ត្រូវយកអ្នកស្លាក់ ដាក់ដេកទ្រោបលើវត្ថុអ្វីមួយ ដូចជា តុ ឬកៅអី រួចរុញសង្កត់ ពោះ (ចន្លោះពីផ្ចិត និងឆ្អឹងជំនីរ) រហូតជនរងគ្រោះ ខ្ជាក់វត្ថុ ឬចំណីស្លាក់ចេញពីក្នុងមាត់។

៤. ពេលភ្លើងឆាបឆេះប្រេង ក្នុងខ្ទះ

មានភ្លើងឆាបខ្លាញ់ ឬប្រេងក្នុងខ្ទះចម្អិន កុំព្យាយាមចាក់ទឹកពន្លត់ពីលើ ព្រោះទឹកនឹងហូរទៅបាតខ្ទះ និងភាយចំហាយមកវិញ ជាហេតុធ្វើឲ្យឆាបភ្លើងកាន់តែខ្លាំង។ បើមានភ្លើងឆេះខ្ទះ ភ្លាមៗបិទហ្គាស៍ ឬថយភ្លើង យកគម្របខ្ទះ ឬគម្របឆ្នាំងទៅគ្របពីលើភ្លើង ព្រោះវាអាចបន្ថយអុកស៊ីហ្សែន ដែលធ្វើឲ្យភ្លើងស្ងប់វិញ។

៥. កុំព្យាយាមដក អំបែងមុត ឬកាំបិតជាប់ក្នុងរបួសសាច់ដោយខ្លួនឯង

ពេលមុតកាំបិត ឬអំបែងអ្វីមួយជាប់ក្នុងសាច់ សូមកុំព្យាយាមដកវាចេញដោយខ្លួនឯង។ នេះបើតាមការណែនាំពីអ្នកជំនាញ។ ទុកឲ្យអំបែងនោះនៅជាប់មុខរបួសសិន ព្រោះវាបង្ការមិនឲ្យឈាមហូរខ្លាំង។ អ្វីដែលគួរធ្វើគឺ ឃាត់ឈាម បន្ថយការហូរឈាម រហូតដល់អ្នកទៅដល់មន្ទីរពេទ្យ ឬក្រុមសង្គ្រោះមកជួយ។

៦. ក្នុងករណី នៅក្នុងអគារឆេះមានផ្សែងខ្លាំង

ឧបមាថាអ្នកស្ថិតនៅក្នុង អគារដែលភ្លើងឆេះ មានផ្សែងខ្លាំង អ្វីដែលត្រូវធ្វើជាមុនគឺត្រូវឱនទៅក្រោម ចៀសពីផ្សែង។ អ្នកជំនាញបានណែនាំថា ផ្សែងភ្លើងដែលផ្ទុកជាតិកាបូនម៉ូណូអុកស៊ីត ធ្វើឲ្យអ្នកពិបាកដកដង្ហើម និងពិបាកខ្លាំង។ ឱនចុះទៅក្រោម រួចព្យាយាមផ្លាស់ទី ទៅកន្លែងដែលមានសុវត្ថិភាព។

៧. ដើរទៅក្រៅពេលយប់ម្នាក់ឯង គួរតែមានពិល នៅជាមួយ

អ្នកជំនាញខាងសុវត្ថិភាពបុគ្គលបានណែនាំថា ដើរនៅពេលយប់ ហើយមាននរណាម្នាក់មានបំណងមិនល្អមកលើអ្នក ពិលអាចជួយបាន។ ប្រើភ្លើងពិលបញ្ចាំងដាក់មុខ ជនដៃដល់ អាចធ្វើឲ្យរូបគេ ស្រវាំង វង្វេងស្មារតី ហើយពេលនោះ ជាឱកាសបន្លាយពេល ដែលអ្នកត្រូវរត់ឲ្យលឿនឲ្យគេជួយ៕