មានពិត! មនុស្សពិសេស អាយុ ៤ឆ្នាំ ចេះអាន ៤ភាសា

2017-08-17 08:27:54
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិកូរ៉េ Kim Ung-yong មានភាពឆ្លាតវៃលើសពីការស្មាន ព្រោះលោកចាប់ផ្ដើមនិយាយតាំងពីអាយុ ៤ឆ្នាំ និងចេះដោះស្រាយលំហាត់រូបវិទ្យានៅអាយុ ៣ឆ្នាំ។ រឹតតែពិសេសទៅទៀតនោះ គឺនៅអាយុ ៤ឆ្នាំ លោកអាចអានភាសាកូរ៉េ អាល្លឺម៉ង់ ជប៉ុន និងអង់គ្លេស ដែលធ្វើឲ្យគ្រប់គ្នាមានការភ្ញាក់ផ្អើលយ៉ាងខ្លាំង។

លោក Kim Ung-yong កើតនៅថ្ងៃទី៨ ខែមីនា ឆ្នាំ១៩៦២ ដែលគិតមកទល់សព្វថ្ងៃមានអាយុ ៥៥ឆ្នាំ ហើយរឿងរ៉ាវរបស់លោកបានចារជាប់ក្នុងប្រវត្តិសាស្ត្រដ៏អស្ចារ្យមួយ។ លោកបានជាប់ឈ្មោះក្នុងកំណត់ត្រា Guinness World Record ជាក្មេងដែលមាន IQ ខ្ពស់បំផុត រហូតដល់ ២១០។ ក្រោយមកកំណត់ត្រា IQ នោះត្រូវលុបចេញបញ្ជីវិញក្នុងឆ្នាំ១៩៩០ ព្រោះការវាស់ស្ទង់សមត្ថភាពខួរក្បាលមិនសុក្រឹត និងមិនអាចចាត់ទុកបុគ្គលណាជាម្ចាស់កំណត់ត្រា។

យ៉ាងណាក្ដី លោក Kim បានក្លាយជាបុគ្គលល្បីឈ្មោះទាំងវ័យក្មេង នៅទូទាំងប្រទេសកូរ៉េ រហូតដល់ប៉ុស្តិ៍ទូរទស្សន៍មួយចំនួនហៅទៅសម្ភាស និងឲ្យដោះស្រាយលំហាត់មុខអ្នកទស្សនា។ នៅអាយុ ៨ឆ្នាំ លោក Kim ត្រូវបាន NASA អញ្ជើញឲ្យធ្វើការជាមួយ។ នៅពេលនោះ លោក Kim បានយល់ព្រម និងផ្លាស់ទៅរស់នៅសហរដ្ឋអាមេរិក ហើយទទួលបានសញ្ញាប័ត្របណ្ឌិតពីសាកលវិទ្យាល័យ Colorado State University ត្រឹមអាយុ ៨ឆ្នាំ។

យ៉ាងណាក្ដី លោកបំពេញការងារផ្នែកស្រាវជ្រាវឲ្យ NASA រយៈពេល ១០ឆ្នាំ ក៏ត្រលប់ទៅប្រទេសកូរ៉េខាងត្បូងដែលជាដែនដីកំណើតវិញ។ មូលហេតុដែលលោក Kim លាឈប់ពី NASA ព្រោះគិតថា ការងារដែលលោកកំពុងធ្វើ អាចប្រើប្រាស់ក្នុងគោលបំណងនាំឲ្យខូចខាតដល់ពិភពលោក។

លោក Kim មិនចូលចិត្តធ្វើការនៅ NASA ក៏ព្រោះមានមូលហេតុមួយទៀតថា លោកដោះស្រាយបញ្ហាគណនាលឿនដូចម៉ាស៊ីន តែបែរជាថ្នាក់លើរបស់លោក ជាអ្នកយកគុណសម្បត្តិទៅវិញ។ ត្រលប់មកប្រទេសកូរ៉េវិញ ប្រជាជនបានសម្ដែងការងឿងឆ្ងល់យ៉ាងខ្លាំង ហេតុអ្វីលោកមិនលើកមុខមាត់ប្រទេសជាតិតាមរយៈការងារនោះ ហើយអ្វីដែលរឹតតែឈឺក្បាលគឺសារព័ត៌មានចាប់ផ្ដើមជីកកកាយការវិលត្រលប់របស់លោក។

