អត្ថន័យពីក្រោយឈ្មោះក្រុមចម្រៀង K-pop ល្បី ៨ក្រុម មិនសូវមានអ្នកដឹង

2017-02-20 03:48:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីត្បិតតែក្រុមតារាចម្រៀងជាច្រើនត្រូវបានទទួលការគាំទ្រ និងស្គាល់ពីសំណាក់មហាជន ប៉ុន្តែអ្វីដែលគួរឲ្យចាប់អារម្មណ៍ គឺរឿងរ៉ាវដែលគួរឲ្យភ្ញាក់ផ្អើលនៅពីក្រោយឈ្មោះក្រុមល្បីៗទាំងនោះ ប្រិយមិត្តមួយចំនួនមិនទាន់ដឹងនៅឡើយទេ។

១. EXO

ក្រុមចម្រៀងដែលមានបង្កើតក្នុងឆ្នាំ ២០១២មួយនេះបានឆក់យកបេះដូងអ្នកគាំទ្រយ៉ាងច្រើននាក់ទូទាំងពិភពលោក។ EXO ជាពាក្យកាត់មកពីពាក្យថា EXOPLANET ដែលជាភពនៅក្រៅប្រព័ន្ធព្រះ អាទិត្យ។ មិនឲ្យខុសពីន័យរបស់ឈ្មោះក្រុម ពួកគេបានបង្ហាញនូវភាពអង់អាច សមត្ថភាពគ្រប់ទម្រង់ដែលនេះគឺពិតជាគួរឲ្យស្ញប់ស្ញែង ស្ទើរមិនគួរឲ្យជឿដែលមិនធ្លាប់មានពីមុនមក។

២.GIRLS' GENERATION

Girls' Generation ជាក្រុមនារីដែលទទួលបានក្ដីស្រឡាញ់ពីអ្នកគាំទ្រស្ទើរគ្រប់ទីកន្លែង ចាប់តាំងពីបទចម្រៀង "Into The New World” ដោយសាររូបសម្រស់របស់ពួកគេ និងសមត្ថភាពដ៏អស្ចារ្យរបស់ពួកគេ។ អស់រយៈពេលជាង១០ ឆ្នាំទៅហើយដែល ក្រុមតារាស្រីមួយនេះស្ថិតនៅក្នុងក្រអៅបេះដូងរបស់អ្នកគាំទ្រ ប៉ុន្តែអ្វីដែលជាចម្ងល់នោះគឺថា តើឈ្មោះក្រុម "Girls's Generation” មានន័យយ៉ាងដូចម្តេច? "Girls's Generation” បកជាភាសាកូរ៉េគឺ “Sonyeoshidae” ដែលពាក្យនីមួយៗមានន័យថា៖ “So” ជាភាសាកូរ៉េសំដៅលើ ក្រុមនារីដែលមានទំនាក់ទំនងល្អក្នុងក្រុម “Nyeo” សំដៅលើ ភាពទាក់ទាញ និងគួរឲ្យស្រលាញ់របស់នារី “Shi” សំដៅលើ ភាពប្រែប្រួលតាំងពីពេលចាប់ផ្ដើម (ទាំងសមត្ថភាពសម្តែង ច្រៀង រាំ ភាសាបរទេស គឺសុទ្ធតែត្រូវបានពង្រឹងដើម្បីផ្ដល់នូវអ្វីដែលប្លែកអស្ចារ្យដល់អ្នកគាំទ្រ) “Dae” សំដៅលើ ភាពជាតំណាងឲ្យម៉ាកផលិតផលល្បីៗ។

៣. BIG BANG

Big Bang កើតមកពីពាក្យ "Big Bang Theory” ដែលជាសញ្ញានៃសកលលោកទាំងមួល។ ឈ្មោះក្រុមនេះ តំណាងឲ្យ "Bang” ឫ " Explosion” ដែលត្រូវបានបង្កើតឡើងក្នុងវិស័យចម្រៀង។

