Apple សារភាព​ថាកំណែទម្រង់ Software ខ្លួន​ធ្វើ​ឲ្យ iPhone យឺត​

  • 2017-12-27 02:04:16
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្រុមហ៊ុន Apple បាន​សារភាព​ថា​កំណែ​ទម្រង់ Software iOS របស់​ខ្លួន​បាន​ធ្វើ​ឲ្យ iPhone ចាស់ៗ​មាន​ដំណើរការ​យឺត​។ ក្រុមហ៊ុន​ធ្វើ​បែប​នេះ​ដើម្បី​រារាំង​បញ្ហា​រក​ឃើញ​ទាក់ទង​នឹង​អាយុកាល​ថ្ម (Lithium ion-batteries)។ ពេល​ថ្ម​ចាស់ វា​មិន​អាច​កាន់​ថ្ម​បាន​ល្អ​នោះ​ទេ ហើយ​អាច​រលត់​ម៉ាស៊ីន​ពេល​មាន​សំពាធ​ប្រើប្រាស់​ខ្លាំង​ពេក​។ Software របស់ Apple រារាំង​បញ្ហា​នេះ​កុំ​ឲ្យ​កើតឡើង​ដោយ​បន្ថយ​ល្បឿន​ប្រើប្រាស់​របស់​ប្រព័ន្ធ​។ 

ហេតុអ្វី​ព័ត៌មាន​នេះ​ចេញ​មក​?

លោក John Poole ស្ថាបនិក​របស់ Primate Labs បាន​និយាយ​ថា Processor ក្នុង iPhone បន្ថយ​ល្បឿន​ប្រើប្រាស់​ដោយ​អាយុកាល​ថ្ម​បាត់បង់​ប្រសិទ្ធភាព​។ អ្នក​ប្រើប្រាស់​ជាច្រើន​រំពឹង​ថា​ល្បឿន​ប្រើប្រាស់​លើ​ទូរសព្ទ​នៅ​ដដែល​ទោះ​អាយុកាល​ថ្ម​ចាស់ ប៉ុន្តែ​ការ​សាកល្បង​របស់​គាត់​បាន​បង្ហាញ​ថា​មិន​មាន​ករណី​បែប​នេះ​ទេ​។ 

ក្រុមហ៊ុន Apple និយាយ​អ្វី​ពី​រឿង​នេះ​?

ក្រុមហ៊ុន Apple និយាយ​ថា​គោលបំណង​របស់​ខ្លួន​គឺ​ផ្តល់​នូវ​បទពិសោធន៍​ល្អ​បំផុត​សម្រាប់​អតិថិជន រួមមាន​ល្បឿន និង​អាយុកាល​ប្រើប្រាស់​យូរ​អង្វែង​។ ថ្ម Lithium-ion បាន​បាត់បង់​ប្រសិទ្ធភាព​ពេល​អាកាសធាតុ​ត្រជាក់ និង​អាយុកាល​ប្រើប្រាស់​យូរ​អង្វែង ដែល​អាច​ធ្វើ​ឲ្យ Device បិទ​ដោយ​មិន​អាច​រំពឹង​ទុក ដើម្បី​ការពារ​គ្រឿង​អេឡិចត្រូនិក​ខាង​ក្នុង​។ កាល​ពី​ឆ្នាំ​មុន ក្រុមហ៊ុន​បាន​ចេញ​មុខងារ​មួយ​សម្រាប់​ដោះស្រាយ​លើ iPhone 6, 6S និង SE ដើម្បី​រារាំង​ពី​ការ​រលត់​ម៉ាស៊ីន​។ បច្ចុប្បន្ន ក្រុមហ៊ុន​ពង្រីក​មុខងារ​នោះ​ដល់ iPhone 7 លើ​ជំនាន់ iOS 11.2។ 

ហេតុអ្វី​បានជា Apple ប្រើ​ថ្ម Lithium-ion?

ថ្ម Lithium-ion ងាយ​នឹង​មាន​បញ្ហា ហើយ​មិន​មាន​ការ​ផ្លាស់ប្ដូរ​ជាច្រើន​ឆ្នាំ​។ ពីរ​បី​ឆ្នាំ​មុន ថ្ម​កម្រិត​ខ្ពស់​ប្រើ​ប្រព័ន្ធ Envia Systems នៅ​រដ្ឋ​កាលីហ្វ័រញ៉ា ដែល​ចំណាយ​ពេល​ស្រាវជ្រាវ​ច្រើន​ជាង​មួយ​ទសវត្ស ពី​ឆ្នាំ ១៩៩៥ ដល់ ២០០៧ ដើម្បី​បង្កើន​ថាមពល​រក្សាទុក​ក្នុង​ថ្ម ហើយ​តាំង​ពី​ពេល​នោះ​មក​ការ​កើនឡើង​ថាមពល​រក្សាទុក​មាន​មិន​ដល់ ៣០%។ 

