សាន់ដេ ធ្វើមេឡូឌីថ្មី ៨០ % អាល់ប៊ុម ចូលឆ្នាំប្រពៃណីជាតិ ២០១៥

2015-02-25 17:33:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្មសាន់ដេធ្វើមេឡូឌីថ្មី ៨០% នៃអាល់ប៊ុមចូលឆ្នាំប្រពៃណីជាតិ បានថតម្សិលមិញ នៅទីរួមខេត្ត កំពង់ស្ពឺ។ ការបង្កើនផលិតបទចម្រៀងជាស្នាដៃនិពន្ធរបស់កូនខ្មែរនេះ ដើម្បីឆ្លើយតបទៅនឹងការចង់បានពីមហាជន។

អ្នកចាត់ការទូទៅផលិតកម្មសាន់ដេ ឡាយ សុកចំរើន និយាយថា៖ ជារឿងពិត ៧០% ទៅ ៨០% នៃចម្រៀងចូលឆ្នាំប្រពៃណីជាតិឆ្នាំនេះ យើងធ្វើមេឡូឌីថ្មីដើម្បីតម្រូវការទីផ្សារចង់បានពីទស្សនិកជន។ យើងធ្វើនេះក៏ចង់កាត់បន្ថយការចម្លងស្នាដៃពីបរទេសឱ្យមានកម្រិតទាបបំផុត ឬមួយលែងមានសុទ្ធតែម្ដង"។

អ្នកចាត់ការទូទៅផលិតកម្ម សាន់ដេ ឡាយ សុកចំរើន ក្នុងពិធីថតចម្រៀងចូលឆ្នាំម្សិលមិញ

លោក ឡាយ សុកចំរើន បន្តថា ការធ្វើមេឡូឌីថ្មីស្ទើរតែទាំងអស់ នៃចម្រៀងចូលឆ្នាំប្រពៃណីជាតិរបស់ផលិតកម្ម សាន់ដេ មិនមែនជារឿងថ្មីឡើយ គឺធ្វើជារៀងរាល់ឆ្នាំមកហើយ។ ក៏ប៉ុន្តែឆ្នាំនេះ ហាក់ប្លែកជាងឆ្នាំមុនៗកន្លងទៅ។ ប្លែកត្រង់ថា មានបញ្ចូលតារាកំប្លែងមួយចំនួនមកពី CTN ដូចជា នាយ ក្រូច នាយ ចឺម នាង អ៊ីត និង នីឡា ជាដើម។

អ្វីដែលពិសេសជាងនេះ អ្នកចាត់ការវ័យក្មេងខាងលើ អះអាងថា អាល់ប៊ុមចម្រៀងចូលឆ្នាំប្រពៃណីជាតិ ទាំងជាង ៥០ បទ ផលិតកម្ម សាន់ដេលក់ត្រឹមតម្លៃ ២ ពាន់រៀលប៉ុណ្ណោះ។ ការលក់បញ្ចុះតម្លៃមកនៅកម្រិតទាបដូច្នេះ ដើម្បីឱ្យមនុស្សទូទៅអាចទិញយកទៅស្ដាប់បានទាំងអស់គ្នា។

តាមរយៈការលក់ CD និង VCD Original បញ្ចុះតម្លៃមកនៅត្រឹម ២ ពាន់រៀលលោក ឡាយ សុកចំរើន ជឿជាក់ថា ផលិតកម្ម សាន់ដេនឹងអាចបំបែកកំណត់ត្រានៃការលក់បទចម្រៀងនៅក្នុងប្រទេស កម្ពុជានាពេលខាងមុខ។ មិនត្រឹមតែទីផ្សារក្នុងស្រុកទេ នៅតាមបណ្ដាប្រទេសមួយចំនួនលើពិភពលោកក៏អាចលក់ក្នុងតម្លៃនេះដែរ ដូចជា សហរដ្ឋអាមេរិក កាណាដា ជប៉ុន អូស្ត្រាលី បារាំង ចិន ជាដើម។

ផលិតកម្ម សាន់ដេ នឹងចាប់អនុវត្តការលក់បញ្ចុះតម្លៃត្រឹម ២ ពាន់រៀល ចាប់ពីពាក់កណ្ដាលខែ កុម្ភៈ ឆ្នាំ២០១៥ នេះ តទៅ រហូតដល់ចូលឆ្នាំប្រពៃណីជាតិរួច។ ក្រៅតែពីអាល់ប៊ុមចូលឆ្នាំប្រពៃណីជាតិ CD និង VCD ផ្សេងទៀតក៏លក់ក្នុងតម្លៃនេះដូចគ្នា ហើយប្រសិនបើមានការគាំទ្រច្រើនពីប្រជាជនខ្មែរកាន់តែខ្លាំងខាង សាន់ដេនឹងបន្តបញ្ចុះតម្លៃតទៅទៀត។ លោក ឡាយ សុកចំរើន និយាយ៕