កសិករចិន ចង់បានយន្តហោះតាំងពីក្មេង តែអត់លុយទិញ ចុងក្រោយសាងសង់ខ្លួនឯង ដូចពិតៗ

2017-12-19 08:12:52
ចំនួនមតិ 0 | ចំនួនចែករំលែក 0

ចន្លោះមិនឃើញ

កសិករម្នាក់នៅក្នុងប្រទេសចិន បានចំណាយប្រាក់សន្សំទាំងអស់របស់ខ្លួន ដើម្បីសម្រេចក្ដីសុបិនតាំងពីកុមារភាពមក ពោលគឺធ្វើជាម្ចាស់យន្តហោះមួយគ្រឿងឲ្យបាន។

លោក Zhu Yue មកពីទីក្រុង Kaiyuan ខេត្ត Liaoning ប្រទេសចិន បានអះអាងថា លោកបានបង្រៀនខ្លួនឯងពីរបៀបសាងសង់យន្តហោះ ដោយការរៀនអស់រយៈពេល ៣ខែ ពីបច្ចេកទេសគំនូរ និង ម៉ូដែលយន្តហោះ។

លោក Zhu Yue

រហូតមកដល់ពេលនេះ លោកបានចំណាយប្រាស់ អស់ជាង ៨០០ ០០០យ័ន ឬប្រមាណជា ១២០ ០០០ដុល្លារហើយ។ នេះបើយោងតាមសារព័ត៌មានចិន People's Daily Online។

លោក Zhu បានប្រាប់ឲ្យដឹងថា លោកស្រលាញ់ចូលចិត្តយន្តហោះតាំងពីក្មេង ហើយដោយសារតែលោកគ្មានលទ្ធភាពទិញ ទើបសម្រេចចិត្តសាងសង់ឡើងដោយខ្លួនឯងតែម្ដង។

គួរឲ្យដឹងថា យន្តហោះរបស់ លោក Zhu គឺដូចបេះបិទទៅនឹង យន្តហោះ Airbus A320 ដែលមានតម្លៃ ៩៩លានដុល្លារអីចឹង។ ស្លាបរបស់វាមានប្រវែង ៣៥,៨ម៉ែត្រ ហើយយន្តហោះមានប្រវែង ៣៧,៧៥ម៉ែត្រ។ មកទល់នឹងពេលនេះ លោក Zhu បានប្រើប្រាស់ដែកអស់ចំនួន ៤០តោនហើយក្នុងការសាងសង់យន្តហោះមួយគ្រឿងនេះ ដែលនឹងត្រូវរួចរាល់ នៅខែឧសភា ឆ្នាំ២០១៨ ខាងមុខ។

ទោះជាយ៉ាងណា យន្តហោះ A320 របស់លោក Zhu មិនអាចហោះហើរបានឡើយ ហើយលោកគ្រោងប្រើវាបើជាភោជនីយដ្ឋាននៅខាងក្នុង ឬយកវាធ្វើជាផ្ទះសម្រាប់រស់នៅ។

គួរបញ្ជាក់ថា លោក Zhu បាននិងកំពុងសាងសង់យន្តហោះមួយគ្រឿងនេះ ជាមួយមិត្តភ័ក្ដិចំនួន ៥នាក់ផ្សេងទៀត នៅក្នុងរោងចក្រជួលមួយកន្លែង ស្ថិតក្នុងទីក្រុង Kaiyuan ប្រទេសចិន៕