គ្រឹះសំណង់អគារខ្ពស់បំផុតនៅលើផែនដីថ្មីមួយទៀត ឃើញញាក់សាច់

2017-08-16 08:25:31
ចំនួនមតិ 0 | ចំនួនចែករំលែក 0

ចន្លោះមិនឃើញ

សំណង់អគារខ្ពស់បំផុតនៅលើពិភពលោកបច្ចុប្បន្នមានឈ្មោះ Burj Khalifa កម្ពស់ ៨២៩ម៉ែត្រ ស្ថិតនៅប្រទេសអារ៉ាប់រួម និងបានគ្រងតំណែងនេះតាំងពីឆ្នាំ ២០១០ មកម្ល៉េះ។

ស្រាប់តែនៅខែតុលាឆ្នាំ ២០១៦ អគារថ្មីមួយទៀតបានបើកសម្ពោធបុកគ្រឹះដំណើរការសាងសង់ ដែលគេអះអាងថានឹងក្លាយជាអគារខ្ពស់វ៉ាដាច់ Burj Khalifia ជាមួយកម្ពស់ ៩២៨ម៉ែត្រ។

អគារខ្ពស់ថ្មីរបស់ពិភពលោកនេះមានឈ្មោះ Dubai Creek Tower គឺស្ថិតនៅទីក្រុងឌូបៃ ប្រទេសអារ៉ាប់រួម ដដែល។ កាលប៉ុន្មានថ្ងៃថ្មីៗនេះ រូបថតគ្រឹះរបស់អគារត្រូវបានគេបង្ហាញឲ្យឃើញពីលើអាកាសជាមួយមាត់រណ្ដៅគ្រឹះដ៏ធំសម្បើម អមជាមួយកម្មករកំពុងធ្វើការយ៉ាងសស្រាក់សស្រាំ។

គម្រោងសំណង់ Dubai Creek ស្ថិតនៅបរិវេណប្រមាណជិត ៦គីឡូម៉ែត្រការ៉េ សាងសង់ដោយក្រុមហ៊ុន Emaar Properties។ បើតាមប្រភព CNN ផ្សាយថា គ្រឹះអគារមានជម្រៅជាង ៧១ម៉ែត្រ នឹងប្រើស៊ីម៉ង់អស់ប្រមាណ ១,៥៩លានហ្វីតគូប ហើយវានឹងខ្ពស់ជាងអាគារ Burj Khalifa ប្រមាណ ៩៩ម៉ែត្រ។

ទោះយ៉ាងណា បច្ចុប្បន្នគម្រោងអគារ Dubai Creek Tower កំពុងមានទំនាស់ជាមួយគម្រោងអគារ The Jeddah Tower របស់ប្រទេសអារ៉ាប៊ីសាអ៊ូឌីត ក្នុងការប្រជែងយកពានអគារខ្ពស់បំផុតក្នុងលោក ព្រោះ The Jeddah ក៏កំពុងសាងសង់ដែរ ដែលនឹងខ្ពស់ជាង Dubai Creek ចំនួន ៧២ម៉ែត្រទៀតផង។ ដូច្នេះមានន័យថា The Jeddah ត្រូវបញ្ចប់ការសាងសង់ជាមុនសិន ដើម្បីជាប់កំណត់ត្រាពិភពលោក៕