គ្រូតាក្រមាមាស សាន គឹមស៊ាន ហ៊ានលះបង់ទាំងជីវិតដើម្បីល្បុក្កតោខ្មែរ

2015-04-13 15:00:45
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូតាក្រមាមាស សាន គឹមស៊ាន ដែលដឹកនាំកូនសិស្សសម្តែងក្បាច់គុនល្បុក្កតោក្នុងឱកាសបុណ្យចួលឆ្នាំថ្មីប្រពៃណីជាតិនៅអង្គរសង្ក្រាន្តឆ្នាំនេះ បានប្ដេជ្ញាចិត្តលះបង់គ្រប់បែបយ៉ាង សូម្បីតែជីវិតក៏លោកមិនស្តាយដើម្បីផ្ទេរចំណេះដឹង និងអភិរក្សល្បុក្កតោទុកដល់ខ្មែរជំនាន់ក្រោយ។

ក្នុងឱកាសបុណ្យចូលឆ្នាំខ្មែរប្រពៃណីជាតិអង្គរសង្ក្រាន្តនៅមុខប្រាសាទអង្គរវត្តរយៈពេល៣ថ្ងៃនេះ លោក សាន គឹមស៊ានបានដឹកនាំកីឡាករ កីឡាការិនីល្បុក្កតោជាង១០០នាក់សម្ដែងជួនភ្ញៀវជាតិ និងអន្តរជាតិបានទស្សនាកម្សាន្ត។

ពាក់ព័ន្ធនឹងការសម្តែងនេះ លោកគ្របានលើកឡើងថា លោកពិតជាមានមោទនភាពណាស់ដែលបានយកវប្បធម៌ខ្មែរមកបង្ហាញក្នុងព្រឹត្តិការណ៍បុណ្យចូលឆ្នាំថ្មីប្រពៃណីជាតិខ្មែរ និងជ្រើសរើសយកក្បាច់គុនមរតកដូនតាខ្មែរដ៏រស់រវើកដែលមាននៅលើថ្មប្រាសាទនានាមកសម្ដែងឲ្យមហាជន និងពិភពលោកបានឃើញក្នុងឱកាសអង្គរសង្ក្រាន្តមុខប្រាសាទអង្គរ។

លោកគ្រូបន្តថា ទោះមានភាពហត់នឿយយ៉ាងណាក៏ ក្រុមល្បុក្កតោរបស់លោកមិនរាថយឡើយ។ ផ្ទុយទៅវិញក្រុមរបស់លោកនឹងប្រឹងប្រែងសម្តែងឲ្យអស់ពីលទ្ធភាពដើម្បីឲ្យទស្សនិកជនមិនខកបំណង។

ចំពោះរូបលោកផ្ទាល់វិញ លោកស្ម័គ្រចិត្តយកជីវិត និងគ្រូសាធ្វើជាអ្នកបម្រើដល់ប្រជាជនកម្ពុជាតាមរយៈការផ្សព្វផ្សាយក្បាច់គុនខ្មែរល្បុក្កតោ។ លោកមានប្រសាសន៍ថា ៖«ខ្ញុំបានអុជធូបស្បថសំពះមុខព្រះជាមួយប្រពន្ធ និងកូនប្រុសហើយថា យើងទាំង៣នាក់ស្ម័គ្រចិត្តយកជីវិតបូជាជូនពលរដ្ឋខ្មែរដើម្បីឲ្យប្រទេសកម្ពុជាមានពេជ្រមួយគ្រាប់លើទឹកដីខ្មែរ»។

បុរសវ័យជាង៧០ឆ្នាំបានឲ្យដឹងទៀតថា លោកមិនទទួលបានផលប្រយោជន៍អ្វីក្រៅពីបាយបីពេលនិងជីវិតពោរពេញដោយភាពសោកសៅដោយសាសង្គមមិនសូវយកចិត្តទុកដាក់ចំពោះក្បាច់គុនវប្បធម៌របស់ខ្មែរ។ លោកសង្ឃឹមថា ក្បាច់គុនដែលជាសម្បត្តិរបស់ខ្មែរនឹងល្បីដូចកាលសម័យអង្គរវិញ។

លោកគ្រូតាក្រមាមាសអាយុ៧០ឆ្នាំរូបនេះមានប្រពន្ធឈ្មោះ អុក ពង្សបុប្ផា និងកូនប្រុសឈ្មោះ សាន អង្គររាជវ័ន្ត។ សព្វថ្ងៃកូនប្រុសវ័យ១៩ឆ្នាំរបស់លោកបានបោះបង់ការសិក្សា និងកំពុងផ្សព្វផ្សាយក្បាច់គុនល្បុក្កតោខ្មែរនៅសហរដ្ឋអាមេរិក៕