សមាគម​គ្រូ​ពេទ្យ​ទារក​កម្ពុជា​ ​ត្រូវ​បាន​បង្កើត​ឡើង​ក្នុង​គោល​បំណងលើកកម្ពស់សុខមាលភាព​រវាង​ ​ទារក​ ​ម្ដាយ​ ​និង​គ្រូពេទ្យ​ឲ្យកាន់​តែ​ប្រសើរ​នៅក្នុង​វិស័យ​សុខាភិបាល​នៅ​កម្ពុជា។​ សមាគមនេះ បាន​សម្ពោធជា​​ផ្លូវការនៅថ្ងៃទី២៥ ខែវិច្ឆិកា ឆ្នាំ២០១៧ ​ចូលរួម​គាំទ្រ​ដោយឯកឧត្តមសាស្ត្រាចារ្យ​ ធា គ្រុយ ​រដ្ឋលេខា​ធិការ​នៃ​ក្រសួងសុខាភិបាល​ និង សាស្រ្តាចារ្យ ​វេជ្ជបណ្ឌិត ​គិលានុប្បដ្ឋយិការ​ ពេទ្យ ​ឆ្មប និងនិស្សិត មកពីមន្ទីរពេទ្យ  ស្ថាប័ន និង​សកលវិទ្យាល័យ​វេជ្ជសាស្រ្ត​សំខាន់ៗ​ជាច្រើន។ ​

លោកស្រី​សាស្រ្តាចារ្យ​ ​អ៊ឹម សិទ្ធិការ្យ ​ជា​ប្រធាន​សមាគមគ្រូពេទ្យកម្ពុជា បាន​មាន​ប្រសាសន៍​ថា សមាគមគ្រូ​ពេទ្យទារក​កម្ពុជា​ ​ជាសមាគម​ដែលបង្កើតឡើង​ដោយ​ក្រុមគ្រូពេទ្យ​ជំនាញ​ខាងសម្ភព​ និង​គ្រូពេទ្យ​ជំនាញ​ខាងកុមារ និងទារក ក្រោម​គោល​បំណង​ ៣សំខាន់​ៗ ​គឺ៖

• បង្កើត​ឲ្យមាន​ទំនាក់ទំនង​ជិតស្និត​រវាង​គ្រូពេទ្យ​ម្តាយ​ (សម្ភព) និង​គ្រូពេទ្យ​កុមារ​ និង​ទារក​ (កូន)​

• ​លើកកម្ពស់​សុខភាព​ម្តាយ​ ​និង​កូន ដោយ​បង្កើន​ការចេះ​ដឹងផ្នែក​ថែទាំ​ព្យាបាល​ទារក​តាមរយៈ​វគ្គបណ្តុះ​បណ្តាល​បន្ត​ សិក្ខាសិលា ​សន្និសីទ​ ដែលមាន​គ្រូពេទ្យ​ជំនាញ​មក​ពីក្នុង​ និង​ក្រៅប្រទេស​មកចែក​រំលែក​បទ​ពិសោធន៍​

• បង្កើត​ឲ្យមាន​គោលការណ៍​ណែនាំ​ថ្នាក់ជាតិ ​ក្នុងការ​អនុវត្តថែទាំ​ទារក​តែមួយ​។

លោកស្រី​សាស្រ្តាចារ្យ បញ្ជាក់ថាៈ "បេស​កកម្មរបស់​សមាគម​គ្រូពេទ្យ​ទារក​កម្ពុជា​ គឺ​ចូលរួម​ធានា​និរន្តរ៍ភាព​សង្គម​ក្នុង​ការ​កាត់បន្ថយ​អត្រាមរណៈ​របស់ទារក​ទើប​នឹង​កើត​”។

ឯកឧត្តម​សាស្ត្រាចារ្យ​ ​ធា គ្រុយ ​រដ្ឋលេខាធិការ​នៃក្រសួង​សុខាភិបាល​ ថ្លែងគាំទ្រ​ចំពោះ​ការ​បង្កើត​សមាគម​គ្រូពេទ្យ​ទារក​កម្ពុជា​នេះ​ឡើង​ផងដែរ​ ​ដោយ​សង្ឃឹម​ ​និងជឿជាក់​យ៉ាង​មុត​មាំ​ថា សមាគម​នឹងពិតជា​បានចូលរួម​ចំណែក​ក្នុងការ​កាត់បន្ថយ​អត្រា​មរណៈរបស់​ទារកទើប​កើត​ តាមរយៈ​សកម្មភាព​ដែលចូលរួម​ដោយគ្រូពេទ្យ​ជំនាញ​ជាច្រើន​ក្នុង​ពេល​ខាងមុខ​៕

អត្ថបទ៖ ស៊ិន សាវ៉េត