យ៉ាងណាមិញ ថ្ម Lithium-ion មាន​លក្ខណៈ​ល្អ​ប្រសើរ​ដោយ​មាន​ទម្ងន់​តិច​ជាង កាន់​ថ្ម​យូរ​ជាង និង​ការ​សាក​ថ្ម​មាន​ប្រសិទ្ធភាព​ជាង​ប្រភេទ​ថ្ម​ចាស់ៗ​ផ្សេង​ទៀត បើ​យោង​តាម​សៀវភៅ​ណែនាំ​អំពី​ថ្ម​របស់​ក្រុមហ៊ុន Apple។ ថ្ម Lithium-ion បាន​ប្រើប្រាស់​ក្នុង Device របស់ Apple ត្រូវ​បាន​រចនា​ឡើង​អាច​កាន់​បាន​យ៉ាង​ហោចណាស់ ៨០% នៃ​សមត្ថភាព​ដើម​សម្រាប់​ការ​សាក​ពេញលេញ ៥០០ ដង (រាប់​ពី ០ ទៅ ១០០ ចំនួន ៥០០ ដង)។ 

មាន​អ្វី​កើតឡើង​ពេល​ថ្ម iPhone ចាស់?

អាយុកាល iPhone ចាស់​មិន​អាច​កាន់​ថាមពល​បាន​ល្អ​ដូច​ថ្ម​ថ្មី​នោះ​ទេ ហើយ​អាច​កាន់​តែ​មាន​បញ្ហា​ពេល​ការ​សាក​ថ្ម​មាន​កម្រិត​ទាប ឬ​ពេល​សីតុណ្ហភាព​ចុះ​ត្រជាក់​។ ថ្ម​របស់​អ្នក​មិន​អាច​សាក​លើស​ពី ៨០%នោះ​ទេ​ក្រោយ​បាន​ការ​សាក​បាន ៥០០ជុំ ដូច្នេះ​អ្នក​មិន​អាច​ប្រើ​បាន​យូរ​នោះ​ទេ​។ ប្រសិនបើ​ថ្ម​មិន​កាន់​ល្អ Device អាច​នឹង​រលត់ ដោយ Processor ចង់​បាន​ល្បឿន​លឿន តែ​ថ្ម​មិន​អាច​ផ្តល់​ឲ្យ​គ្រប់គ្រាន់​។ 

តើ​នេះ​ជា​លើក​ដំបូង​មែន​ទេ Apple ព្យាយាម​បង្កើន​អាយុកាល​ថ្ម​ប្រើប្រាស់​?

Apple បាន​ផ្ដោត​លើ​ការ​គ្រប់គ្រង​ថាមពល​ជា​យូរ​មក​ហើយ ដើម្បី​ឲ្យ​ថាមពល​ថ្ម​ប្រើ​បាន​យូរ​លើ Device។ ជំនាន់ iOS 9 ក្នុង​ឆ្នាំ ២០១៥ បាន​ណែនាំ Low Power Mode ដើម្បី​ប្រាកដ​ថា​ថ្ម iPhone កាន់​បាន​យូរ​។ ពេល​កម្រិត​ថ្ម​ដល់ ២០% និង​បន្ទាប់​មក ១០% អ្នក​នឹង​ឃើញ​ផ្ទាំង​មួយ​បង្ហាញ​អាច​ឲ្យ​អ្នក​ជ្រើសរើស​ប្រើ Low Power Mode ដោយ​វា​កាត់​បន្ថយ​ពន្លឺ​អេក្រង់ កាត់​បន្ថយ Animation របស់​ប្រព័ន្ធ និង​កំណត់​អ្វី​ដំណើរការ​ក្នុង Background លើ​ទូរសព្ទ ពេល Device មាន​កម្រិត​សាក​ខ្ពស់ Low Power Mode នឹង​បិទ​ដោយ​ស្វ័យប្រវត្តិ​។ 

មុខងារ​ពន្យារ​ល្បឿន​របស់ Apple មាន​ដំណើរការ​ដូចម្តេច​?

ក្រុមហ៊ុន​និយាយ​ថា iOS Software របស់ Apple ជំនាន់ iOS 10.2.1 មាន​សមត្ថភាព​គ្រប់គ្រង​ថាមពល​ថ្ម​បាន​ល្អ ដើម្បី​ដោះស្រាយ​ជាមួយ​នឹង​អាយុកាល​ថ្ម​។ ប្រព័ន្ធ​ប្រតិបត្តិការ​ពន្យឺត​ល្បឿន Device ដើម្បី​រារាំង​ពី​ការ​រលត់ ប៉ុន្តែ​តែ​ក្នុង​ករណី​សីតុណ្ហភាព​ត្រជាក់ ថ្ម​សាក​បាន​តិច ឬ​ថ្ម​ចាស់​ខ្លាំង​។ ដើម្បី​ជួយ​គ្រប់គ្រង​ការ​ប្រើ​ថាមពល Processor មិន​បំពេញ​ការងារ​បាន​ពេញលេញ​រហ័ស​នោះ​ទេ​។ 

ពេល​ណា​មុខងារ​នេះ​ចាប់ផ្តើម​ដំណើរការ​?

