ជប៉ុន បញ្ជូនប្រតិភូសហព័ន្ធការ៉ាតេដូជប៉ុន មកបង្វឹកកីឡាការ៉ាតេដល់កម្ពុជា
- 2017-11-29 03:43:20
- ចំនួនមតិ 0 | ចំនួនចែករំលែក 0
ជប៉ុន បញ្ជូនប្រតិភូសហព័ន្ធការ៉ាតេដូជប៉ុន មកបង្វឹកកីឡាការ៉ាតេដល់កម្ពុជា
ចន្លោះមិនឃើញ
ក្រសួងការបរទេសជប៉ុននឹងបញ្ជូនគ្រូបង្វឹកកីឡាការ៉ាតេជប៉ុនចំនួន៥រូបមកពីសហព័ន្ធការ៉ាតេដូជប៉ុនដើម្បីធ្វើការបង្វឹកកីឡាការ៉ាតេ ដែលជាកីឡាយុទ្ធសិល្ប៍ជប៉ុនដ៏ល្បីល្បាញបំផុត ដល់កម្ពុជាចាប់ពីថ្ងៃទី៣០ ខែវិច្ឆិកា ដល់ថ្ងៃទី៤ ខែធ្នូ ឆ្នាំ២០១៧ ក្រោមកម្មវិធី «កីឡាសម្រាប់ថ្ងៃស្អែក» ដោយកិច្ចសហការជាមួយខេមរៈសហព័ន្ធការ៉ាតេដូកម្ពុជា (CKF)។
ការបញ្ចូនគ្រូបង្វឹកកីឡាការ៉ាតេជប៉ុនត្រូវបានធ្វើឡើងដើម្បីឆ្លើយតបទៅនឹងសំណើរបស់ ឯកឧត្តមបណ្ឌិតសភាចារ្យ អូន ព័ន្ធមុនីរត្ន ដែលជាប្រធាន CKFអំឡុងពេលដែលឯកឧត្តមបានធ្វើដំណើរទស្សនកិច្ចនៅប្រទេសជប៉ុនឆ្នាំមុន។
គណៈប្រតិភូនឹងចូលជួបសម្ដែងការគួរសមដល់ ឯកឧត្តមបណ្ឌិតសភាចារ្យ អូន ព័ន្ធមុនីរត្ន ប្រធានCKF និងឯកឧត្តមបណ្ឌិត ហង់ ជួនណារុន រដ្ឋមន្រ្តីក្រសួងអប់រំ យុវជន និង កីឡា។ គ្រូបង្វឹកកីឡាការ៉ាតេនឹងបង្វឹកអត្តពលិកការ៉ាតេកម្ពុជានិងអាជ្ញាកណ្តាលនៅថ្ងៃទី២ និងទី៣ ខែធ្នូ ឆ្នាំ២០១៧ នៅមជ្ឈ- មណ្ឌលជាតិហ្វឹកហាត់កីឡាការ៉ាតេដែលស្ថិតនៅក្នុងសាកលវិទ្យាល័យភូមិន្ទភ្នំពេញ។
ការបញ្ចូនប្រតិភូទាំងនេះ នឹងអាចពង្រឹងនូវទំនាក់ទំនងមិត្តភាពរវាងជប៉ុន និងកម្ពុជា ក៏ដូចជាអភិវឌ្ឍចលនា ការឆ្ពោះទៅកាន់កីឡាអូឡាំពិក កីឡាប៉ារ៉ាឡាំពិក តូក្យូ២០២០ និងកីឡាស៊ីហ្គេម ដែលនឹងរៀបចំឡើងក្នុងប្រទេសកម្ពុជានៅឆ្នាំ២០២៣៕