CEO ២រូប ប្រថុយរកស៊ីទាំងវ័យក្មេងរហូតជោគជ័យ បំផុសគន្លឹះឱ្យយុវជនហ៊ានចាប់ផ្ដើម

2017-07-04 07:06:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ផ្ដើមធ្វើអ្នកជំនួញម្នាក់មិនមែនជារឿងងាយស្រួលនោះទេ គឺត្រូវស្វែងយល់ សិក្សារៀនសូត្រជាច្រើនទើបអាចចាប់ផ្ដើមបាន។ ក្រឡេកមកមើលយុវវ័យក្នុងប្រទេសកម្ពុជាបច្ចុប្បន្ន តែងលើកយកបញ្ហារកស៊ីនេះមកនិយាយ ហើយក៏មានយុវជនវ័យក្មេងជាច្រើនចង់រកស៊ី។ ដូច្នេះដើម្បីផ្ដល់ជាគំនិតជុំវិញបញ្ហា សូមទៅស្ដាប់ការលើកឡើងរបស់ CEO វ័យក្មេង២រូបកំពុងជោគជ័យខ្លាំងដូចខាងក្រោម៖

១. គង់ សូរីតា

គង់ សូរីតា ម្ចាស់ក្រុមហ៊ុន OCEAN Technology បានចាប់ផ្ដើមប្រថុយរកស៊ីតាំងពីអាយុជាង ២០ឆ្នាំ ហើយថែមទាំងមិនមានជំនាញផ្នែកអាជីវកម្មទៀតផង តែដើម្បីក្លាយជាអ្នករកស៊ីជោគជ័យទាំងវ័យក្មេង អ្នកស្រីមានគន្លឹះសំខាន់ៗមួយចំនួនរួមមាន៖

កត្តាអាជីវកម្ម មុននឹងចាប់ផ្ដើម តើបានសិក្សាច្បាស់លាស់ឬនៅ? អ្នកស្រីលើកឡើងថា អ្នកខ្លះគ្រាន់តែឃើញគេបើកក៏បើកដែរ ធ្វើអ្វីតាមការចង់ដោយគ្មានគម្រោងផែនការច្បាស់លាស់ជាមុន។
ត្រូវសិក្សាឱ្យបានច្បាស់លាស់ទៅលើអាជីវកម្ម ថាតើទីតាំងដែលកំពុងធ្វើនោះសមស្របដែរឬក៏អត់ ជួនកាលអាជីវកម្មខ្លះមិនត្រូវជាមួយទីតាំង ដែលអាចទាក់ទាញអតិថិជននោះទេ។
ការសិក្សាពីអតិថិជន ថាតើអតិថិជនគោលដៅជានរណា ផលិតផល សេវាកម្ម ឬទំនិញនោះតម្រូវទៅខាងណា។
គំនិតច្នៃប្រឌិតរបស់ម្ចាស់ក៏សំខាន់ដូចគ្នា ត្រូវធ្វើយ៉ាងណាឱ្យសេវាកម្ម ឬទំនិញ មានភាពទាក់ទាញ។ ឧទាហរណ៍អ្នកលក់ចេកចៀន ដើម្បីឱ្យកាន់តែទាក់ទាញ អាចបន្ថែមតម្លៃផ្សេងៗដូចជា ស្លាកយីហោ ការវេចខ្ចប់ សោភ័ណភាព គុណភាព។

២. សេង ពិសិដ្ឋ

លោក សេង ពិសិដ្ឋ បច្ចុប្បន្នមានអាយុ ២៧ឆ្នាំ ជាម្ចាស់ក្រុមហ៊ុនអនុស្សាររៀបចំពិព័រណ៍ បានលើកឡើងថា លោកក៏មិនខុសពីយុវវ័យទូទៅដែរ ពីដំបូងមិនហ៊ានប្រថុយរកស៊ីនោះទេ តែក្រោយបានសិក្សាពីសង្គមច្បាស់លាស់ ទើបលោកដឹងថា តាមពិតមិនពិបាកចាប់ផ្ដើមនោះទេប្រសិនបើយុវជនឱ្យតម្លៃលើ៥ចំណុចនេះ៖

១. សប្បាយចិត្តនឹងធ្វើអ្វីមួយរយៈពេលវែង៖ ធ្វើអ្វីមួយដែលសប្បាយចិត្តនឹងធ្វើក្នុងរយៈពេលវែង មានន័យថា ធ្វើរឿងអ្វីក៏ដោយមិនមែន ធ្វើតែមួយឆាវទេ ត្រូវព្យាយាមអត់ធ្មត់ធ្វើរឿងនោះឱ្យដល់គោលដៅ។

២. ជំនាញច្បាស់លាស់និងភាពជឿជាក់លើខ្លួនឯង៖ ចេះអ្វីឱ្យប្រាកដ ហើយជឿជាក់ថា អាចធ្វើរឿងមួយដ៏ល្អ ធ្វើបានដោយឥតខ្ចោះ គួរតែសាកល្បង។

៣. រក្សា Personal Branding៖ ធ្វើជាមនុស្សម្នាក់សំខាន់បំផុតត្រូវធ្វើខ្លួនឯង ឱ្យមានកេរ្តិ៍ឈ្មោះល្អ រក្សានូវតម្លៃរបស់ខ្លួន មិនថានៅទីណា កន្លែងណានោះទេ ដាច់ខាតកុំធ្វើឱ្យខូចឈ្មោះរបស់ខ្លួន។

៤. ខិតខំសន្សំ៖ មនុស្សភាគច្រើនចូលចិត្ត បង្ហាញ បង្អួតគ្នា គ្នារឿងសម្ភារៈនិយម តែ នៅពេលដែលចង់ធ្វើអ្វីមួយគឺគ្មានលុយ គ្មានដើមទុន ហេតុនេះហើយការសន្សំ គឺជារឿងដ៏ល្អបំផុត។

៥. ជាមនុស្សដែលមានសីលធម៌ គុណធម៌ក្នុងខ្លួន៖ លោកនិយាយថា៖ "រឿង សីលធម៌ គុណធម៌ នេះធ្វើឱ្យយើងខុសប្លែកពីមនុស្សដទៃ ត្រូវធ្វើឱ្យមនុស្សសំខាន់នៅជុំវិញខ្លួន ជឿជាក់ថាយើងជាមនុស្សដែលមិនមែនចេះតែនិយាយ តែមិនធ្វើនោះទេ៕"

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