៤. SISTAR

ឈ្មោះក្រុមដែលមានសមាជិក៤ នាក់មួយនេះត្រូវបានបង្កើត ដោយយកពាក្យពីរ មកបញ្ចូលគ្នា គឺ "Sister” និង "Star” តាមរយៈឈ្មោះនេះគឺអាចបង្ហាញឲ្យដឹងពីសមត្ថភាពសិល្បៈរបស់ពួកគេ បូករួមនឹងភាពរួសរាយ និងគួរឲ្យស្រលាញ់របស់សមាជិកទាំង៤របស់ SISTAR បានផងដែរ។

៥. GOT7

ឈ្មោះ GOT7 ត្រូវបានបង្កើតឡើងដោយយោងទៅតាម លេខ៧ ដែលជាលេខនាំសំណាង ហើយក៏ជា ចំនួនសមាជិកនៅក្នុងក្រុមដែរ ដូច្នេះសរុបមក GOT7 មានន័យថា "មនុស្ស៧នាក់ដែលមានសំណាងល្អ"។

៦. TWICE

ក្រុមនារីដែលមានសមាជិក៩ នាក់ TWICE ជាក្រុមចម្រៀងដែលសព្វថ្ងៃកំពុងទទួលបានប្រជាប្រិយភាពខ្លាំងគួរសមដែរពីសំណាក់បណ្ដាអ្នកគាំទ្រ ដោយសារសមត្ថភាពពីធម្មជាតិ គួបផ្សំនឹងរូបសម្រស់ដ៏ស្រស់ស្អាតរបស់សមាជិកទាំងអស់ផងដែរ។ បទចម្រៀងដំបូងដែលធ្វើឲ្យក្រុមនេះទទួលបានការគាំទ្រខ្លាំងគឺបទចម្រៀងដែលមានចំណងជើងថា "CHEER UP” ។ ដោយសារភាពជោគជ័យ ដ៏មិនគួរឲ្យជឿនេះ ធ្វើឲ្យអ្នកគាំទ្រទាំងអស់ឆ្ងល់ថា តើក្រុមចម្រៀងប្រចាំផលិតកម្ម JYP មួយនេះមានវិធីសាស្ត្រអ្វីនៅពីក្រោយភាពជោគជ័យមួយនេះ ហើយឈ្មោះមានន័យបែបណា? យោងតាមអ្វីដែល JYP បានបកស្រាយ គោលដៅរបស់ TWICE គឺផ្លាស់ប្ដូរអារម្មណ៍អ្នកគាំទ្រពីរដងជាមួយការសម្ដែងរបស់ពួកគេគឺ ទីមួយតាមរយៈការស្ដាប់ មួយទៀតតាមរយៈការមើល។

៧. 2PMនិង2AM

ក្រុមទាំងពីរដែលស្ថិតនៅក្រោមផលិតកម្ម JYP នេះត្រូវបានបង្កើតនៅក្នុងឆ្នាំ២០០៨ បើទោះបីក្រុមទាំងពីរនេះ ត្រូវបានគេដាក់ឈ្មោះថាជាក្រុមបងប្អូនបង្កើត ក៏ប៉ុន្តែចំពោះប្រភេទបទចម្រៀងរបស់ពួកគេគឺខុសគ្នា។ ចំពោះ 2PM បទចម្រៀងរបស់ពួកគេមានភាពកន្ត្រាក់អារម្មណ៍ពេញដោយថាមពល និងសម្រាប់បម្រើអារម្មណ៍ពេលថ្ងៃ។ រីឯបទចម្រៀងរបស់ 2AM គឺ មានលក្ខណៈអន្លង់អន្លោច មនោសញ្ចេតនាដ៏ជ្រាលជ្រៅបំផុត សម្រាប់បំពេអារម្មណ៍ពេលចូលគេង៕

ប្រភព៖ Allkpop ប្រែសម្រួល៖ ហេង សុធារិទ្ធិ