ក្រុមហ៊ុនចិន គ្រោងច្នៃលាមកខ្លាឃ្មុំផេនដា ធ្វើជាក្រដាសជូតមាត់

2017-12-21 02:29:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនចិនមួយដែលមានមូលដ្ឋាននៅខេត្តស៊ីឈួនប្រទេសចិន បានចុះកិច្ចព្រមព្រៀងជាមួយមជ្ឈមណ្ឌលអភិរក្ស និងស្រាវជ្រាវរបស់ចិន ដើម្បីកែច្នៃលាមកសត្វខ្លាឃ្មុំផេនដាទៅជាក្រដាសជូតមាត់។

តាមកាសែត Xinhua ឲ្យដឹងថា ក្រុមហ៊ុនផលិតក្រដាស Sichuan Qianwei Fengsheng បានប្រកាសកាលពីថ្ងៃច័ន្ទថា ពួកគេនឹងធ្វើការកែច្នៃលាមកខ្លាឃ្មុំផេនដា និងសំណល់ចំណីអាហារពីមជ្ឈមណ្ឌលដែលមានទីតាំងស្ថិតនៅសួនសត្វ Wolong និង Bifengxia នៅទីក្រុង Dujiangyan ។

យោងតាមលោក Huang Yan អ្នកស្រាវជ្រាវនៅមជ្ឈមណ្ឌលសិក្សាស្រាវជ្រាវខ្លាឃ្មុំផេនដាដ៏ធំមួយបានឱ្យដឹងថា ខ្លាឃ្មុំផេនដាពេញវ័យអាចស៊ីដើមឫស្សីចាប់ពី ១២ ទៅ ១៥ គីឡូក្រាមក្នុងមួយថ្ងៃ។ ដូចនេះវាអាចផលិតលាមកលើសពី ១០ គីឡូក្រាមក្នុងមួយថ្ងៃ ដោយសារតែវាសម្បូរទៅដោយជាតិសរសៃបន្ទាប់ពីជាតិស្ករត្រូវបានស្រូបយកនៅពេលឆ្លងកាត់ប្រព័ន្ធរំលាយអាហាររបស់ខ្លាឃ្មុំផេនដា។

ក្រុមហ៊ុនត្រូវបានគេរាយការណ៍ថា នឹងដាក់លក់ក្រដាសជូតមាត់ដែលធ្វើពីលាមកខ្លាឃ្មុំផេនដានេះ ក្នុងតម្លៃ ៤៣ យ័ន (៦,៥៤ ដុល្លារ) ក្នុងមួយប្រអប់។ ប៉ុន្តែ មនុស្សជាច្រើនព្រួយបារម្ភអំពីការចម្លងរោគដោយបាក់តេរីពីក្រដាសជូតមាត់នោះ ដោយសារតែវាត្រូវបានផលិតចេញពីលាមក។

ទោះជាយ៉ាងណាក៏ដោយ លោក Zhou Chuanping អ្នកគ្រប់គ្រងរបស់ក្រុមហ៊ុននេះបានអះអាងថា ពួកគេនឹងប្រើប្រាស់វិធីសម្លាប់បាក់តេរីទាំងអស់ដែលមាននៅក្នុងលាមក មុនពេលយកមកកែច្នៃទៅជាក្រដាសជូតមាត់ ហើយក្រុមហ៊ុននឹងប្រមូលលាមកពីមជ្ឈមណ្ឌលស្រាវជ្រាវរៀងរាល់ ៣ ទៅ ៧ ថ្ងៃម្តង៕