មុខងារ​នេះ​ដំណើរការ​តែ​លើ iPhone មាន​ថ្ម​អាយុកាល​យូរ ឬ​កម្រិត​សាក​ចុះ​ទាប ដោយ​បន្ថយ​ល្បឿន​ទូរសព្ទ​ក្នុង​ករណី​សីតុណ្ហភាព​ត្រជាក់​។ iPhone ដំណើរការ​ល្អ​បំផុត​ក្នុង​បរិយាកាស​មាន​សីតុណ្ហភាព​ចន្លោះ​ពី ០ ទៅ ៣៣​ អស្សាសេ។ 

Software នេះ​ដំណើរការ​លើ​ទូរសព្ទ​ជំនាន់​ណា​ខ្លះ​?

ឆ្នាំមុន Software របស់ Apple ជំនាន់ iOS 10.2.1 បាន​ដាក់​លើ iPhone 6, 6Plus, 6S, 6S Plus និង SE។ ឆ្នាំ​នេះ​ជំនាន់ iOS 11.2 បាន​ពង្រីក​មុខងារ​ទៅ​ដល់ iPhone 7 និង 7 Plus ហើយ​នឹង​ដាក់​លើ Apple device ផ្សេង​ទៀត​នៅ​ពេល​អនាគត​។ 

តើមាន​ឥទ្ធិពល​លើ iPad និង Mac ដែរ​ឬ​ទេ?​

iPad និង Mac មាន​ថ្ម​ធំ ហើយ​មុខងារ​នេះ​មិន​មាន​គោលដៅ​លើ Device ទាំង​នេះ​ទេ​។ 

ហេតុអ្វី​បាន​ជា​មិន​អាច​គ្រាន់​តែ​ដក​ថ្ម iPhone ចេញ​?

ក្រុមហ៊ុន​ប្រឈម​ការ​រិះគន់​ជាច្រើន ដោយ​ពិបាក​ដោះ​ថ្ម​ដូរ​លើ iPhone។ ទូរសព្ទ Android ចាស់​ជាច្រើន​អាច​ដោះ​គម្រប​ក្រោយ​ងាយស្រួល​ដោះ​ដូរ​ថ្ម ដោយ​ប្រើ​ជ័រ ចៀស​ជាង​ប្រើ​លោហៈ។ Apple រចនា​បែប​នេះ​ដោយ​ចង់​ដាក់​ថ្ម​បាន​ច្រើន​ក្នុង​ទីតាំង​តូច ។ 

មាន​អ្វី​កើតឡើង​ពេល​អ្នក​ប្តូរ​ថ្ម​ថ្មី​លើ​ទូរសព្ទ​ចាស់​?

ប្រសិនបើ​អ្នក​ប្តូរ​ថ្ម iPhone ថ្មី មុខងារ​បន្ថយ​ល្បឿន​ទូរសព្ទ​នឹង​បិទ​ដោយ​ស្វ័យប្រវត្តិ ហើយ​អ្នក​ដូច​ទទួល​បាន​ទូរសព្ទ​ថ្មី​ដូច្នោះ​ដែរ​ ប៉ុន្តែ​នៅ​មិន​ទាន់​មាន​ការ​បង្ហាញ​ជា​ផ្លូវការ​ពី Apple នោះ​ទេ​។

ហេតុអ្វី​បាន​ជា​ទូរសព្ទ​យឺត​ពេល​ឡើង​ជំនាន់ Software ថ្មី​?

ការ​ពន្យល់​បង្ហាញ​ថា ការ​យឺត​នេះ​អាច​ដោយសារ Storage ពេញ​ពេក ឬ Wi-Fi router អ្នក​ប្រើ​មាន​ល្បឿន​យឺត​។ 

Apple ចង់​ឲ្យ​អ្នក​ទិញ​ទូរសព្ទ​ថ្មី​មែន​ទេ​?

ក្រុមហ៊ុន Apple និយាយ​ថា មុខងារ​ថ្មី​ក្នុង Software របស់​ខ្លួន​ចង់​ជួយ​អ្នក​ឲ្យ​ប្រើ Device បាន​យូរ​៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា Like Page Sabay News Technology...

អានអត្ថបទ

ប្រភព៖ Cnet   ប្រែ​សម្រួល៖ ប៊ុនធឿន