ភីម៉ៃ ចេញមុខ សុំទោសទស្សនិកជន រឿងថតបទចម្លងពីថៃ (វីដេអូ)

2017-07-17 02:03:24
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់បទចម្រៀង "តារាបែកស្លុយ ២០១៧" របស់លោក ម៉ារ៉ា ប៊ុណ្ណា ត្រូវបានមហាជនរិះគន់ជាខ្លាំងដោយសារតែបទចម្រៀងមួយបទនេះបានចម្លងពីបទចម្រៀងរបស់ថៃ លោក ភីម៉ៃ តារាសម្ដែងម្នាក់ក្នុងបទនេះ បានចេញមុខសុំទោសទស្សនិកជន ដោយលោកលើកឡើងថា ការដែលខ្លួនចូលរួមសម្ដែងបទចម្រៀងនោះជាការសម្ដែងដោយបង្ខំចិត្តប៉ុណ្ណោះ។

លោក ភីម៉ៃ បានប្រាប់ថា ដោយសារតែខ្លួនធ្លាប់មានទំនាក់ទំនងជាមួយលោក ម៉ារ៉ា ប៊ុណ្ណា ត្បិតអីធ្លាប់ថតភាពយន្តជាមួយគ្នាច្រើនលើកផងនោះ ក៏មានការពឹងលោកឲ្យជួយសម្ដែងចម្រៀង១បទ។ លោកភីម៉ៃ មិនបានដឹងថា បទចម្រៀងដែលថតនោះជាបទអ្វី ហើយចេញពីប្រភពណាឡើយ ប៉ុន្តែក្រោយចាប់ផ្ដើមថតពេលចាក់ភ្លេងទៅទើបខ្លួនស្រងាកចិត្តជាខ្លាំង។

តារាសម្ដែងរូបនេះបានបន្តទៀតថា ដោយសារតែថ្ងៃថតនេះមានតារាសម្ដែងជាច្រើនទៀតសុទ្ធតែស្គាល់រាប់អានគ្នាជាច្រើនឆ្នាំផងនោះ ធ្វើឲ្យលោកមិនអាចប្រកែកបានក៏បង្ខំចិត្តថតរហូតដល់ចប់ ទាំងដឹងខ្លួនមុនថា បទចម្រៀង១បទនេះពេលចេញមកច្បាស់ជាមហាជនរិះគន់ជាក់ជាមិនខាន។

បែបនេះក្ដីលោក ភីម៉ៃ មិនបានខឹងសម្បាទៅលោក ម៉ារ៉ា ប៊ុណ្ណាឡើយ ត្បិតអីរឿងទាំងឡាយបានកន្លងហួសទៅហើយ គ្រាន់តែលោកសូមការអភ័យទោសទៅទស្សនិកជនទាំងអស់ក៏ដូចជា Fans ដែលតែងគាំទ្រខ្លួនកន្លងមក ដោយលោកសូមសន្យាថា មិនថតបទចម្រៀង ឬកិច្ចការសិល្បៈណាផ្សេងទៀតចម្លងពីបរទេសនាំឲ្យប៉ះពាល់ដល់កិត្តិយសជាតិទៀតឡើយ។

ជុំវិញការលើកឡើងរបស់ លោក ភីម៉ៃ នេះ លោក ម៉ារ៉ា ប៊ុណ្ណា ដែលជាម្ចាស់បទចម្រៀងខាងលើបាននិយាយយ៉ាងខ្លីថា លោកនឹងចេញមុខសុំទោសទៅមហាជនក្នុងពេលឆាប់ៗនេះ ប៉ុន្តែលោកសុំពេលទុកឲ្យមហាជនរិះគន់បន្តិចទៀតសិន។ សូមស្ដាប់វីដេអូ របស់លោកភីម៉ៃ ជុំវិញការសូមទោសទាំងនេះ៕

ចុចអាន៖

អត្ថបទៈ ស៊ុនហួត