តំបន់ទេសចរណ៍ ៣កន្លែងវិលវិញមិនឆ្ងាយពីភ្នំពេញ ល្អបំផុតសម្រាប់រដូវភ្ជុំបិណ្ឌ

2017-09-07 03:32:42
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវភ្ជុំបិណ្ឌ មកដល់ម្ដងៗប្រជាពលរដ្ឋខ្មែរគ្រប់គ្រួសារ តែងធ្វើបុណ្យសាងកុសល នៅតាមទីវត្តអារាមនានា ហើយក៏ជាឱកាសជួបជុំគ្នាដើម្បីដើរលេងកម្សាន្ត។ ថ្ងៃនេះ Sabay សូមនាំប្រិយមិត្តទៅតំបន់ទេសចរណ៍បែបវប្បធម៌ប្រវត្តិសាស្ត្រ និងជាកន្លែងសក្ការដ៏សំខាន់ ៣កន្លែងនៅជិតរាជធានីភ្នំពេញ អាចធ្វើដំណើរវិលល្ងាចបាន។ តើតំបន់ទេសចរណ៍ទាំងនោះមានទីតាំងនៅឯណាខ្លះ? តោះទៅដើរលេងទាំងអស់គ្នា!

១. ភ្នំជីសូរ្យ

ខេត្តតាកែវជាទឹកដីប្រវត្តិសាស្ត្រ ដ៏ចំណាស់មួយនៅក្នុងប្រទេសកម្ពុជា និងមានសក្ដានុពលទេសចរណ៍មិនចាញ់ខេត្តផ្សេងៗនោះទេ។ ជាក់ស្ដែង ភ្នំជីសូរ្យ គឺជារមណីយដ្ឋានប្រវត្តិសាស្ត្រដ៏ពេញនិយមមួយស្ថិតនៅក្នុង ភូមិស្លា ឃុំរវៀង ស្រុកសំរោង មានចម្ងាយប្រហែល ៦២គីឡូម៉ែត្រប៉ុណ្ណោះពីរាជធានីភ្នំពេញ។

ឡើងទៅដល់កំពូលភ្នំភ្ញៀវទេសចរទាំងឡាយ នឹងភ្លាំងភ្លឹកគយគន់សម្រស់ធម្មជាតិដ៏ស្រស់បំព្រង គ្របដណ្ដប់ដោយខ្យល់អាកាសដ៏បរិសុទ្ធ។ ជាពិសេសនោះបងប្អូនទេសចរ នឹងបានទស្សនាប្រាសាទបុរាណមួយឈ្មោះថា "ប្រាសាទភ្នំជីសូរ្យ" កសាងឡើងដោយព្រះបាទសូរ្យវរ្ម័នទី១ តាំងពីសតវត្សទី១១មកម្ល៉េះ។ សម្រស់ធម្មជាតិ បន្ថែមដោយក្បូរក្បាច់រចនាដ៏ល្អវិចិត្រនៅលើតួប្រាសាទ បានធ្វើឱ្យទីតាំងមួយនេះ រំលេចចេញជាផ្ទាំងទស្សនីយភាពគយគន់មិនចេះជិនណាយ។

២. ប្រាសាទស្រីគ្រប់លក្ខណ៍នៅចង្កេះភ្នំបាសិតត្រៃត្រឹង្ស

ធ្វើដំណើរប្រមាណ ២០គីឡូម៉ែត្រពីរាជធានីភ្នំពេញ ភ្ញៀវទេសចរនឹងទៅដល់ប្រាសាទបុរាណមួយឈ្មោះថា "ប្រាសាទស្រីគ្រប់លក្ខណ៍" នៅចង្កេះភ្នំបាសិតត្រៃត្រឹង្ស ស្ថិតនៅក្នុងភូមិចម្ការស្វាយ ឃុំជ្វាំង ស្រុកពញាឮ ខេត្តកណ្ដាល។ ប្រាសាទបុរាណនៅជិតបង្កើយនេះ កសាងឡើងអំឡុងចុងសតវត្សទី ៧ ដើមសតវត្សទី៨ គ្របដណ្ដប់ដោយដើមឈើត្រឈឹងត្រឈៃ និងខ្យល់អាកាសដ៏បរិសុទ្ធ ហើយក៏ជាទីសក្ការមួយដ៏សំខាន់សម្រាប់ប្រជាពលរដ្ឋខ្មែរ តែងទៅបន់ស្រន់សុំសេចក្ដីនៅទីនោះ។

អ្វីដែលគួរឱ្យចាប់អារម្មណ៍ពីភ្ញៀវទេសចរនោះ គឺមានរូងភ្នំបុរាណមួយមានប្រវែងរហូតដល់ ២៤ម៉ែត្រចាប់ពីប្រាសាទ ធ្លាយរហូតដល់ភ្នំព្រះរាជទ្រព្យឯណោះ។ បើតាមចាស់ៗនៅកន្លែងនេះប្រាប់ថា រូងភ្នំនេះមានអាយុកាលប្រហែលជា១៤០០ឆ្នាំមកហើយ ដោយមានទាក់ទិននឹងរឿងប្រវត្តិសាស្ត្រជាច្រើន របស់ប្រទេសកម្ពុជាទៀតផង។

៣. ភ្នំប្រុសភ្នំស្រី

ភ្នំប្រុសភ្នំស្រី គឺរមណីយដ្ឋានធម្មជាតិមួយ ស្ថិតក្នុងភូមត្រពាំងចារ ឃុំក្រឡា ស្រុកកំពង់សៀម មានចម្ងាយប្រមាណ ៧គីឡូម៉ែត្រពីទីរួមខេត្តកំពង់ចាម និងចម្ងាយប្រមាណ ១១៤គីឡូម៉ែត្រ ពីរាជធានីភ្នំពេញ។ វត្តភ្នំប្រុសមានឈ្មោះជាផ្លូវការហៅថា "វត្តសុវណ្ណគិរីរតនៈភ្នំប្រុស"។ នៅចំទិសខាងជើងចម្ងាយប្រមាណ ១០០០ម៉ែត្រគេអាចមើលឃើញភ្នំមួយទៀតដែលមានកំពូលស្រួចឈ្មោះថា "ភ្នំស្រី"។ ចំណែកនៅផ្នែកខាងជើងភ្នំស្រី មានជួរភ្នំរកេតរកូតជាច្រើនទៀតមានឈ្មោះថា ភ្នំដងរែក ភ្នំលី ភ្នំឈូក។

មិនត្រឹមតែជាតំបន់ទេសចរមួយដ៏ទាក់ទាញប៉ុណ្ណោះទេ តែភ្នំប្រុសភ្នំស្រី មានប្រវត្តិរឿងរ៉ាវជាច្រើន អាចសិក្សារៀនសូត្រ ទាក់ទងនឹងប្រពៃណីស្ដីដណ្ដឹងកូនចៅរបស់ប្រជាពលរដ្ឋខ្មែរទៀតផង។ ចំណែក ពុទ្ធបរិស័ទទាំងអស់ក៏អាចធ្វើបុណ្យដាក់ទាន អុជធូបសុំសេចក្ដីសុខ នៅក្នុងវត្តអារាមលើកំពូលភ្នំ ហើយក៏ជាទីតាំងដ៏ល្អបំផុតសម្រាប់លម្ហែកាយនារដូវបុណ្យទាននេះ៕