មិនព្រមក្រោកឈរគោរពភ្លេងជាតិ និស្សិត ២នាក់ត្រូវបណ្ដេញចេញពីពិធីប្រគល់សញ្ញាបត្រ

2017-12-20 04:11:34
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតពីរនាក់នៅសកលវិទ្យាល័យបច្ចេកវិទ្យាហុងកុង (HKCT) ត្រូវបានបណ្តេញចេញពីពិធីបញ្ចប់ការសិក្សានៅថ្ងៃទី ១៦ ខែធ្នូ បន្ទាប់ពីពួកគេមិនក្រោកឈរគោរពភ្លេងជាតិរបស់ប្រទេសចិន។

មន្រ្តីនៃសាលារៀនក៏បានជូនដំណឹងជាមុនដល់និស្សិតបញ្ចប់ការសិក្សាទាំងអស់ អំពីច្បាប់និងឥរិយាបថរបស់ពួកគេនៅក្នុងពិធីរបស់មហាវិទ្យាល័យ Ma On Shan ជាពិសេសនៅពេលគោរពភ្លេងជាតិផងដែរ។

បើទោះបីជាមានការជូនដំណឹងយ៉ាងណាក៏ដោយ និស្សិតទាំងពីរនាក់ នោះនៅតែអង្គុយ និងបដិសេធមិនព្រមធ្វើតាមនោះទេ នេះបើយោងតាមកាសែត People's Daily ។

មហាវិទ្យាល័យ HKCT ត្រូវបានរាយការណ៍ថា បានផ្អាកពិធីនេះរយៈពេល ២០ នាទី ដោយសារតែសិស្សពីរនាក់មិនក្រោកឈរគោរពភ្លេងជាតិ ហើយក៏ត្រូវបានបណ្ដេញចេញពីកន្លែងពិធីនោះ។ មួយសន្ទុះក្រោយមកមិត្តរួមថ្នាក់របស់ពួកគេមួយក្រុម បានដើរចេញតាមក្រោយ ដើម្បីបង្ហាញពីការមិនគាំទ្រចំពោះការបណ្ដេញចេញនោះ។

សកលវិទ្យាធិការ លោក Chan Cheuk Hay និយាយថា "ក្នុងនាមជាសាកលវិទ្យាល័យមួយដែលស្រឡាញ់ទាំងស្រុកកំណើតរបស់ខ្លួន និងហុងកុង, សកលវិទ្យាល័យ HKCT នឹងនៅតែមានសេចក្ដីស្នេហាជាតិ" ។ លោកបានបន្តកត់សម្គាល់ និងរំលឹកសិស្សអំពីឋានៈរបស់សាលាដែលពាក់ព័ន្ធនឹងបញ្ហានេះ ហើយបានលើកឡើងថា ប្រសិនបើនិស្សិតទាំងអស់មិនដឹងពីវានោះទេ នោះប្រហែលជាពួកគេបានជ្រើសរើសសាកលវិទ្យាល័យខុសហើយ។ ចំពោះសិស្សទាំងអស់ដែលបានដើរចេញពីពិធីបញ្ចប់ការសិក្សានេះ មិនទទួលបានសញ្ញាប័ត្ររបស់ពួកគេនោះទេ។

គួរបញ្ជាក់ថា កាលពីខែកញ្ញា ប្រទេសចិនបានអនុម័តច្បាប់យ៉ាងតឹងរឹងមួយ ដែលអាចឲ្យអ្នកណាម្នាក់ជាប់គុករយៈពេល ១៥ ថ្ងៃ សម្រាប់ការមិនគោរពភ្លេងជាតិ ហើយច្បាប់នេះត្រូវបានអនុវត្តនៅហុងកុងក្នុងខែវិច្ឆិកា៕