Justin ជិះឡានតុបតែងបុណ្យគ្រីស្តម៉ាស ទៅសួរសុខទុក្ខ Selena បន្ទាប់ពីម្ដាយនាងចូលពេទ្យ

2017-12-21 08:08:37
ចំនួនមតិ 0 | ចំនួនចែករំលែក 0

ចន្លោះមិនឃើញ

Justin Bieber ឆ្លៀតពេលសួរសុខទុក្ខ Selena បន្ទាប់ពីម្ដាយនាងចូលពេទ្យ ដោយជិះរថយន្តតុបតែងសម្រាប់បុណ្យគ្រីស្តម៉ាស

តារាចម្រៀង Justin Bieber មើលទៅពិតជាពេញចិត្តពិធីបុណ្យគ្រីស្តម៉ាសខ្លាំងណាស់ រហូតដល់ថ្នាក់តុបតែងរថយន្តខ្លួនឯងពោរពេញទៅដោយផ្ទាំងគំនូរគ្រីស្តម៉ាសពាសពេញ ដែលមានតម្លៃមិនតិចជាង ១២,៣ម៉ឺនដុល្លារ។

តារាសញ្ជាតិកាណាដា វ័យ២៣ឆ្នាំរូបនេះ បានត្រូវគេប្រទះឃើញចាកចេញពីផ្ទះរបស់ Selena Gomez នៅ Toluca Lake រដ្ឋកាលីហ្វ័រញ៉ា ឆ្ពោះទៅកាន់ព្រះវិហារយេស៊ូដើម្បីបំពេញកិច្ចការខ្លួន។

ម្ចាស់បទ "Sorry” មកសួរសុខទុក្ខសង្សារខ្លួន Selena Gomez បន្ទាប់ពីម្ដាយនាង គឺអ្នកស្រី Mandy Teefey ទើបតែត្រូវបញ្ជូនទៅកាន់មន្ទីរពេទ្យថ្មីៗនេះ។ អ្នកស្រី Mandy បានស្ម័គ្រចិត្តទៅកាន់មន្ទីរពេទ្យដោយខ្លួនឯង ដើម្បីពិនិត្យសុខភាពកាលពីយប់ថ្ងៃអង្គារ នេះបើតាមការរាយការណ៍របស់ TMZ។

ខណៈនោះដែរ មានការរាយការណ៍ជាច្រើនបំភ្លៃព័ត៌មានថា អ្នកស្រី Teefey ចូលពេទ្យដោយសារតែឈ្លោះគ្នាជាមួយកូនស្រី Selena ក្រោយនាងមកទាក់ទងជាមួយ Justin វិញ។ ប្រភពមួយជិតស្និទ្ធនឹងអ្នកស្រីបានបដិសេធពាក្យចចាមអារ៉ាមមួយនេះ ទៅកាន់ទស្សនាវដ្ដី People។

ប្រភពនោះបានបន្តទៀតថា ទោះបីជាគ្រួសារ Selena មិនពេញចិត្តខ្លាំង ពេលនាងត្រលប់ទៅទាក់ទង Justin វិញក៏ដោយ ពួកគេនៅតែយល់ស្របនឹងនាង។

ចំណែកឯ Justin ក៏ដឹងថាគ្រួសាររបស់ Selena មិនទាន់ពេញចិត្តខ្លួនទាំងស្រុងដែរ ហើយនឹងខិតខំប្រើពេលវេលាខ្លះៗដែលខ្លួនមានដើម្បីជួបសួរសុខទុក្ខគ្រួសាររបស់នាង ក៏ដូចជាព្យាយាមកែប្រែខ្លួនឯងផងដែរ៕