បើទោះបីបានសញ្ញាប័ត្របណ្ឌិតពីអាមេរិក តែក្មេងដែលមានសមត្ថភាពពិសេសនោះ មិនអាចចុះឈ្មោះចូលរៀននៅសាកលវិទ្យាល័យណាមួយក្នុងប្រទេសកូរ៉េឡើយ ព្រោះគ្មានសញ្ញាប័ត្រកម្រិតវិទ្យាល័យ។ បន្ទាប់ពីរៀនចប់ថ្នាក់វិទ្យាល័យឡើងវិញ លោក Kim បានចុះឈ្មោះចូលរៀននៅសាកលវិទ្យាល័យមួយក្នុងប្រទេសកូរ៉េ ផ្នែកវិស្វកម្មសំណង់ស៊ីវិល។

ការសម្រេចចិត្តរបស់លោក Kim ទៅរៀនផ្នែកវិស្វកម្មសំណង់ស៊ីវិល ធ្វើឲ្យប្រជាជនខកចិត្តយ៉ាងខ្លាំង ហើយចាត់ទុកថា ជាកំពូលមនុស្សតែអត់ប្រយោជន៍។ គ្មាននរណាខ្វល់ថា លោក Kim សប្បាយចិត្តនឹងការរៀនផ្នែកវិស្វកម្មសំណង់ស៊ីវិលឡើយ ព្រោះពួកគេចង់ឲ្យបុគ្គលដែលមានខួរក្បាលខ្ពស់លើសគេនេះ ទៅធ្វើអ្វីដ៏អស្ចារ្យសម្រាប់សង្គមជាតិ។

ចំណែកលោក Kim បាននិយាយថា៖ "ខ្ញុំចង់ប្រាប់អ្នកគ្រប់គ្នាថា ខ្ញុំសប្បាយចិត្តជាមួយអ្វីដែលខ្ញុំធ្វើ តែហេតុអ្វីបានជាមនុស្សជាច្រើនចាត់ទុកសុភមង្គលរបស់ខ្ញុំ ជាបរាជ័យទៅវិញ?”។ លោក Kim ចាត់ទុកថា អ្វីដែលលោកកំពុងធ្វើ ជារឿងមានប្រយោជន៍ និងធ្វើឲ្យចិត្តរបស់លោកស្ងប់សុខក្នុងសន្តិភាព។

លោក Kim មិនដែលបានរស់នៅក្នុងជីវិតសាមញ្ញដូចមនុស្សធម្មតាឡើយ។ លោកមិនបានរៀនតាមលំដាប់លំដោយដូចក្មេងដទៃ ដែលចាប់ផ្ដើមពីថ្នាក់បឋមសិក្សា រួចបន្តទៅវិទ្យាល័យ និងបន្តចូលទៅសាកលវិទ្យាល័យ។ លោកចាប់ផ្ដើមភ្លាមដោយការទទួលសញ្ញាប័ត្របណ្ឌិត ព្រមទាំងការលើកសរសើរពីមនុស្សគ្រប់ទិសទី។ ជាមួយគ្នានោះ នៅពេលលោកត្រលប់ អ្នកដដែលសរសើរលោក បែរជារិះគន់លោក មិនធ្វើតាមអ្វីដែលពួកគេស្រមើស្រមៃ។

លោក Kim បាននិយាយថា៖ "អ្នកគ្រប់គ្នាដូចជាចាប់អារម្មណ៍លើ IQ ពេកហើយ... សង្គមមិនគួរវាយតម្លៃអ្នកណាម្នាក់ តាមរយៈសមត្ថភាពខុសប្លែកខុសស្តង់ដារនោះទេ។ គ្រប់គ្នាមានកម្រិតរៀនខុសគ្នា មានក្ដីសង្ឃឹម ទេពកោសល្យ និងក្ដីស្រមៃខុសគ្នា ហើយយើងគួរតែគោរពលើរឿងនេះ"។

លោក Kim

បច្ចុប្បន្ន លោក Kim មានអាយុ ៥៥ឆ្នាំ ហើយបានសម្រេចក្ដីស្រមៃក្លាយជាសាស្ត្រាចារ្យ នៅសាកលវិទ្យាល័យ Shinhan University។ រឿងរ៉ាវរបស់លោក Kim អាចធ្វើឲ្យមនុស្សគ្នាយល់បានថា IQ ខ្ពស់ មិនមែនជាកម្លាំងគ្មានដែនកំណត់ឡើយ។ វាគ្រាន់តែជាទេពកោសល្យពិសេសមួយដូចជា អ្នកពូកែខាងកីឡា ឬដូរ្យតន្ត្រីដែរ៕

ចុចអានអត្ថបទ៖

ប្រភព៖ storypick ប្រែសម្រួល៖ គង់ វិសាល