ជើងឯករងទូទាំងប្រទេស Rolling FC បើកឆាកធ្វើបានល្អ Tiger Street Football 2020

2020-02-27 04:20:33
ចំនួនមតិ 0 | ចំនួនចែករំលែក 0

ចន្លោះមិនឃើញ

Rolling FC ជើងឯករងពានរង្វាន់ Tiger Street Football 2019 កន្លងទៅ នៅតែធ្វើបានល្អដដែលថ្ងៃបើកឆាកឆ្នាំ២០២០នេះ ដោយយកឈ្នះលើក្រុមឆន្ទៈកីឡា ក្នុងលទ្ធផល ៥-១។

លោក សៀក សុវណ្ណ ថ្នាក់ដឹកនាំរបស់ក្រុម Rolling FC បាននិយាយថាក្រុមរបស់លោករដូវកាលនេះ បានផ្លាស់ប្ដូរកីឡាករកម្ពុជាខ្លះ ប៉ុន្តែកីឡាករបរទេសទាំងពីរនៅរក្សាដដែល។ លទ្ធផលឆ្នាំនេះ លោករំពឹងថានឹងបានល្អជាងឆ្នាំមុន ត្បិតអីក្រុមបានរៀបចំបានល្អ និងផ្លាស់ប្ដូរចំណុចអវិជ្ជមានដែលបានកើតឡើងកាលពីឆ្នាំកន្លងទៅ។

យ៉ាងណាមិញ លោកក៏បញ្ជាក់ដែរថារដូវកាលនេះ Tiger Street Football ក៏បានរៀបចំបានល្អដែរ ហើយក្រុមចូលរួមក៏សុទ្ធតែក្រុមខ្លាំង និងមានបទពិសោធច្រើន ជាពិសេសនៅមណ្ឌលភ្នំពេញតែម្ដង។ លោក ក៏បន្ថែមថាឆ្នាំនេះ Rolling ក៏បានថែម១ក្រុមទៀត ដើម្បីបង្កើនឱ្យដល់៤ក្រុមចូលរួមលេងពានរង្វាន់ខាងលើដែរ។

Tiger Street Football 2020 មណ្ឌលភ្នំពេញមានក្រុមចូលរួម១១៥ក្រុម ប្រកួតរយៈពេល៣ថ្ងៃពេញ។ ថ្ងៃនេះជាថ្ងៃទី២ហើយ សម្រាប់ការប្រកួតពានរង្វាន់ខាងលើ។ មណ្ឌលនេះ នឹងយក១២ក្រុមឡើងទៅវគ្គផ្ដាច់ព្រ័ត្រទូទាំងប្រទេស ដណ្ដើមប្រាក់រង្វាន់សរុប៥ម៉ឺនដុល្លារ៕

អត្ថបទ៖ ប្រុស យុទ្ធ